Conrad Lobby Lounge：比預期中好吃

3 October 2017, Tuesday

日前收到銀行寄來的Coupon -- 2人Afternoon Tea Set...

Coupon是Conrad的Lobby Lounge...

(一直覺得以前跟台山四寶去過一次)

(寫Blog時才証實跟台山四寶去的是Island Shangri-la個Lobby Lounge)

Coupon話唔包Beverages，睇到有Ｄ氣憤。。。Afternoon Tea Set喎。。。無包飲品又算咩Tea Set呀？！

訂位時原本係打算同HONEY去... 諗住點都唔屈服, 唔會加錢叫飲品...

後尾力仔又夾到時間去... 姊妹淘實傾到口乾, 算啦, 屈服啦, 加錢叫飲品...

最後去到職員又話可以揀茶，仲要有１２種選擇咁多！！！仲有REFILL, 正晒~



試了職員推薦的Number 12 Tea，壺入面有粒咖啡豆飄吓飄吓。。。杯茶好香，好似飲緊Vanilla奶茶咁...

Scone... 味道還可以... 濕潤度剛好... 果醬的果肉超多...



其實張枱咁細，就唔好夾硬做High Tea市場啦，擺埋茶壺茶杯餐具，個High Tea Set迫到差Ｄ碌落街咁，食到迫迫夾夾咁，一Ｄ都唔High囉～

影呢張相時，上圖碟Scone我要放係自己大脾！


底層：個鴨肝多士上面鋪咗莓果啫喱，清新嘅莓酸抵銷咗鴨肝嘅膩，好有驚喜！


中層：無乜特別，但味道又ＯＫ。。。


頂層：最正係粒黑莓，又大又鮮甜。。。梨撻底個檸檬醬酸到盲嘅都開眼。。。支膠Tube液體啜咗少少，苦到我求生不得求死不能！！！診所櫻桃味藥水苦度乘１０００！！！


粒Macaroon... 藍得好恐怖！仲有頭頂朵菊花唔知想點... 放入口需要好大勇氣... 味道... 有Ｄ苦...


環境... 唔想影... 咪走廊路邊行人通道囉...

入口... 影唔到... 無理由走9里遠去影成間酒店嘅外貌... (Lobby Lounge無外貌可言，咪走廊路邊囉）

由於係用Coupon嘅關係，會形住個套餐都唔慌好食得去邊... Expectation SET低咗，一路食一路話＂估唔到又幾ＯＫ喎＂... 哈哈...

服務員都好有耐性，揀茶時我話力仔唔飲得茶，有無Sparkling Water之類... 服務員好醒目地推薦咗２隻無咖啡因嘅茶，話大肚婆同細蚊仔都飲得...


味道：★★★★☆
環境：★★★☆☆
服務：★★★★☆
衛生：★★★★☆
抵食：★★★★☆

樂聚廊 Lobby Lounge
地址：金鐘 金鐘道88號太古廣場港麗酒店大堂
電話：+852 2521-3838
網址：www.conraddining.com



✨⭐🌟１２月１２日去金鐘運輸處攞車牌，順便用埋剩返果張ＣＯＵＰＯＮ。比起上次坐行人通道，今次坐窗邊光線充足，影起相黎靚好多！