【台北】法蕾法式薄餅：係呢種薄餅, 唔係果種薄餅

22 December 2015, Tuesday

拖延了好久好久才上天母Downtown... (係, 唔知點解地圖下方捷運芝山站一帶叫天母Uptown, 明明交通比較方便, 聽說是有段古的) 

來台北前早已聽說去銀行辦少少手續都要等上大半天的, 之前都覺得D人誇大, 今天終於見識到了... 中場時間, 出去食個Lunch, 好讓銀行職員慢慢、慢慢、慢慢、慢慢、慢慢辦...

Honey的朋友推薦我地去一間不錯的餐廳, 行了一個圈又一個圈, 行到第3次, 佢終於肯定, 身旁落了閘的地方, 就係佢想帶我地去的地方...

就係呢個唔知點算嘅時候, 轉身一望... 薄餅屋?!!


好靚喎, 用來放上Facebook呃Like一流呀... (大家有睇過格林童話糖果屋的故事嗎?!! 唔知點解我突然聯想到)



餐廳入面都好靚, 法式鄉村簡樸風格...



店員送上餐牌... 就係呢個Moment, 我地終於醒覺「係呢種薄餅, 唔係果種薄餅」!!! 下次好心係餐廳門口睇清楚餐牌先啦~~~

唉... 硬住頭皮試下啦... 唔食過又點知好唔好食呢... 結果Order了2鹹1甜...

主菜/手工蕎麥鹹餅
阿爾薩斯風味培根乳酪 NT$230
-- 餡料味道有點像Carbonara白汁意粉, 味道是不錯的, 但當Lunch來食份量真係太少了, 而且我不太喜歡蕎麥鹹餅的味道 (個人問題)... 食完就似食咗一陣風咁, 唔覺自己有食過o野落肚...


主菜/手工蕎麥鹹餅
蘑菇培根 NT$250
-- Honey都有同感...

甜薄餅
香蕉巧克力 NT$120
-- 鹹的吃不慣, 以為甜的會好一點... 原來也是一個模樣... 薄薄的皮抺上朱古力醬, 像是淋在軟雪糕上果種, 真心吃不慣...

焦糖瑪奇朶咖啡 NT$100
-- 名字好特別, 原來是Macchiato... 味道還不錯的, 無記錯的話...


熱義大利咖啡 NT$80
-- 味道還不錯的, 無記錯的話...


真係好唔啱食, 感覺有少少中伏, 不過唔關餐廳時, 係我地2隻盲頭烏蠅自已無睇清楚啫, 下次我會小心D嘅啦...


*** 事隔接近個半月先寫返呢餐, 除咗因為忙, 仲有係忘記了, 亦因為食咗太多地方, 相片堆積如山, 有些不太喜歡的店真係曾經打算唔寫...

重新發奮圖強的原因是... 首要條件當然要無之前咁忙, 其次係呢幾日食咗好味的餐廳, 又有原動力寫文, 更甚是有間幾好味的韓國餐廳, 食咗幾次都未寫, 落單時唔想重複但又唔記得自己之前食過咩...

更更更重要的是... 昨天忽發奇想, 想將去過的餐廳都在Google Map mark粒星, 將來睇返可以加深印象...

以前試過係Laptop加星Sync唔到落手機, 好苦惱... 估唔到尋晚開Google Map打星, 佢竟然問我Login邊個A/C, 我又胡里胡塗入咗手機用緊果個, 今日竟然係Smartphone自動睇到晒尋晚加的星, WoW, 好開心呀 ***


味道：★★☆☆☆
環境：★★★★☆
服務：★★★☆☆
衛生：★★★★☆
抵食：★★☆☆☆

法蕾法式薄餅 Creperie La Bretagne
地址：台北市 士林區 天母西路5巷15號1樓
電話：+886 2 2874-9922
網址：http://creperielabretagne.com/2013/index2013.html