Green @ Hotel ICON : Buffet本愉快，何處惹蛋糕

24 May 2015, Saturday

朋友ＤＤ睇咗網上講Green新推出週末Brunch Semi-Buffet的食評，興緻勃勃咁出盡力約齊人馬去擦餐勁，可惜去到卻未如食評所講可以任食蛋糕櫃內的精美蛋糕，加上職員未有道歉並只懂重複說「每人限１件」，導致佢好失望。

朋友月初找我一起去食週末Brunch Semi-Buffet時，我多番婉拒，理由是自己正在減肥中（舊年６月至今），但佢盛意拳拳說等足我１個月，唔想掃佢興，只好兩脇插刀。


一直都知Hotel ICON所在位置，但點行入去就真係唔知。坐過海巴過來，行咗好大個圈先知酒店正門係呢度。之前落咗好多日暴雨，好彩今日落車時無再落，心情也不禁輕鬆起來，呢個可能係我等陣無據理力爭的原因。



嘩！部Lift入面黑麻麻嘅？伸手不見五指，好驚呀！


Brunch Semi-Buffet供應時間由11:45AM至2:30PM，11:20AM未夠去到，人影都唔多隻，好彩有位坐，坐多一陣貓兄都到啦，吹咗一陣水，見其他人開始去Reception度登記，我地又去登記定先~


Reception話搵唔到我地Booking，負責訂枱的ＤＤ又唔聽電話，搞咗好耐，Reception話會唔會係訂咗樓下，樓下都有Buffet... 係喎，一言驚醒夢中人（尋晚３點先瞓）。朋友講明係半自助餐，有提過Green，唔知點解，咁都會去錯The Market，哈哈，門口相都影埋，The Market太深入民心喇～


今次搵啱啦啩。早到早運桔，時間啱啱好，職員正安排客人入座。


日光浴＋青草牆，是店名的由來吧。半圓梳化好睇唔好坐，坐中間果個好慘，好難出去拎食物，我上次係Yamm中過蕉啦~


我地被安排坐係餐廳最入的位置，貼著落地玻璃，係正Buffet枱側邊，唔使離開座位伸隻手出去就攞到Ham食（我地當然唔會咁核突啦）。注意：張Buffet枱就係得相入面Show出來呢１張枱嘅咋，唔好諗多咗呀。


餐廳剛讓客人入座不久，人不多，影相最佳時間。






行了一圈，放下相機準備開動引擎，發起人ＤＤ同龍媽終於來了，ＤＤ話蛋糕櫃內的蛋糕可以任取，$58/件，食幾件已回本。真的嗎？沒想過Semi-Buffet會包埋蛋糕櫃內的蛋糕，仲可以任吃咁抵？！我地2個慌死比人拎晒，第一時間出去瘋搶，得到的答案竟是～「每人限１件」！天呀！


ＤＤ是為此「任食蛋糕」而來，出心出力搵齊班Friends來到，卻「每人限１件」？不甘受騙，跟職員理論食評話任食，職員未有道歉，只懂重複又重複再重複地說「每人限１件」，ＤＤ表示非常失望，職員像木人巷錄音機，繼續播音「每人限１件」，其實篇博文我事前無睇過，因要去台灣旅行好忙無時間，反正ＤＤ同我講咗人均消費是多少，我付得起便是了。
我沒有任何爭取的打算，只在旁大聲說：「果Ｄ係免費來試食寫文，緊係任食啦」，哈，好無聊，只為說比其他客人聽，職員仍是活在木人巷，ＤＤ無奈下選了１件。
回家後抽時間看看ＤＤ給我的Link，真係標明「餅櫃的蛋糕任點任食，吃六件都回本」，ＤＤ今次真係傷了荷包又傷了心。

幾氣頂都好，比咗錢無理由唔食，係時候收拾心情，開動引擎。

~ Round 1 ~

風乾火腿有２款，右下角果款係職員即切，色澤深紅，油脂不多，鹹鮮中略帶甘香，主攻呢款。 左下角果款係傳統Cold Cut，色澤淡紅，不鹹不鮮不甘不香，可以不理。伴著它的蜜瓜爽脆香甜，好有質數。羊奶芝士膻香軟綿，竟伴有整棵的無花果乾，讚。法式鴨肝醬多士甘香，豐腴度及膻味中規中距。炭燒彩椒茄子非常精彩，甜中帶酸，酸中又帶鹹，Encore。挪威煙三文魚油香不足，焗菠菜煙肉芝士撻水準一般。


~ Round 2 ~

七彩繽紛的Macaroon誰可抗拒？味道選擇多，餅皮夠乾夠脆，推介芝麻味及士多啤梨味。朱古力批味道濃郁，批身外脆內軟，還不錯。士多啤梨荔枝撻有點奇怪，只有１粒荔枝肉，沒有荔枝味，士多啤梨多得傾瀉是最大賣點。咖啡千層蛋糕咖啡味香濃無比，一層脆米一層酥皮再加上面層的咖啡醬，小小一口很吊胃口。


Cream Brulee內要有雲呢嗱籽算是一種基本要求吧，布丁很滑溜，焦糖面再硬一點脆一點會更好。


~ Round 3 ~

見ＤＤ一路食麵包一路讚好味又有蘋果肉，我又拎返個黑白無常試試。酥皮每一層都做得好薄，味道不錯，只是略甜。香草海鮮沙律完全無味，不想浪費食物，只好問經理拎沙律醋，經理都幾好人，問除咗醋仲要唔要橄欖油，我地話唔使，經理拎咗碟意大利黑醋（Balsamic Vinegar）比我地，蘸海鮮沙律吃不是太夾但還可以。繼續攻即切風乾火腿。


見大家都勁讚海鮮周打湯，我又試返碗先。味道真係超讚，勁Creamy，真係想飲多幾碗！

聽貓兄說，芝麻菜完全無味。


已經不知第幾Round了。

Waitress問我地要咩果汁，我地以為Semi-Buffet包果汁或茶，３位淑女要了果汁，我要了熱檸茶，點知尾聲又來問要咩咖啡／茶，搞到我要掉返轉頭，食飽晒先飲果汁。生果有Refill但好單薄，尾聲係無晒士多啤梨、特大藍莓、超甜菠蘿同西瓜，建議大家早點取定放係位慢慢嘆。


食食吓，有Waitress捧著一盤榴槤布丁逐枱問要唔要試下，個樣真係堅唔得，但咬一啖，嘩，我暈啦～合埋眼無論口感同味道都真係好似食緊「濕包」咁，重口味到呢，唔係好甜但係好香，咬到脆脆餅底至會清醒過來，天呀，好好好味呀，１粒太少喇！


11:45AM入座，1:10PM先上主菜，足足個半鐘，耐到無朋友！ 好彩，食Semi-buffet的頭盤及甜品都有夠忙。Main Course 4選1，龍蝦怪見到有龍蝦，話知你咩膽固醇著晒紅燈吖，一樣照食，過２日先去醫生度懺悔。龍蝦肉緊緻有彈性，鮮中帶鹹，味道不俗，幹掉半隻龍蝦即刻覺得幾抵食。墨魚汁好稀唔Creamy，意大利米又唔夠軟腍，食２啖無食，免得浪費Quota。伴碟的芝麻菜終於有芝麻菜強烈的味道。


「每人限１件」的蛋糕櫃蛋糕... 賣相精美，味道一絕（除咗士多啤梨欖油蛋糕），如果可以任食，一定食返１０件８件。

士多啤梨欖油蛋糕－１個讚！４件之中，賣相最可愛，味覺上最無沖擊，味道不差，只是其他３件太出色。
綠茶朱古力蛋糕－３個讚！賣相第２精美，味覺沖擊度中等，軟綿的綠茶海綿蛋糕、甘苦的抺茶忌廉、濃甜的朱古力忌廉，加起來已經很強，每嚐一口也夾雜著脆米的沖擊，口感豐富，味道多變相容。
榴槤芝士蛋糕－６個讚！榴槤精靈假扮純情少女，披著白色婚妙帶上金箔做的皇冠，賣相騙得到人，只要輕輕咬一口，包保你打著心裡面“嘩”出來，果股濃烈的氣味，濕淋淋的口感，OMG，點可以做到真的濕包一樣，可以切開１０份８份慢慢嗒真Ｄ，好襟食。



海鹽焦糖蛋糕－９個讚！成班友不斷對呢件Cake評頭品足，寫食評咁，表層都係甜無咩特別，內裡咬到果仁脆脆先係亮點，話咩好多層次咁話。其實個樣完本無咩特別，但加咗小禮帽又幾可愛，味道同口感都似“樂＋杏仁糖”，但佢脆Ｄ輕Ｄ，的確係一絕，一致好評。


南瓜湯稀溜溜，味道不差，被美味的海鮮周打湯狠狠比下去。


食物質數中上，用料不俗，貴精不貴多。客人有禮，沒有出現搶清光情況，大家的交談聲浪亦低，營造了寧靜悠閒的氣氛。

服務方面，收碟明顯慢，經理態度ＯＫ，服務員可能是實習學生，與客人溝通不多，有進步空間。

飯後逛一會DFS，再返回The Market門外的梳化坐下傾下計，一傾就７點幾，好似仲有講不盡的話題，仲約定下次再去擦餐勁。

活在平行時空，左手減肥，右手暴肥（Buffet），Work嗎?

今餐食得太飽，之後２４小時都無進食。


是次每人消費約 $360 元
味道： 4 環境： 4 服務： 3 衛生： 4 抵食：2
###
地址 : 尖沙咀科學館道17號唯港薈地下
電話 : 3400 1388