♫ 落雨不怕落雪也不怕
就算寒冷大風雪落下
能夠見到它
可以日日見到佢面
如何大風雪也不怕
我要我要找... ♫
咳咳咳咳... 來台灣5天了, 咳嗽還沒有好, 抗生素都食完了...
來台北12天了, 有11天的天氣都係好到不得之了, 大多是藍天白雲的...
為什麼?????? 偏偏... 偏偏... 偏偏今天我們租了10小時的包車出城遊玩, 狂風, 暴雨, 全都來熱烈歡迎!!! 天呀!!! 你到底要玩我玩到幾時?!! 之前東歐300年1遇的暴雨同日本311大地震你仲玩唔夠咩?!!
返到酒店先發現, 今日完全無攞過相機出來用, 但濕到滴水的手袋將濕氣滲進相機袋再滲進相機內, 部相機之後幾日都失靈, 開機影相唔識對焦, 影完唔識Display, 按Display又無反應, 影1張相要關機再開機再按Display先睇到張相影成點... 暈得!!! 今日先Day 5, 仲有7日要挨...
9:00AM 從捷運民權西路站出發...
今日租咗架5人車, 10小時, 司機加埋我地2個加埋Honey係香港過來Join我地的2位朋友(1位係昨天一齊參觀總統府, 另1位昨天先係FB召集)...
係台灣住了30年的香港人司機今日變身導遊, 唔止Plan晒全日行程, 仲不時介紹風景 : 「各位團友, 左邊係咩右邊係咩, 停車影相」... 台灣歷史政治經濟民生好玩好食乜都講得一餐... 無咗佢會少好多歡樂...
On the way係車上已經傾盆大雨... 大到心寒... 我地全部人都只係帶咗縮骨遮, 差不多去到十分的時候, 司機停車係超市門口, 等我地入去買雨衣...
今早的天氣預報係咁講嘅... 短暫陣雨... 應該都無咩問題吖... (選擇性睇自己想要的天氣)
10:00AM 就到達目的地, 包車真係好舒服嘅呢...
一路上交通都好暢通, 未有任何交通管制... 司機可以直接駛進十分老街旁的停泊位, 斜路都唔使行... (正常人都唔會揀今日咁正嘅天氣走出來玩)
時間尚早, 人不多, 只是大家都躲在簷篷下避雨, 營造有點擠的錯覺... (相片無PS, 部Sony Xperia Z1 手機自稱有防水功能都搞到好似風濕病發作咁, 不過出來的效果又幾自然)
指定動作... 來到十分老街唔企係火車路軌上影返張相又點算來過呀...
十分車站... 大雨到呢... 為咗影呢張相, 踩咗落個水氹度, 對波鞋同對襪都濕到唧得出水, 全日唧唧聲... 之後每次路過水氹大家都會發出預警, 我霸氣回應：「水氹已經再威脅唔到我喇」, 忍來哄堂大笑...
大雨到咁, 大家已經無Mood行入十分車站, 後來先知道原來入面係賣紀念品, 走寶添...
十分鐘唔使就遊覽完十分老街, 回航...
離開時見到有人放天燈... (咁大雨仲放?!! 淋熄咗升唔起唔多好意頭啫)... 其實我本人並不贊成放天燈, 造成山火的話, 就算無人命傷亡, 燒到棵樹破壞到大自然都唔好吖嘛...
「十分老街」行程閃電完成... 下一站... 「十分瀑布」...
我地好勁, 離開咗先發現自己無去到真正的「十分瀑布」... 天呀!!! 點會咁o架?!!
案發經過... 司機停車係上游比我地落... 穿過餐廳... 落石階 (天雨路滑, 好驚瀡滑梯囉)...
路過涼亭...
來到觀瀑吊橋... 一步一驚心... 要趁其他人的Wave未波及到我之前, 急急腳過咗去先...
安全到達... 剛巧有火車經過... 我影!!! (咔嚓)
回眸一望... 有人話 : 唓!!! 條瀑布咁細條?!! 我地屋企樓下條引水道都大過佢... (的而且確, 有人無講大話)
其實... 我係見到有人係吊橋下面再向入行, 不過唔知佢地點落去同埋去緊邊度... 加上好大雨, 根本無心機去考究... 只想快D走...
大家失望而回... 上返車... 司機追問之下, 我地先發現自己根本無去到真正嘅「十分瀑布」!!! 好灰, 灰爆, 點會咁o架?!!
(事隔半個月的今日, 寫Blog時上Google Search下, 謎底解開... 原來我地見到嘅係「眼鏡洞瀑布」!!!
話咁快, 我地閃電遊覽完十分, 火速向九份出發...
11:30AM 瑞芳區基山觀海亭!!!
司機係呢度放我地落車, 叫我地行下九份老街食下當地小吃, 1.5小時後係呢度接返我地...
我地首先係觀海亭入面影下外面山景, 狂風暴雨突然來襲, 雨水狠狠打到面上, 狂風吹到人都企唔穩, 全場幾十人同時尖叫...
重申 : 今日完全無攞過相機(Sony Cyber-shot DSC-RX100)出來用...
同行美少女不顧一切拎佢部新買的Sony Cyber-shot DSC-RX100 IV出來影相, 我只有祝福佢... 我舊年係Vancouver都做過同樣嘅傻事, 結果部相機年邁再染上風濕病, 機能一日差過一日...
借用Google Map街景, 比大家了解下我地當時有幾狼狽... 觀海亭係2層高有蓋建築物, 面積都唔細, 企係中心位置都比雨照頭淋, 可想而知有幾風大雨大... Honey係FB臨時召集的美少女只穿了吊帶背心, 猛叫救命好凍, 我地果斷地即Call司機, 話15分鐘後就要走人... 90分鐘的行程縮短為15分鐘, 勁, 哈...
九份老街同觀海亭只係幾步路距離...
地圖係10月尾寫Blog時Google Map嘅, 搵咗半粒鐘先知自己當時位置... 坐包車/跟團就有呢個問題, 都唔知自己去咗邊...
司機話九份老街好似香港的赤柱大街, 所言非虛... 驟眼睇, 好似有蓋的商店街, 實際上雨水不停打到身上, 所以大家都要繼續撐起雨傘... (無Mood逗留欣賞, 極速向前行)
美少女來過好多次, 其餘3人(包括我)都係第一次到台北市以外的地方, 美少女推薦食芋圓, 大家當然照跟...
芋圓豆花加薑汁, 芋圓紅豆湯 NT$50/碗
-- 我第1次食芋圓紅豆湯, 好好味, 不過我有點後悔, 淋到落湯雞咁, 應該要飲薑汁驅寒... 全身滴水中, 無心情去慢慢享受, 火速食完走人...
直行咗200米左右, 當要轉右的時候, 大家就決定回航... 就係呢個轉彎位, 買咗「食尚玩家」推薦的烤腸上車食... (怕被天花淋下來的受污染雨水污染烤腸, 我將佢地放入雨衣內用手係雨衣外勾住個膠袋行出去, 古裝戲味甚濃)
美少女唔知幾時買咗鹽酥菇, 回到車上與大家分享, 大家食得好滋味...
落山好塞車, 大量大型旅遊巴擁緊上山, 條路又窄, 得1條線, 仲要來回行車, 根本唔應該比大巴上...
金瓜石黃金瀑布... 雨勢稍為緩和, 大家先肯落車影張相...
金瓜石濂洞煉銅廠煙道... 沿山坡而建, 內置有換氣的風扇, 每座煙道約長達1公里... (攪低車窗拍照)
金瓜石水湳洞選煉廠遺址(十三層遺址)於1933年落成... 見證銅礦開採與煉製的歷史... (攪低車窗拍照)
12:55PM 金瓜石濂洞灣「陰陽海」... 黃鐵礦與藍海水交匯處... (攪低車窗拍照)
1:40PM 東北角三貂角燈塔...
建於民國24年, 坐落在臺灣最東的岬角上, 有「台灣的眼睛」之稱, 是北部地區唯一開放提供民眾參觀的燈塔...
一路上... 我以為我地好快會返酒店... 心裡面一路諗住返到酒店即刻沖個熱水涼, 又好驚第2日會發燒... 司機一路話去睇一眼個燈塔, 好快到, 快到用咗45分鐘... 到達後無人想落車... 最後美少女話大家用咗45分鐘來到, 無理由浪費呢45分鐘, 點都應該落車影返張相... 佢講得都好有道理, 結果大家最後都落咗車... 先去個Toilet(無皂液洗手)... 再入燈塔內參觀展覽室... 小虎話要同美少女的Minion公仔影返張合照...
其實燈塔入面一眼睇晒, 但係大家就賴死唔走, 行完1圈又1圈(1圈大概係7步成詩的距離), 原因係... 出面好凍, 風大雨大, 無人想出去呀!!!
離開時有堆人係呢個心心面前影完又影, 影完再影, 最後仲拎住把吹反咗嘅反骨遮做道具, 又幾有創意喎... (我呢張相係o係佢地換人之間的0.01秒影的)
終於回程...
三貂角燈塔 - 東北角暨宜蘭海岸國家風景區觀光資訊網
http://www.necoast-nsa.gov.tw/user/article.aspx?Lang=1&SNo=04000478
2:10PM 福隆火車站...
司機推介大家試試福隆火車站的便當, 可惜唔知咩原因封路, 唔比車入, 所以駛咗去福隆火車站前少少的位置停, 咁啱對面都有賣便當的店... 大家都落車去買便當, 只有我1個選擇留在車上, 對鞋濕唧唧超過4小時令到我心情堪入谷底... 好想除鞋呀!!!!!!
3個人落車, 只有美少女有買到福隆月台便當回來... Honey話睇完覺得我應該唔會食, 所以無買... 另外1位朋友睇完話"唔肚餓"... 美少女在車上不斷一邊食一邊話:"你地唔餓嘅咩?!! 攪到我好似好大食咁"... 情況都幾搞笑...
車子再向前行了幾分鐘便見到「核四」龍門核能發電廠...
之後經過間餐廳司機停車係門口話入面有龍蝦食, 好出名, 果刻有D心動想落車, 龍蝦喎, 賣飛佛... 同埋今朝早餐食得1塊麵包, 剛才係九份食得1條腸仔... 但我對腳強烈警告我唔好落車... 最後只有吞啖口水, 絕塵而去...
沿濱海公路回程, 有經過早前哄動一時的龍洞... 好多警車穿梭, 又有警員在岸邊影相, 應該影緊企到好出的岩石上釣漁的瘋漢...
當晚係酒店睇新聞先知, 之前1晚, 即10月8日, 深夜三名男性釣客遭瘋狗浪襲擊捲走失蹤, 地點正是龍洞(新北市貢寮區)... R.I.P.
http://www.cga.gov.tw/GipOpen/wSite/ct?xItem=93024&ctNode=7739&mp=9997/
何解話係岩石上釣漁的人是瘋漢?!! 以下是司機在濱海公路唔知咩位停車叫我地落車影下鮑魚場的照片... 大浪到呢... 相中4位港人已被風雨催殘至失去常性, 反正個身都200%濕晒, 狂風暴雨視作等閒, 雨傘雨衣全部唔用, 氣定神閒繞埋雙手影相...
上返車, 司機仲攪爛Gag, 話佢提供嘅係高級服務, 左手揸車, 右手拎支髮Gel出來比美少女, 真係笑到肚攣...
3:15PM 基隆廟口食街...
司機叫大家落車試下地道小食, 4位飽受殘酷風雨虐待至不成人形的港人, 已經唔肯再落車... 拉低車窗影張相就走...
司機講笑話, 以我地嘅速度, 1日已經可以環島遊晒成個台灣, 佢興致勃勃, 講到好似約實咗下次原班人馬再出發咁...
4:00PM 返到酒店
謝天謝地, 感動到想喊, 我終於可以沖熱水涼啦))))))
Bye Bye 啦~~~ 各位團友~~~ (又Bye唔晒嘅, 約咗Honey個朋友今晚一齊Dinner)
<<待續>>
台北總匯 : http://www.kenmerry.com/search/label/└15台灣「尋找他鄉」
沒有留言:
張貼留言