夏天到啦，大家係時候去沙灘玩沙啦～～～我終於都可以出城啦，不過唔係由鄉下去城市，而係由城市去鄉下，嘩哈哈哈～～～
福隆沙灘沙雕展上個星期開始咗，我哋即刻約埋朋友一齊去，不過週末天氣麻麻地，人又多，唯有等天氣好啲嘅星期一先去啦，無咁多人仲好啦～
今日全日都好厚雲，完全唔曬，冇出過汗，好正。
我哋黐朋友車去，係南港展覽館捷運站集合，出發前去台北車站Mos Burger食番個早午餐先。(點知係南港展覽館捷運站一出都有間Mos Burger)
開車大概一個小時左右就會到達福隆海水浴場，如果唔揸車，坐台鐵去到福隆車站過條馬路就到，都好方便，仲可以試下好出名嘅福隆車站便當。
一落車就見到我哋專程去土城桐花祭都睇唔到既桐花。
進入海水浴場範圍觀賞沙雕需要購票，費用台幣一百元。
我上珠寶黏土導師證書課程期間與老師聊起今天的旅程，老師話一星期前坐車路過見到工作人員喺度雕緊沙，覺得好小型... (台灣人覺得台灣面積好細，我哋香港人覺得台灣面積好大，所以，台灣人眼中好細既沙雕，我哋香港人眼中已經覺得好大型)
來自世界各地嘅藝術家嘅展品，會係呢兩個月內與各國佳麗爭艷鬥麗。
最引人注目嘅就當然係台灣第一任女總統小英同佢心愛嘅貓貓～～～
最吸引我嘅就係日本嘅天守閣...
仲有台灣夜市黑豬肉香腸... (係, 我認我為食)
係咪睇到O晒咀呢?!! 唔係合埋個口住, 陸續有來...
戰況相當激烈，各國代表的神乎其技讓人嘖嘖稱奇驚嘆不已。
令人期待的國內沙雕大賽。
遊覽完可以喺旁邊嘅小食亭嘆下雪糕。
『2016 福隆國際沙雕藝術季』
活動日期：5/7~7/10
開放時間：8:30~18:00
活動地點：福隆海水浴場
售票資訊：全票100元、優待票80元
～～～～～～～～～～～～～～～～～～～～～～～～～～～
難得出城，無理由就咁就打道回府嘅...
順道去一去附近嘅三貂角燈塔，剛巧今日週休，冇得入去燈塔睇古董，係外圍影下相都唔錯吖。
影完相就去龍洞四季灣海景咖啡屋嘆下午茶。
進入晶宴會館海洋莊園要比入場費，入場券部分費用可以抵扣消費。海洋莊園內有好多影相位，可以俾人影婚紗相，都好靚，比美沖繩海邊教堂，可惜日久失修，睇落有點殘舊，如果係專業攝影師嘅話，應該可以用打燈同埋photoshop嚟補救。
海水泳池已包括在入場費內... (頓時覺得好唔抵, 比咗入場費但無享用設施)
我哋去咗夏卡爾咖啡，坐喺室外飽覽無敵海景，全間咖啡室只有兩枱客（包括我哋），真係非常之咁優閒，喺呢個世外桃源返工真係令人非常羨慕嘅筍工，唔知呢度仲請唔請人呢？
杯咖啡就一般般啦，反而個三文治伴碟嘅墨西哥脆片就非常之咁好味，好味到朋友仲走去問店員邊度有得買，哈哈。
嘆完咖啡，我哋又要趕去鼻頭龍洞地質公園，停車場旁邊有地質教室及戶外展區，由於太陽開始落山，公園已經關門，我哋只可以喺度影下幾張相。
見到有台灣百合復育區有零星百合盛放中，傻瓜係度狂影，咁啱潛水教練阿姨路過，同我哋講開曬花啦上個月，仲show佢部手提電話影嘅相畀我哋睇，上個月全個園區都開滿花，真係爆靚囉。
之後男潛水教練路過又要show下去佢部tablet入邊嘅花花相畀我哋睇，傾傾下就問佢龍洞確實位置喺邊度。呢，嗰個港女硬闖龍洞被困，然後消防員好心救佢出嚟仲要踩住人仲要鬧人垃圾嗰度呢，真係「好事不出門，醜事傳千里」，一講就明。然後教練就手指指，指住對面岸。哦，原來係果度。
到咗夜晚食飯時間，我哋趕返去龍蝦大王食海鮮。
我哋喺門口揀好海鮮，秤好重量，問清楚價錢，講好點煮法，就施施然入去餐廳等食。
嘩嘩嘩！！！全晚，係全晚，全間舖頭竟然得我哋一枱客！好誇張呀！我哋四個人，七餸一湯，都係食咗四千幾蚊台幣，淨係兩隻本地野生龍蝦都已經二千幾啦，有冇咁抵呀？飽到我條腸就嚟爆啦。
蒜蓉龍蝦蒜味好勁，估唔到隻龍蝦咁多籽，我估真係堅野生囉，因為平時食嗰啲龍蝦，煮完之後D肉縮曬水同個殼size差距好大，但係呢個龍蝦煮完之後D肉多到爆，同個殼一樣咁大，真係第一次見囉。龍蝦肉鮮甜紮實，好好味，佢哋唔係用伊麵底係用烏冬底，啱晒我呢個烏冬怪，呵呵呵呵。
個龍蝦頭豆腐麵豉湯真係鮮甜到暈囉。一定一定一定，記得記得記得，試下試下試下。
清蒸吊筒好鮮味，但係要自己加番少少豉油囉。水上人食法，食原味鮮味，唔會加太多調味。
石斑肉地厚啖啖肉。
白飯魚唔知點解炸完之後隻眼都仲喺度，睇落幾恐怖，我都努力嘗試食咗一條，心理障礙影響，叫做試過一條就好喇。
露筍炒豬肉都好好味，好似得我一個狂食。
個炒蜆明明冇叫，唔知點解會嚟咗，唉，是但啦。
再加個炒高麗菜...
味道：★★★★☆
環境：★★★☆☆
服務：★★★☆☆
衛生：★★★☆☆
抵食：★★★★☆
龍蝦大王 Lobster King
地址：新北市 貢寮區 仁理村仁和路186號
電話：+886 2 2490-1001
網址： https://www.facebook.com/%E9%BE%8D%E8%9D%A6%E5%A4%A7%E7%8E%8B-168796396657972/?rf=187988021219843
臨走過隔離舖頭買埋龍蝦脆片做手信，大滿足，聽日早午餐都唔使食啦。
歡樂背後嘅代價就係爛腳！原本我對腳已經敏感起緊水泡，去埋沙灘之後，更加紅腫，嗚嗚嗚嗚嗚……
沒有留言:
張貼留言