caffè HABITŪ the table : 掃走7月的緊張與不安

30 July 2015, Thursday

今年7月係「爆忙月」！

人生第一次坐上司機位，雙手捉實軚盤，緊張過結婚果日。

有人唔知死，本身已要上太極班又有太極表演，而家學埋車，仲走去報埋微型黏土班，晚晚整花整到２點幾，仲邊有精神學車呀？咁都仲未夠，再去埋荔園，同阿姐ss飲茶，仲要天灸兼同friends去食buffet... (應該未數晒)

結果... 有人完全無時間去健身室，之前減落的１５磅，回升得快過直昇機，報應呀！

香港島駕駛學院有穿梭巴士去ＣＷＢ，所以呢個７月同８月，經常匆匆途經ＣＷＢ。


天氣熱勁出汗，學車緊張到爆又勁出汗，穿梭巴士遲到搞到我遲咗上堂心跳加速更是汗流浹背！個人勁虛！

唔提早食午餐會導致血糖不足，再加上睡眠不足，學車時更混混沌沌，暈得一陣陣！為免影響學業，對症下藥，之後每次學車前只好急急忙忙食個快餐，又難食又趕頭趕命，再加上學習上的挫折，腸胃差到爆，條腸抽下抽下抽足２個月！

今日中午上完實習堂，晚上有理論課，中間幾粒鐘都唔知做咩好，附近興建ＭＴＲ中，人路車路都混亂不堪，根本不適宜四處走，最後決定坐穿梭巴士返出ＣＷＢ食過下午茶／早飯，再坐穿梭巴士返入香港仔，雖然１個鐘頭先有１班車。


想舒舒服服打發時間，最好緊係去誠品啦～

行咗一陣，見到HABITŪ，正！今日就食佢啦～ 塊黑板上面Ｄ粉筆畫好可愛呀！好開心係香港都可以見到有人支持呢種藝術。




汽水 $22，熱情果檸檬茶 $40
－有人好鍾意飲忌廉，去到世界各地都要飲，忌廉乜乜乜。


巴馬火腿火箭菜薄餅 $128
－火箭菜新鮮，餅皮柔韌，好ＯＫ。


焦糖蜜棗香蕉布甸 $70
－好好好味呀！我明明最憎所有香蕉味食物o架喎！醬汁內隱藏了焦糖脆脆同蜜棗肉，加埋燒過嘅香蕉，暖暖軟軟嘅蛋糕，口感同味覺都好豐富。


埋單時Honey話抵... 嘩？２個人２百幾蚊食個下午茶都話抵？事緣係咁嘅... 話說早幾日... 係「ＰＩＺＺＡ乞」２個垃圾下午茶餐都接近２百蚊，一字型長枱十幾Ｐａｉｒ人打對面坐，座位迫過大Ｘ樂搭枱，音樂開到拆天咁，完全貼錢買難受。

食物好味, 環境Relax, 服務員又貼心, 行出門口直頭有洗滌身心嘅感覺（大前提係今個月太辛勞太自我虐待），Honey同我已經愛上咗呢度。


是次每人消費約$140元
味道： 4 環境： 4 服務：4 衛生： 4 抵食： 4
###
地址 : 銅鑼灣軒尼詩道500號希慎廣場8樓L804號舖
電話 : 3543 1313