荔園 Super Summer 2015 : 同Right Persons去才是王道

*** 足足2個月無開屋企部Laptop, 爆忙... 次要係學車, 主要係學微型黏土花(晚晚做功課做到2點幾) ***

6 July 2015, Monday

Happy Summer Take 1~~~ 寫咗Take 2先寫Take 1, 呢個係咩世界呀? 因為Take 2少相d嘛, 嘩咔咔咔~~~

姪女參加暑假前課外活動, 坐唔到校巴返屋企... 大姑媽話可以由元朗出發去接佢, 佢話好遠驚大姑媽辛苦, 要求三姑媽由鰂魚涌出發去大圍接放學, hmm... 唔該你上吓通識科先講啦...

(咁啱接佢果日佢八達通漏咗係屋企, 我捉咗佢去買單程車飛, 叫佢逐個車站按下, 睇下由大圍去唔同車站要幾錢, 當然越貴越遠啦...)

姪女錄音whatsapp過來... "返少日工啦"... "我好鐘意XX姑媽"... okay okay, 我舉白旗投降!!!

大姑媽話搵日一家人一齊去荔園玩, 我話不如就我去接放學果日啦... 原本大家唔係好得閒, 唔知點解拖拖吓個個都出晒來...




接完放學, 坐火車去旺角會合2個姑媽同2個表姐去鴻星飲特價下午茶, 路過商場的擺設, 有人唔肯走, 係都要影相, 叫佢飲完茶落來先影都唔肯...


姪女阿媽帶埋細囝出來會合我地, 呢樣我地一早知, 之但係... 點解我地細佬都會一齊出來, 連佢自己個女都唔知!!! 咦? 呢個爸爸咁得閒同我地去荔園, 點解自己唔去大圍接放學嘅?

原來有人而家好鐘意飲茶... 幼稚園升小學果年暑假同佢拍拖去街街, 話帶佢去飲茶死都唔肯, 可能果時未知咩叫飲茶...


差不多4點走, 離開時用咗好多時間先擺脫到Minions陣, 好可怕...





小朋友唔行得快, 好不容易, 5點終於去到中環海濱的「臨時」荔園... 免費入場!!! 係, 免費!!! 遊戲逐樣收錢...


4姐弟好有共識地入場前係門口影張大合照留念先, 但弟婦一馬當先衝咗入去 (又或者係比2隻失控的瘋馬扯咗入去), 打電話叫佢出返來影相都唔情願, 最後不敵大眾要求...

搵路人甲影相的結果係... 荔園個招牌得下半部少少, 完全影唔到個城堡嘅外貌... 但總好過無嘅...


門口有人咁高的地圖, 好可愛~ 用了2個小時, 只接觸了中間3份1就離開, 右邊完全無去過, 我地太大堆人, 一齊行動, 驚走散, 同埋大家一齊玩攤位, 好難走得遠... 弟婦就勁, 自己帶咗個囝去玩踫踫車...


讀緊小學同幼稚園的姪仔姪女, 一入去就被「假」大象同「假」香蕉吸引, 話要「餵」... 讀緊大學同中學的姨娚女當然表示無興趣...

當我同讀緊中學的姨娚女講, 我好似佢地咁細果陣, 隻大象「天奴」同香蕉都係真嘅時候, 我都有餵過, 佢囧住問"真o架??? (￣皿￣///)", 哈哈哈, 反應勁過我話見過外星人, 笑屎我...


荔園遊樂場, I'm here!!!


我地玩咩都係比1個錢, 一大堆粉絲(4家9口)圍觀+「依牙鬆槓」, 唔中禮物都好開心...


呢個MJ由大姐出發, 諗住實食無黐牙, 當大家以為中獎嘅時候仲一齊歡呼尖叫, 之後被職員一盆冷水淋醒後, 成班人傻笑住轉身走... 唔中獎+低B咗, 但又覺得好開心...



咁又唔係樣樣都唔中獎嘅, 呢個懷舊遊戲, 20蚊比4個乒乓波你, 4個小朋友每人分到1個, 已經抵到無朋友, 諗住都剩係享受過程, 點知大家合作贏咗第1個公仔, 仲唔爭喎, 大果2個仲讓咗個公仔比個細嘅, 睇到我老懷安慰, 雖然幾個都唔係我生嘅, 哈哈...



呢個夾波子, 我同2姊都出師不利, 最後由出名揸筷子唔掂的大學生出馬, 竟然得米, Unbelievable...



大家越戰越勇, 就滯留於攤位遊戲之間, 無去其他地區...

2個小朋友嚷住話要玩全場最貴的遊戲... 揸住一大袋代幣的姑媽(即係我)就跟住佢地3母子去啦... 去到佢地阿媽每人放4個代幣係手仔, 就話"你地自己去排隊啦, 阿媽去玩啦"...

吓))))))))) 咁都得???

結果姑媽(即係我)留低, 企係鐵欄外, 2個細嘅自己排隊... 讀緊幼稚園的姪仔望住絕塵遠去的媽媽, 開始悲鳴, 好細聲的自言自語 : 媽媽, 媽媽, ... 當我以為佢準備喊嘅時候, 佢又拎轉頭望吓條滑梯... 結果... 滑梯勝!!! 嘩咔咔咔...

40蚊玩5分鐘, 聽落好貴, 但好Lucky地呢Round只得3個小朋友, 3個人有傾有講仲等埋一齊Sir落去, 大笑尖叫足5分鐘, 我拍Video都拍到唔拍, 仲開始不耐煩, 心諗 : 咁耐o架, 玩完未呀, 又話5分鐘, 仲有幾耐玩o架... 2個小朋友開心到癲, 80蚊我覺得值得囉... 我地走時下一Round排咗勁多遊客, 中外都有, 仲有大人添呀, 如果佢地玩呢Round我就擔心啦...


再玩多幾個攤位遊戲...


剩返1個代幣... 得經典掟階磚可以玩... 小時候拎到綠箭香口膠已開心到飛起...


歡樂的時光過得特別快, 又係時候講拜拜...


一行9人玩了個半鐘, 用了500蚊, 細佬話抵過去海洋公園...

其實我覺得帶住咩心情去、同咩人去先係最重要, 我地係4姐弟小學時一齊去荔園玩, 今日一齊同遊舊地, 4姐弟尋回昔日的童年回憶, 小朋友就建立將來的童年回憶, 氣氛好到不得了, 單獨去的話應該個Mood會無咁好囉...

荔園旁的另一遊樂設施... 摩天輪... 影吓好啦...


之後大家互相whatsapp今日影的相... 原來弟婦帶住姪仔分頭行事其間, 玩咗好多正o野...



晚飯於奧海城... 當然要同今日的戰利品影返張大合照...



第2朝2姊翻開舊相簿, 將舊相片影了whatsapp過來... 佢話係荔園執笠前專程帶阿女去... 相中B而家已經讀緊大學... 勁...




「荔園Super Summer 2015」

    日期: 2015年6月26日至9月3日
    時間: 11am-11pm
    地點: 中環龍和道9號 (海濱活動空間, 免費入場)

~~~ 以下資料來源 : 維基百科 ~~~

荔園遊樂場（英文：Lai Chi Kok Amusement Park 現稱Lai Yuen，1949年4月16日—1997年3月31日）原名「荔枝園」，簡稱「荔園」，開業時是香港規模最大型的遊樂場，最初設有三個山泉游泳池，水源經兩重沙漏消毒，並有濱海泳場。1961年邱德根購入荔園並增設「宋城」景點，開業初期成人小童入場費皆為港幣5角。在1997年3月31日晚上，荔園與「宋城」一同結業。


荔園總面積達160萬平方呎。早期設施包括各類劇場、機動遊戲、各式各樣的攤位遊戲、水上遊戲等。內設的機動遊戲有摩天輪、碰碰車、旋轉木馬、哈哈鏡、搖搖船、咖啡杯、小飛象、八爪魚、過山飛龍、恐龍屋、鬼屋等，更曾有香港唯一的真雪溜冰場；還有蒙眼飛刀表演等，吸引不少觀眾入場。當中最吸引的是「豔舞（脫衣舞）」表演及稱作"科學美人"的色情表演，但因後來被批評有傷風化，所以在約60至70年代就取消了。


1952年10月25日（星期六）荔園在「粵劇場」後花園的山溪旁開設面積約10萬平方呎的動物園，初期從越南共和國（南越）進口大部份動物，最早期展出：虎貓、四頭金錢豹、馬來熊、三頭亞洲黑熊、南美洲出產的羢羊、白猿、黑麝貓、鼬鼠、猴，並聘請一位法國國籍馴獸師來管理。曾養有很多不同種類的野生動物，分別有熊狸、獼猴、山羊、印度虎、揚子鱷、水鳥、獅子、黑豹、禿鷲、綠孔雀、美洲獅、後期運來的雙峰駱駝與長頸鹿。

荔園動物園有一頭象被名為「Tino（天奴）」，牠是一頭緬甸大象，於1952年隨沈常福馬戲團來港，一直生活在面積不到500平方呢的獸籠內，過着跪地討食的辛酸情況。於1989年2月因不幸患上急性肺炎而人道毀滅，後期運往將軍澳垃圾堆填區埋葬。