【烏來】阿春美食：美而廉的家庭式人情味小店

19 March 2016, Saturday

《續》烏來。泰雅仙境Spring+Spa 2日1夜溫泉之旅

行程：烏來老街 → 烏來泰雅民族博物館 → 雅各原住民山豬肉香腸 → 烏來台車(CLOSED) → 烏來瀑布 → 昇瀧泰雅珈琲館 → 烏來林業生活館 →  阿春小吃店 → Spring Spa溫泉山莊

離開烏來瀑布，就開車返去酒店checkin。checkin完又開車返去烏來老街搵食。



烏來老街入口有幾間大餐廳，超級大，間間都可以放十幾廿張大枱，但係入面一個客都冇，烏燈黑火，好得人驚。一路行，行到差不多街尾見到呢間阿春美食，舖仔細細裏面坐滿人，門口個招牌仲寫住食尚玩家四個字，好有說服力。再向街尾行多一陣都冇發現，返轉頭就呢間啦！


店內只有三個店員，全部都好忙，唔好喺服務上有太大期望。


我哋叫咗四至六人餐，五餸一湯，千二台幣，有放生土雞半隻，炒山香菇，魚蝦雙拼，鹵福山桂竹筍，時令山野菜。眼見其他三個餐都有生炒放山豬，好想試，問老細可唔可以轉，商討咗一陣，終於用咗個竹筍換咗個放山豬，yeah！



個炸蝦都幾惹味，好酥脆。放山土雞，雞有雞味，啲肉仲好彈牙。放山豬好好味肉質更係彈牙到不得了，但係分量奇少，一人都唔知有冇1-2片。山藥排骨湯好好飲，材料十足，分量又夠。








今晚呢餐大家食得好滿意，講緊三百蚊港紙有找五個人分，即係每人六十港幣都唔使。

離開時阿姨氣沖沖追出來，我哋仲以為比唔夠錢。原來係俾多左100蚊台幣，阿姨係都要塞番俾我哋，我哋話唔使，阿姨講笑話「小費太少」，引得大家哄堂大笑，maybe呢Ｄ就係大家口中所講嘅台灣人情味。

今晚真係食得好開心好滿足。


味道：★★★☆☆
環境：★★★☆☆
服務：★★★☆☆
衛生：★★★☆☆
抵食：★★★☆☆

阿春美食
地址：新北市 烏來區 烏來村烏來街109號
電話：+886 2 2661-7718
網址：http://0226617718.tw.tranews.com/