咩都唔好講住，貼咗作品相先！
好，可以回正題，從頭講起。
難得有同學仔來台北搵我一齊玩，偏偏我就要走去台中上堂，點解個天要咁樣玩我地？
縱使只能出發前係台北車站食個快Lunch，總比不能相見好。
間餐廳係我地食完唔夠１個月之後就執咗Lu～
歡樂嘅時光過得特別快，又係時候講拜拜！
早幾日先坐過一次高鐵來台中同早兄飲茶食晚飯，有晒經驗，今次揀最短程嘅，由台北去台中只係40幾分鐘，快到好似元朗出銅鑼灣咁～
但今次太天真，誤信咗高鐵嘅免費接駁車服務，中伏！
原來係台中坐巴士，10km以內係完全唔使錢！所謂嘅高鐵免費接駁車，只係將呢個免費服務包裝成自己嘅服務。結果大排長龍仲要站站停，不停有人上上落落，亦冇地方放行李，好唔方便，下次都係坐的士算啦。
前前後後用咗一個鐘先去到酒店。
間酒店係朋友幫我哋Book嘅，台中金典酒店，2500台幣連稅，仲以為好平，但係Check-in時被奚落，粗暴指路，話我地訂嘅係旁邊嘅中港晶華大樓，如果唔係酒店嘅話，咁樣2500台幣一Ｄ都唔平囉。
只要同當地人講，間酒店喺Sogo隔離，大家都會即刻講得出「金典」！樓下係大商場，應該都幾地標吓。
間酒店望落好似好正常咁，其實問題多多。
首先，空氣嚴重污染，住一晚鼻塞耳鳴耳痛！可能同商場大裝修緊有關係。
然後，厠所設備看似正常，其實全部設計都大有問題，難以使用。
浴缸出奇地高，去到我大髀位，出入非常困難。
風筒要拔咗蓋，反轉Cup落個風筒度，先可以收番入風筒架。風筒吹完咁熱，咁樣抆走個蓋呀？
洗面盆水龍頭開關堅韌無比，雙手搽咗梘液之後，跣到冇可能扭得返埋個水龍頭。
坐厠去水個制亦好難撳，狂撳１０次８次先可以沖到厠所。
樓下係有大商場，但店鋪同食肆唔係太吸引，仲要大裝修緊，沙塵滾滾，唔好預我。
地理位置亦唔係想像中咁好，雖然喺Sogo斜對面，但係嗰條馬路相當難過，由酒店行到去Sogo門口已經浪費好多時間。反而發現Sogo旁邊有間飛機艙酒店，我哋變咗色途老馬，第二次再嚟上堂嘅時候就揀咗呢間，淨係唔使過２條馬路都慳十分鐘。
酒店包嘅早餐亦都唔好，明明未過早餐時間，職員就喺到拆曬枱，要我哋搭１２人大枱， 仲要張枱布污糟邋遢， 食物選擇小，味道差。
而家已經四點幾，我得返幾個鐘頭玩㗎咋，聽日同後日全日上堂，之後就要返台北㗎啦，當然要爭取時間衝衝衝！
唯一一站：勤美術館
前前後後去過台中六至七次，但係都同呢間雪糕店無緣，真係超多人排隊耶～
晚餐於老吳的西洋料理～
晚餐後沿草悟道逛逛，再轉入公益路繼續逛，好多餐廳，好吸引耶～
回到酒店再逛逛酒店商場，唯一吸引我是Starbucks的設計，成個游泳池咁，好特別呀！
雖則話呢兩日要上堂冇得去玩，但係都上得好開心，仲足不出戶已能大飽口福，幸福指數爆燈。
咦？典解？上面貼嘅全部同學習無關嘅？
江山易改，本性難移。食玩瞓先係我人生裡面最重要嘅元素，哈哈～
各位觀眾，1:24 England Tea Room!!!
第１次做，好緊張，慢吞吞，老師同助手驚我做唔切，左右夾住我坐，不時伸出援手，搞到我都唔係幾好意思。
話說。。。有人呢２日係我上緊堂期間，去咗好多台中觀光景點，只係來過２次台中，返到去台北之後就扮晒台中通，Ｄ口氣大到呢～
👂👀👂👀👂👀👂👀👂👀👂👀👂👀👂👀 講故時間 👂👀👂👀👂👀👂👀👂👀👂👀👂👀👂👀
點解我會走到去台中咁遠上堂？
事緣係，我喺台北上師資課期間，咁啱遇到同是香港來上課的女生，見幾投契，大家相約返香港後一齊去上黏土班，加定對方做Facebook Friend方便聯絡，咁啱得咁橋有Common Friend，老師好奇一問，先發現佢原來十幾年前係我公司客戶。
真巧合地，我遇到佢之前果日去飲茶食點心，識咗個朋友，佢知道我玩黏土之後，即時介紹台中好有名嘅老師加我Facebook，方便第時一齊去台中潮聖。
咁啱台中老師Facebook果２日提到有位香港女生用２年時間到各國學習各種手作藝術，我就好奇問下台中老師提及嗰個女生係咪佢？竟然真係！呢個世界上邊有咁奇妙嘅事發生，我地真係有緣份到起雞皮囉！大家太開心，相聚時間太短，所以嗰個女生提議大家一齊去台中上堂，延續奇緣。
呢２日我地真係學習得好開心，希望係不久嘅將來，可以再次一起學習～
沒有留言:
張貼留言