貓兄吹雞去新開嘅法國運動用品店掃貨，我當然撲到去啦！
只係開張第2日，個貨架好似畀暴徒搶掠完一樣，有冇咁搶手呀？！
雖然買唔到19蚊背囊，但都買到啲心頭好，4件產品加埋唔過200蚊，實在抵到爛！
喪平完又到咗每次出街最頭痛嘅時候 ，特別係銅鑼灣區 ，人又多價錢又貴 ，今日我推薦貓兄去富豪酒店後邊嗰條街試一試。我覺得嗰條街冇咁多人，食物都比較用心制作，價錢亦冇咁瘋狂劏客。
預先上Google map了解咗呢頭有啲咩餐廳，貓兄偏愛漢堡，揀咗呢間，入到去個餐牌Set Dinner居然冇漢堡？！
紅菜頭羅宋湯估唔到稀到咁樣。
原隻燒雞攤凍咗都好味，咁就即係真係好味啦。
吉列牛扒炸粉味好重，牛味反而欠奉。
餐廳內客人不多都幾好坐嘅，俄羅斯氣息就只有餐廳門口個矮櫃入面果幾隻俄羅斯娃娃，走嘅時候等ＬＩＦＴ期間先發現到。
服務。。。唔算差嘅，一般港式冷漠又帶點無故嘅高傲果隻囉～
價錢我覺得貴㗎 ，不過隻雞味道唔差，咁我覺得ＯＫ啦 。如果行返去中心地帶旺啲嘅街，價錢可能更貴、味道更差、服務更差、環境更嘈吵。
食完呢餐 ，第二日路過太古城恆生銀行，旁邊圍咗木板裝修緊 ，原來又係呢間餐廳！我即刻影相Whatsapp貓兄，我覺得自己好戇居囉，跑到咁老遠食一間即將係太古城開嘅餐廳。
味道：★★★☆☆
環境：★★★☆☆
服務：★★★☆☆
衛生：★★★★☆
抵食：★★☆☆☆
Wheatfield Kitchen
地址：銅鑼灣邊寧頓街15號
電話：+852 3422 8803
網址：
沒有留言:
張貼留言