PizzaExpress : 降價降Grade

6 August 2015, Thursday













唔係日日學車都好似今日咁好天o架!!! 我第3日做駕駛者就落傾盆大雨啦!!!


放咗學個人真係散晒, 歸心似箭, 坐shuttle bus去cwb之後一般都即刻轉mtr返屋企...

不過咁, 攰還攰, 返屋企之前點都要食埋晚餐先, 唔係嘅, 返到屋企食風咩?!!

十幾年前開始幫襯太古城PizzaExpress, 以前4百幾蚊1個2人晚餐, 加埋一都5百幾, 好味到暈, 飽到嘔, 過時過節先會去慶祝一番... 果時店員清一色只懂英語... 轉載2007年2月14日的相片, 哈哈!!!



近年開分店開到濫晒, 而家2百幾蚊1個2人餐, 份量係以前的一半, 味道走晒樣, 以前麵包球同Tiramisu好味到喊, 而家...唉...

明明太古有分店, 唔知點解咁近又再開多1間... 呢間新分店都開咗好多個月吓, 基於隔離飯香的理由, 反而無咩興趣去試... 今日悶悶地又戚起條根去試...

座椅太高, 我腳短, 吊住腳坐, 唔多舒服... 太古城分店不知坐得幾舒服...

餐廳太大枱櫈太多燈光太猛景觀太開揚, 無咗太古城分店果份溫暖小店的感覺...




以上是2007年2人餐份量, 以下是2015年2人餐份量... 差天共地...

唯一令我Appreciated的... 餐飲是支裝可樂!!! 嘩咔咔咔!!! 來多幾次肯定肥C!!!


個醬同麵包球味道唔多夾, 而且難以蘸在麵包球上, 搞到要分開食, 無癮...


芝士碎到呢... 2007年張相入面D芝士大過手掌... 紅菜頭同菠菜都好新鮮, 呢樣抵讚...


Pizza餡料份量少, 味道不錯...


早前申請了儲分卡, 同E5食咗一次晚餐就有30蚊可以今次扣...

雖然同以前比係差咗好多, 但做人終歸要面對現實, 相同價錢, 今時今日, 已經好食過Pizza乞好多...


是次每人消費約$140元
味道： 3 環境： 3 服務：3 衛生： 4 抵食： 4
###
地址 : 鰂魚涌康山道1號康怡廣場地下G2號舖
電話 : 2598 0823