Ken & Merry 為食男女，遊走世界!!!: 台北「尋找他鄉」2015の老地方牛肉麵 X 隱世鼬鼠咖啡 X 沃田辦桌：挑選全台灣新鮮食材, 產地直送餐桌的合菜料理

31 August 2015, Monday

隔咗唔夠3個月, 又再次到訪台北...

3日2夜的行程, 離不開係天母區食食食... 呵呵呵呵~~~

我地幾勁呀, 住係士林夜市門口3日2夜, 都竟然無入過去, 連我自己都O咀...

起飛前一晚失眠無瞓過, 第一日好辛苦, 所以第一晚無行士林夜市, 諗住返酒店瞓夠第二晚先行士林夜市... 點知... 係酒店第一晚又係失眠, 第二日更加辛苦!!! 第二晚仲落雨!!! 唉... 返到酒店門口諗都唔諗就返酒店休息, 諗住第三日大把時間行, 點知原來士林夜市係5PM先開o架!!! 日間水靜鵝飛!!! 全部店都拉晒閘, OH NO... 我覺得自己好白癡呀!!!

到底呢幾日我地去過咩地方又食過咩呢? (著實不多)

好, 去片!!!

出門第一件事... 望天打掛!!! 睇睇香港同台北嘅Weather Forecast先... 嘩... 情況好惡劣吓喎!!! 玩3日啫, 使唔使兩邊都連續3日雷雨咁齊心呀?!!

首站...就當然係香港國際機場啦!!! 有免費Airport Limousine真係奇爽無比... 可惜今年只可以再用多一轉... 之後都唔知點算...

晨早流流, Traveler's Lounge條人龍長到不得之了... 食物真係好好好一般... 勝在免費同埋有蒸餾水比我食藥(預防Ear Block)...

是日奇景 : 有對強國couple, 女的留下手袋不知去向, 好耐都唔見人, 佢唔係諗住有人幫佢睇實呀? 男的用報紙由頭到腳鋪滿全身玩sleeping... 嘩!!! 露宿者之家呀呢度? 好核突囉!!! 影衰香港呀!!! 坐我對面的白人couple應該比我更早發現此事, 見佢鬼鬼竄竄用相機連腳架對準果個方向影咗好耐... 其實我都好想好想影佢相, 正所謂有圖有真相嘛, 不過角度唔就呀, 我偷影的話太明顯啦, 又驚個女的無啦啦走返來...

影登機閘口相是常識吧!!! 不過人懶無藥醫, 連facebook都無upload到, 連D死黨都唔知我去咗台北, 哈哈哈... 遲咗離開Traveler's Lounge, 閘口又鬼咁遠, 我懶勁唔坐無人駕駛列車, 結果跑到腳軟, 去到閘口登機中的人龍已經好長... 我地嘅行李無寄倉, 太遲上機無位擺的話就麻煩啦~

國泰呢個飛機餐飯盒一般般啦... 唔難食亦唔算得上好食... 今次用Mobile App劃位時見架機都好吉吓, 膽粗粗劃咗窗口卡啦位, 好好彩地, 無陌生人楔入o黎中間位, 奸計得逞, Yeah!!! 短途機無電影睇, 唯有重溫一下「10倍奉還」嘅《半澤直樹》~

航班循例Delay~ 係準時登機關門嘅喎, 不過成隻機停係度唔郁之嘛... 話10:00AM起飛, 結果12:25PM先落機... 落機時見唔到來接機的Airport Limousine司機, 急急腳走去買Unlimited Data Card先啦~ 上次中華電信無人排隊, 今次到遠傳無人排隊, 反正玩3日3間電訊商都係一樣價錢, 所以今次幫襯了遠傳... 親身試過後, 2間的市區接收力都不錯, 沒有太大問題... NT$300真係好抵玩...

會合了司機後, 直接去天母區同Honey的好友食Lunch... (落雨-ing)

朋友推薦的台灣牛肉麵店 -- 老地方牛肉麵!!! (飲料無限暢飲? 我好似咩都無飲過喎)

自助形式的涼拌菜放在雪櫃內, 供客人自取, 各式小菜 NT$35, 好抵食呀... 個豆角仲幾好味添呀...

半筋半肉冬粉 NT$160
-- 牛肉清湯湯底清甜, 冬粉軟Q, 牛肉好腍好入味, 整體不俗...

姨姨在現場包豬肉水餃中... NT$5/粒, 好抵呀!!! 見咁新鮮, 試了韭菜&高麗菜2種口味, 我個人比較喜歡韭菜...

店內沒有什麼裝修, 簡簡單單的速食店格局... 有電視睇... 因有其他客人正在進食, 姨姨又坐在旁邊的枱包緊水餃, 我唔敢影餐廳入面的環境相呀!!!

食物份量不多, 剛食過倒胃口的飛機餐不久, 來個輕食正合心意...

味道：★★☆☆☆
環境：★★☆☆☆
服務：★★☆☆☆
衛生：★★☆☆☆
抵食：★★★★☆

老地方牛肉麵
地址：臺北市　士林區　天母東路8巷21號
電話：+886 2 2877-2891
網址：www.facebook.com/%E8%80%81%E5%9C%B0%E6%96%B9%E7%89%9B%E8%82%89%E9%BA%B5-569185719884671/timeline/

吃過午餐, 朋友誠邀我地到佢試業中的隱世咖啡店參觀...

唔知咁算唔算「試食邀請」(Blogger Tasting Invitation)呢? 哈哈哈...

叫得「隱世」, 就緊係唔會咁易比你搵到啦~~~ 因為個門口都未整好!!! 嘩咔咔咔 XD

就算裝修完Grand Opening埋, 都唔係話你隨便行入去就有得飲, 要預約o架!!!

步入位於天母東路的店子內, 首先是一條長長的走廊, 神秘大門背後隱藏的, 是充滿濃厚古典歐陸風格的咖啡密室!!! 好好好靚呀!!! 我同Honey都不禁"嘩"咗一聲~~~

店內只有6個座位, 活像皇室貴冑的交誼場所, 置身其中, 讓人沾上一點點顯赫矜貴的氣質... 由於裝修仍在微調中, 暫時不便公開太多照片唷~~~ 等我下次有機會去台北再影過啦~~~

朋友的咖啡店賣的絕非一般的咖啡... 而是來自越南的鼬鼠咖啡 (Weasel Coffee)!!!

咖啡杯的耳仔係鍍金同鍍銀的鼬鼠, 杯底有Serial Number, 飲完會洗返乾淨比客人帶回家留念...

咖啡農為了貓屎咖啡豆而困住鼬鼠在籠中飼養, 忍起愛護動物人士關注, 認為做法不人道...

朋友所選用的越南咖啡農則買了一個山頭, 進行圈養, 鼬鼠可以自由自在通行跑, 咖啡農會定時派人去收集鼬鼠排出的咖啡豆, 所以成本會比一般鼬鼠咖啡高...

除了咖啡豆矜貴, 咖啡師亦非同小可, 是咖啡師考核的評判呀, WoW... 好勁呀!!!

咖啡師細心地沖泡及講解, 第一泡口感很順滑, 有朱古力同焦糖味... 第二泡甘味重, 只喝半杯, 剩餘的會與第三泡混合, 微弱的酸味, 順喉回甘... 想不到一壺咖啡會有3重享受, 芷菁mode : 「我今日真係學到好多o野」!!!

可以飲到咁好的咖啡, 好感動呀!!!

見識過如此驚為天人的咖啡, 跟Honey去2個地方辦點事, 才到酒店check-in... 未夠鐘食晚飯, 見酒店房都幾寬敞, 邀請朋友上來飲杯茶... 稍後一同前往朋友的心水食店, 位於天母區的沃田辦桌...

沃田辦桌位於沃田旅店內, 由302家農會和40家漁會所共同支持成立, 挑選全台灣342家農漁會的食材, 產地直送到餐桌, 食材新鮮不在話下, 每天烹調不同的晚餐, 無需點菜, 品嚐到新鮮、健康、習各地風土特色的合菜料理...