捉小精靈捉到攰攰地開始想搵地方坐下，喺北投公園隔離有間素食料理係Google Map嘅評分唔錯，近近哋就試下啦。
不過頭先嘅下午茶真係超飽，入到餐廳見有得訂位就book咗七點，過隔離7-11買包果汁坐低慢慢飲稍事休息，抖左一陣又在作戰多一陣先返轉頭食晚飯。
間餐廳入面都幾骨子，坐得好舒服，服務員都好友善同好有禮貌。最令人驚嘆嘅係，洗手間個坐廁居然有自動換廁板膠袋功能，只要拉２下手制就會自動換個新膠袋套住個廁板，好勁呀！我大鄉里出城，第一次見咋～
見到個樂活套餐 $395包湯、沙拉、開胃菜、主菜、甜點及飲料，都幾抵食，懶得諗，雖然好飽。
餐湯係紅蘿蔔湯，超超超好飲囉！我相信如果唔鍾意食紅蘿蔔嘅小朋友飲咗呢碗湯，會從此愛上紅蘿蔔囉。
餐前麵包香草醬勁多。
沙律勁新鮮，個醬汁酸酸地幾開胃，好味。
開胃前菜都好特色幾好味。
青醬炒飯佐蒲燒豆腐
－蒲燒豆腐整到好似成塊炸豬扒咁，鋪咗一塊紫菜喺下面，又幾鬼好食，突破傳統框框，完全唔似食緊齋！D飯落勁多青醬，好好味，原先已經飽到上心口都仲食得曬。
串燒綠咖哩飯
飯後甜品個茶凍都好好味，飲埋杯菊花茶清下熱氣。
台灣嘅素菜餐廳確係好利害，能夠令我呢隻食肉獸俯首稱臣。
身心滿足地散步返「全球25間最美麗圖書館」之一嘅北投圖書館再戰Pokémon Go(寶可夢)，哈哈。
味道：★★★☆☆
環境：★★★☆☆
服務：★★★☆☆
衛生：★★★☆☆
抵食：★★★☆☆
Su蔬食料理
地址：台北市 北投區 光明路228號
電話：+886 2 2894-6428
網址：www.su-veges.com
沒有留言:
張貼留言