11 March 2021, Thursday
10月尾同朋友食完飯之後，我地就無係外面坐低食過1餐飯，足足4個半月啦！！！（間唔中都會買吓外賣返屋企食嘅，但一定會叮吓先食囉）
尋晚新聞開始回顧311，轉眼已十週年，眼淚仍然係忍唔住留出黎……
搬Office進入最後倒數，搬埋今日呢一車去迷你倉，終於見到家鄉啦啦啦～😭😭😭
眼見搬遷成功在望，近日確診數字又偏低，個人嘅戒心都低咗，係街外面食飯嘅慾望大爆發，遇啱311走難紀念日，仲唔即刻比個藉口自己咩。
係餐廳嘆緊和牛果刻新聞就彈出黎……
健身室群組10人確診！我真係天剎孤星黎架，4個幾月無出街食飯，一出街食1餐飯就出事！
（過2日個群組嘅確診數字仲標升到99+7人，問你死未）
（同第4波跳老舞群組一樣，今次第5波都係集中係上流社會，住中半世果堆）
唔食都食緊囉，口罩都除咗囉，唯有繼續食埋去啦，屎就屎啦～
好彩，我地有卡位坐，3面都有好高好大片嘅膠板隔住，後面2張卡位又無人坐，都安心少少～（Touch Wood要中都係會中）
落單係Scan張單嘅QR Code上網自己落單，好似機場Priority Lounge咁，減少接觸～
有張摺紙可以摺埋個口罩，變做個利是封咁，好有心思～
叫咗2個燒肉定食……
跟餐嘅昆布湯麻麻地，飲1啖試吓味算啦……
前菜沙律無要到，不嬲腸胃唔好唔敢食生冷野……
和牛三味大滿足 $228
Da Da……佐賀県產A5和牛牛肋肉🌟🌟🌟
仲有米國產SRF和牛牛肋肉，米國產SRF和牛牛板腱，肩脊肉，牛肋肉……係屋企餓咗咁耐，一次過食返餐勁嘅～
D雪花幾迷人，肉質好柔軟細緻，牛味爆爆爆燈，和牛喎，無可能唔正呀～🤣🤣🤣
牛角豚雞六品燒肉盛合 $108
丹麥皇冠豚扒，豚肉，豬頸肉，新潟雞爽肉，雞翼，雞腿肉……樣樣都有D咁啦～肉嘅質數都唔錯～
他他他燒滾我 I'm on fire……出賣年齡系列～🤣🤣🤣
牛角飯勁多紫菜，加埋洋蔥同豉油，好好味呀！！！（唉，一食就食咗大半碗，屎得！但係都要忍住唔可以食晒佢，醫生叫我唔好食飯架！！！）
餐飲有成12種選擇，太離譜啦！！！叫人點揀呀！！！🤣🤣🤣
有得揀一定係揀Caplis Soda～
有人好興致到要叫清酒添呀！！！
埋單先知下午茶時間原來有7折，好抵食呀！！！
Honey食完話大滿足，都未埋單走人已經話聽日都想再黎食……係屋企餓得太耐，黐咗定喇～🤣🤣🤣
味道：★★★★☆
環境：★★★★☆
服務：★★★★☆
衛生：★★★★☆
抵食：★★★★☆
牛角日本燒肉專門店 Gyu-Kaku
地址：太古 康山道1-2號康怡廣場2樓S37-S38號舖
電話：+852 2866-6710
網址：www.gyukaku.com.hk/
沒有留言:
張貼留言