係我唔識得欣賞遊客嘅口味掛，又一次有中伏感。為咗捉小精靈，你可以去到幾盡？
自從Pokémon Go(寶可夢)登錄台灣，我哋每日都早出晚歸，自然要順便搵下新餐廳慰勞一下辛勞嘅小精靈訓練員啦～
呢日來到傳說中非常非常非常之多小精靈嘅北投公園，捕捉小精靈之前當然要醫飽個肚先啦！有不少遊客向我推薦過蓬萊精緻台菜，我當然亦唔會錯過啦！
門面簡約過簡約，冇咩好影。餐廳內都係簡潔裝修。
阿姨急不及待要我哋落單，催促左三次，講緊係坐低唔夠5分鐘內。
第一次來都係點啲招牌菜。
蓬萊排骨酥 (半斤) NT$190
－招牌菜，夠香夠酥夠熱仲好多油，幾好味，可惜唔係我杯茶。但我好相信會有人好鍾意食，嗰啲成日強調菜唔夠油係唔好食嘅人(無論係清菜定齋菜)。
炒三鮮 NT$240
－係呀姨推薦嘅，有海參有魷魚有蝦，酸酸地幾開胃，味道唔係話特別好，都食得過嘅。
軟玉豆腐 (1塊) NT$40
－我仲睇緊人哋啲Blog睇下有咩推薦菜，阿姨望到我個電話幅相就話呢個係軟玉豆腐，咁當然要叫番一份嚟試下啦。炸皮入面包咗片金華火腿，豆腐好滑溜，都ok嘅。
蓬萊芋頭條 (2條) NT$50
－見到人人推薦芋頭條，又叫番兩條嚟試下。原本以為係甜品，點知都唔多甜，當鹹點的話又有點芋香不足。
菜脯蛋 $150
－唔知今日發咩傻，想叫多一碟蔬菜，結果叫咗菜脯蛋。又係我哋唔鍾意食嘅Taiwan Style！厚過手掌，蛋香欠奉，唔紮實好虛浮。
點咗咁多碟菜再加２碗白飯居然食得曬，只係食淨一角菜脯蛋，我地堅係肚餓，厲害。
離開餐廳時，覺得成個口腔都係油，好辛苦！都係嗰句啦，鍾意食油淋淋嘅人應該會好歡喜。
試過就算，之後想食台灣菜都係去返天母東路，唔會特別推薦朋友來這裡。
餐廳附近的免費溫泉足浴。
是日戲肉... 抓寶抓到手軟的北投公園！
現正上演：小精靈訓練員的日與夜！路過北投圖書館時比電視台影到我邊行邊抓寶，當時只得小貓３－４隻，應該唔會播出街啩，哈哈哈～
味道：★★★☆☆
環境：★★★☆☆
服務：★★★☆☆
衛生：★★★☆☆
抵食：★★★☆☆
蓬萊精緻台菜
地址：台北市 北投區 中和街238號
電話：+886 2 2891-2778
網址：www.ponlai.com.tw
沒有留言:
張貼留言