【台北】忠誠牛肉麵：為碗麵，險送命

29 December 2015, Tuesday

夕陽無限好, 只是近晚餐...

體力勞動了一整個下午, 天色開始昏暗, 是時間放下工作... (耕田嗎?!!)

去邊度食晚飯好呢?!! 用下個腦先~~~ (好耐無啟動過)

呀!!! 醒起朋友推薦過忠誠牛肉麵, 近近地, 就去試試...

來到台灣, 最令人不適應的... 是交通!!! 行人路不是給人行的, 電單車可以隨時殺埋身, 仲要佢當自己係優先使用者... 以為綠公仔可以過馬路就真係死得, 左軚車綠公仔無行人的時候車可以照過呢樣我知, 日本同加拿大都係咁, 但係人地有人行緊時真係會係白線停車, 台灣呢度人已經過咗一半行到路中心, 私家車電單車照飆埋來, 身前身後都有車高速駛過, 總之要快過你, 人肉三文治隨時變肉醬...

On the way去忠誠牛肉麵, 行到警局過咗半條馬路, 就有架TAXI+電單車+一堆車勁快剷埋來, 我當時有不停左右望所以人無死... (未到戲肉)

搵到忠誠牛肉麵, 影完呢張相準備過班馬線... 係... 係班馬線, 無紅綠燈果種!!! 差D係人生最後1張相!!!



無咗紅綠燈, 即時警戒心低咗, 當時又比架垃圾車沿路跟住, 令我好不安(好怕垃圾車)... 望完左, 再望右好耐, 右邊D車過晒隔離線行(因為垃圾車停低咗), 搞到我一下子當咗單程路咁過, 右邊無車時唔記得再望左就行出去, 有架私家車零距離高速駛過, 只差1步, 我就上咗西天取經...

後面架電單車停低咗仲係度搖頭... 劫後餘生, 我真係覺得自己好慘, 我係有唔啱, 都唔見得你地啱晒囉!!! 呢度係斑馬線, 有行人準備過馬路其實你應該停車囉, 我都企咗係度好耐吓, 你無理由見唔到, 你仲加速, 明顯係爭路, 仲搖咩頭呀?!!

最後等到有台灣人過馬路我地先跟住過...


只Order了2碗細牛肉麵... Honey問仲要唔要其他小吃... 頭先差D命都無, 無晒心機, 燙青菜都唔想要...

牛肉麵(小) NT$140
-- 好抵食, 大大碗, 有5大舊牛肉(帶小小筋), 麵身夠Q彈, 蔥花勁香, 小小辣原來係麻辣, 無飲品買, 好擔心食唔到, 好彩成碗食完無嗆喉, 極速食完出去買飲品...


無咩好影, 夾起D麵影多1張... (平時絕對懶得做此動作)



係做得好好, 但始終紅燒太濃味, 我個人都係鍾意清湯多D...

味道：★★★☆☆
環境：★★☆☆☆
服務：★★★☆☆
衛生：★★★☆☆
抵食：★★★★☆

忠誠牛肉麵
地址：台北市 士林區 德行東路80號
電話：+886 2 2831-8157
網址：

---

離開忠誠牛肉麵, 見前面有7-11想行過去, 但又見對面有台式飲料, 見來台灣咁耐都未飲過珍珠奶茶, 膽粗粗就出事了...

係對面馬路望過來見幾骨子...


坐低咗就唔係果回事...


台灣包種茶(去冰,無糖) NT$30
巧克力珍珠奶茶(去冰,微糖) NT$40
-- 明明加埋NT$70, 唔知點解收NT$60... 早幾日睇憲憲玩食字路口, 個高雄高層話唔識包種茶令到佢地輸咗... 見到餐牌有, 無聊又試下, Honey話係青茶味, 無糖, 又凍, 佢飲唔慣, 飲咗2啖無再飲(個杯的10分1都無), 行到去家樂福已經肚痛要去Toilet, 之後成晚都唔舒服瞓唔到... 我都唔好得佢幾多, 杯飲品味道OK但珍珠好硬, 我飲咗9成, 夜晚有去Toilet, 都係胃唔舒服瞓唔到(2AM貼圖然後攤上床6AM起身寫文), 希望可以挨得過呢關唔好嘔...


飲完不適, 可能係水源唔乾淨, 又或者當我地水土不服... 總之, 自己身體唔夠強, 以後就唔飲係啦...

味道：★★★☆☆
環境：★★☆☆☆
服務：★★★☆☆
衛生：★★☆☆☆
抵食：★★★★☆

CoCo
地址：台北市 士林區 德行東路107號
電話：+886 2 2833-3959
網址：www.coco-tea.com