友情大過天!!!壽星正日生日拋低「最愛」的老公囝囡, 同「次愛」的小學同學一齊慶祝, 應該唔係人人做得到, 人生得知己如此, 屎而無撼啦吓話... E4, I Love UUU!!!
呢間聚滿坊粥底火鍋真係好好食, 壽星話打咗３０次電話去先有人聽, 多謝您喔~~~
各位觀眾... 今餐係唔知幾錢嘅, 亦都唔知有咩食嘅, 想食就乖乖坐低, 食完埋單自有分曉... 接受唔到嘅, 門口果便, 請呀!!! (話係咁話, 我知道果刻都有少少打個突)
鮑魚真係好新鮮, 為隆重其事, 特登拍咗條片, 去片!!! (哈哈, 咁我算唔算係Video Blogger呀?!!)
※拍片時, 我仲未知鮑魚下面係紮紮跳嘅蝦同瀨尿蝦, 仲以為鮑魚生猛到郁到個碗啪啪聲※
※片中好嘈果班人, 之後聲浪調高10倍, 我地4人幫全晚1句話都講唔到, 唔想喊破喉嚨搞到喉嚨痛但對方都係聽唔到, 人生第一次有輸咗比人的感覺(係製造嘈音方面)※
店內6張4人枱, 加埋呢堆人, 係得咁大地方...
成枱餸, 都唔知由邊度開始好... 店員叫咗我地好多次, 先落雞, 但無人理佢, 好慘, 嘿嘿...
6:00PM 入座, 8:00PM要準時要還枱, 時間相當緊迫...
KaKaMa又再再再再再次行咗好耐都未見人唔知行咗去邊, 龍媽好果斷咁先落咗鯪魚滑同小丸子... 牛丸黑椒味超重, 好辣... (點解我唔記得自己有食過鯪魚滑同白色小丸子嘅喂)
調味料方面, 只有辣椒同生蒜... 其實都夠嘅... Minimum囉...
咁大隻咁生猛嘅鮑魚放係面前, 仲有耐性放隻鮑魚係度慢慢等咩?!! 點會食雞先呀?!! 龍媽負責, 好似烚咗3分鐘, 超彈牙呀, 又唔韌, 好得呀... 龍媽D廚藝!!! 比著我就會烚10分鐘烚到變石頭...
嘆完鮑魚, 個堆膠碗仲係啪啪聲, 從膠碗的罅隙"莊下", 嘩, 原來仲有蝦, 仲係度玩緊跳彈簧呀!!!
蝦快食得呀嘛, 又驚佢跳咗出來嘥咗, 緊係要秒殺啦... 肉質紮實, 好味...
食完蝦先發現蝦下面仲有瀨尿蝦, 開心到呢... 瀨尿蝦腳仔仲郁下郁下o架...
肉質不是太紮實, 不過勁多膏呀...
花蟹都幾鮮味, 肉比較少...
貓兄見到D蜆吐白泡... 好新鮮, 最後只有1粒無開口...
雪白肥美的蜆肉...
倉魚肉地好滑溜呀, 又鮮甜, 好正呀!!!
牛肉雪花不是太多但都OK啦, 肉質結實, 間中落幾片, 好快食完...
食到最後, 我地終於願意食雞... 嘩!!! 超超超滑溜, 又彈牙, 好好好味呀!!! 大家都好有驚訝, 一問之下, 原來係新鮮雞, 每日5PM送到店內... 怪唔得口感咁好啦~~~
粟米超甜超多汁... 南瓜已經溶成粥底的一部分...
食到尾聲, 落埋粥仔...
禮成!!!
勝嘅!!! 祝壽星豐衣「粥」足!!!
咁多海鮮, 加埋最強新鮮雞, 碗粥甜到喊...
時辰到... 店員要開始收拾枱面, 準備迎戰下一輪餓狼...
鑽媽趁機向店員訴苦話「打30次電話先有人聽」, 店員笑住話所以佢都「唔敢接電話」, 笑得幾鬼甜呀, 應該係老細啦...
埋單張單, 就係咁簡單, 終於知呢餐要幾錢...
《驚嚇位》: 食食下半間店停咗電, 我黑仔王緊有份, 幾驚無得食埋剩返果半嘅食物呀, 仲生嘅喎, 未煮想黑暗中進食都唔得啦... 好彩隔咗幾分鐘有返電咋...
離開時, 餐廳門外通道已被餓狼重重佔領...
賓墟咁嘅場面, 4個傻婆仲係度玩自拍... 一把年紀, 都唔怕人笑嘅...
朋友第2日再打電話去BOOK枱, 已經要排到去3月喇, It's Crazy!!!
4個大胃王, 明明飽到嘔, 仲行去Elements搵甜品食, 全部餐廳都收晒工, 搵到Haagen Dazs時台員都落閘打烊, 只可以外賣都唔放過... 明明話好飽, 食1球雪糕算啦, 一見到1球HK$40/3球HK$70, 即刻人人都3球, 你地都得嘅啦... (包括我, 哈哈)
好開心的一個晚上, 盡興而歸...
味道：★★★★★
環境：★★★☆☆
服務：★★★★☆
衛生：★★★★☆
抵食：★★★★★
聚滿坊粥底火鍋私房菜
地址：香港 佐敦 文蔚街44號地舖
電話：+852 2388-2848 / 2388-7380
網址：
沒有留言:
張貼留言