4 September 2021, Saturday
大鄉里入城……
貓兄二話不說就話要去Rainbow……真係咁好味？
離鄉別井幾廿年，唔認得路是常識吧～（關咩事吖，有人係上環就已經搵唔到巴士站，差D追車尾要等20分鐘先有下一班車呀！）
一落巴士，一過對面馬路……嘩！而家真係屯門好多牛呀！勁擠擁，以前係呢邊想搵隻人睇吓都無架！
跟住……我又盪失路喇！🤣🤣🤣
到咗商場，行咗3邊都無果間餐廳，入埋商場入面搵都無，原來係第4邊！
無得訂位，要一早去門口排隊，我地計好時間去食第2輪，好彩係門口傾咗陣都唔駛半個鐘就有位喇～
間餐廳好細架咋，2張2人枱，3張4人枱，坐滿人都唔多方便影吓個內部……呢張相都係趁人埋單走咗嘅一瞬間影架咋～
2位識途老馬一坐低就叫Burger、Steak，我就傻更更叫咗份炸魚薯條……
2個喪心病狂仲話要另加薯條……我話食住先啦，我唔想好似上次咁又要打包返屋企再食多1日食到熱氣牙痛呀！
紐西蘭鱈魚薯條 $108
炸魚好檸大塊！咁嘅價錢，仲要比紐西蘭鱈魚你，會唔會太抵食呀？！🤣🤣🤣
魚肉滑滑地無腥味又唔會乾爭爭，新鮮檸檬有略略煎過，有Heart，正！
薯條真係超級正！難怪佢地未落Order就話要加碼……
牛扒煎蛋 $158
靚牛扒配煎蛋係咩玩法？Size足，肉質軟腍，入味帶少少焦香，伴菜高質，Wonderful！可以講句「牛有牛味」嘛？！🤣🤣🤣
落單果時貓兄想要5成，望一望我就話都係要7成啦……我心裡面係有少少內疚嘅，人生得一知己死而無憾，人大咗朋友越黎越少，但多係無用嘅夠就得喇……
漢堡薯條 $118
Burger先係重中之中，D材料叠埋高到呢～包好吃，肉又香，芝士半溶，Everything配合得好好，讚！難怪佢地黎過咁多次都唔厭，食完又食再食～
餐飲可以加$17轉梳打！
1個鐘頭內隊晒，飽到暈！！！2個喪心病狂又話行去下個街口飲咖啡，重點係……件Cake喎～
Crazy的一天正式展開！！！
出一出黎又唔知要重幾多磅！！！🙈🙈🙈
味道：★★★★☆
環境：★★★☆☆
服務：★★★★☆
衛生：★★★★☆
抵食：★★★★☆
彩虹煮意 Rainbow Cuisine
地址：屯門 青河坊2號麗寶商場地下4-5舖
電話：+852 5237-3212
網址：www.facebook.com/TMLaiPo/
沒有留言:
張貼留言