29 September 2020, Tuesday
〖Day 13 &14〗
藍帶廚神早4日返香港話檢疫過程好Smooth… (緊係啦，佢坐頭等，落機都快D啦)
今日每1關都等好耐，機場職員話之前都無乜人，係呢2日先開始多人。(緊係啦，遲2日機都未必上到，仲要屈係酒店14日，邊有衫換啫，人都癲)
災難由落機開始…
17:00 首先係無人駕駛度落車變隊尾，又要係月台即場Download App同出示到「檢疫申報表完成QR Code」，2個職員每次只Check 1家人，排前面D人百無就塞死晒，又唔放後面Ready嘅人…
Honey隻手指用得太多酒精搓手液，Scan錯太多次指模，又唔記得App Store Password，裝唔到App，諗緊係咪離開唔到機場…好彩，同住嘅人可以1部機有App就得。
過咗第1關嘅第1關，臨上電梯又再有2個職員要Double Check…
走甩咗，上到樓上，量體溫又迫你除Face Shield，拉低少少露出額頭都話唔得…
(喂，知唔知咁樣又除又戴有箘好易感染架)
跟手最離奇係，要過X-ray安檢！
(喂，我而家唔係轉機呀，我係咪排錯隊呀？！)(呢個係界乎第1關同第2關之間而POSTER又無顯示出黎嘅樽頸位)
得1部X光機，塞咗唔記得幾耐……
排到我，問海關：我係咪去錯地方，我唔係轉機喎！
海關：因為機管局借出地方（後尾我估意思係用咗200幾號登機閘口果層做檢疫流程）
我：咁飛機派D水點算？
海關：水無問題，可以過（眼見排我前面D後生仔一早倒晒水壺D水落Liquid 桶）
好，過咗安檢，又再有2個職員要Triple Check「檢疫申報表完成QR Code」同埋個App。
下1關戴手帶。(呢個係第3關)
下1關Scan 手帶QR Code入App。(呢個都係第3關)
第4關「領取強制檢疫令」…排得最最最最耐！！！維持秩序個阿姐話係呢2日先多人，之前無乜人！
完成會派張黃卡頸繩，靠佢入酒店住。(我地搞掂果陣條龍係TRIPLE咁滯，有人投稿話呢度排3個鐘真係唔出奇，我地9衝都排咗1個鐘)
張日落相都唔記得幾時影…
第5關收集樣本，原來係自己黎，我仲以為有職員做…好吉，唔駛等。
呢區最危險，附近D人真係Chok喉嚨Chok到好大聲，咁大力D菌會唔會週圍漂架… (每次諗起D聲都想嘔)
19:10 交完樣本，去第6關就有D出入… 再派檢疫樽10日後交返，然後就派酒店Room Number (寫係第4關派嘅黃卡頸繩背面)，跟住就坐櫈仔等接駁車…
正式入境…
19:40 攞行李
19:45 排旅遊巴送到指定酒店，等到第2朝出Negative Report先可以自行返屋企再自我隔離14日～
20:10 終於上到檢疫巴士，由無人駕駛落車開始計，足足3個幾鐘！
4點幾落機，9點正終於到酒店房。
入到房，第1件事，噴噴噴噴噴，抹抹抹抹抹！
明明係機場派Room Number 果陣仲問係咪素食？有咩食物敏感？到咗酒店LOBBY已經一袋袋PACK起晒啦，得1款（早幾日藍帶廚神仲話有得Order，好正咁話）。
似唔似拜山套裝？！ (HONEY同我都有同感喎)
食完飯盒沖埋涼就瞓…
今晚瞓覺都戴住口罩，好彩有帶枕頭套，瞓落去都安心好多。
Good night & good luck…
💣聽日原來仲有一場災難等緊大家💥
Day 14 攝氏24-30度
徹夜難眠，枕頭紙咁薄，再加上Jetlagged～（係英國都未Jetlagged 完又返香港再Jetlagged，生理時鐘變到好混亂呀）
零晨3點幾2個肚一齊狂打鼓，好慘！（英國晚餐時間8點幾）
Anyway，有得沖涼換衫攤吓，點都舒服過要留係機場煎熬嘅～
戴手帶果陣唔醒起應該戴左手…
戴手帶隻手開始敏感，紅晒腫晒起水泡…（第2日全身上上下下前前後後左左右右都開始紅腫痕癢，懷疑係酒店沐浴露問題）
朝早8點（英國瞓覺時間12點），剛啱入睡，就有人拍門……
打開房門，有2袋早餐掛係外面。（門框度貼咗個膠勾）
同晚餐一樣味道清淡但唔難食，最落本係用環保餐具。食咗炒麵同燒賣腸仔，留返個包同蛋等陣臨走先食。（起碼頂吓個胃返到屋企個程車）
再恰陣先～😴💤💤💤（結果食咗野個胃浪住都瞓唔著）
返到「康」港就Auto進入「康」港Mode…上網、上網、上網… (係英國係懶得上網)
11:18am 酒店房電話響起：2個都無問題，盡快離開退房。
好彩頭先無所事事已經PACK好晒D行李，9秒9衝出去搭LIFT已經搭唔到，係咁飛LIFT，之後LIFT制仲要FROZEN點按DOWN & UP都唔著燈，等咗一輪終於UP到入到LIFT…
LOBBY就幾靚，房就好唔掂…
無用過嘅設備，驚有箘…
LOBBY CHECK-OUT要排蛇餅，搭到LIFT都未必出到LIFT，但情況尚算有秩序…
出咗LOBBY就有D混亂，D人塞晒係路面，又無指示，觀察咗一陣，排住TAXI條龍先…
我排嘅時候以為條龍已經好長…
嘩…等多陣仲恐怖呀！
最慘係工廠區，單線行車，原本淨係巨無霸貨櫃車已經塞到爆啦，你仲係度開間酒店？仲唔放Ｄ車入黎，要Ｄ車停晒係條單程線等住客搬Ｎ件行李上車，唔塞到爆炸就有鬼！
全日雷暴～
排排吓仲要落雨，好彩我未排到出去咋，睇見前面Ｄ人就慘～（好彩我地上落車果刻都無落雨）
排排吓有白車出現，ＯＭＧ，希望唔係住我地果層啦～（頭先企到亂糟糟嘅人潮瞬間消失）
頭先條龍咁長又塞車無TAXI，有諗過CALL UBER但場面好混亂驚個司機黎到唔等人又亂收費，藍帶廚神主動叫司機黎接我地，好感動～（雖然佢司機黎到果陣我地都差不多排到喇😂）
終於有機會影吓間酒店(帝X酒店@葵涌健全街)，酒店有職員幫手搬行李過對面馬路，好好服務～
上咗車就安樂晒？少年你太年輕啦～
真正嘅災難仲等緊你！
入到屋，廳個冷氣制壞咗著唔到燈！ＯＭＧ！！！(要挨14日先可以叫師傅黎整)
而家嘅室內溫度係… 攝氏31.3度～
入夜閃電閃到爆，香港有好大怨情！
後記：個天真係唔鍾意我，唔駛加＂唔通＂係前面！我一早約定水電師傅，係我出關之日黎整個冷氣曲架，頂佢吖，無啦啦打８號風球！無得整冷氣之餘，黏土同學報料話Ｄ舖頭９成都無開，想落去吉豬島買補給品都唔得！！！😡😡😡
沒有留言:
張貼留言