[新店速遞] 九重鮮 : 韓國9層「桑拿海鮮」蒸氣鍋登陸大坑

5 May 2015, Tuesday

近期在城中討論得最熱哄哄的，非韓國九層海鮮鍋莫屬。其中一間近日正式登陸高檔食店雲集的大坑浣紗街，令我雀躍萬分！

我對大坑是有種莫名的情意結，一聽到大坑有新店就會好興奮想去即刻試，原因是夠膽去大坑浣紗街開餐廳的，一定是對自己出品有百分之一百的信心。

韜老友食家的光，可以「率先試」其友人開設的「九重鮮」（試食邀請），門口的招牌還未貼上呢。


餐廳內部簡潔時尚，銀光閃閃，韓氣十足。枱與枱之間相距甚遠，不點也不擠迫。


全港獨家「桑拿海鮮」蒸氣鍋！鍋底有幾個小孔噴出高溫蒸氣，但海鮮粥的水卻不會流走，好神奇呀！唔講唔知，原來韓國同香港現有的9層海鮮鍋都係係廚房入面蒸到８成熟先拿出來，放係客人面繼續煮熟，一般來講到客人放入口時海鮮已經過熟。

九重鮮知道香港人出名嘴刁，若跟著別人那一套去做，必定留不住客人的心，所以九重鮮的海鮮是１００％生鮮放到客人面前，由生鮮煮成熟鮮，時間盡在客人掌握之中。要做到這一點，「桑拿海鮮」蒸氣鍋是關鍵，沒有它的猛烈蒸氣，是不會成事的。


鍋底是海鮮粥，粥底有豬手、蜆、白蘿蔔、韓式年糕、白米，材料會因應季節而轉變，不用加水，蒸海鮮的蒸氣加埋海鮮的精華，一點一滴匯聚在鍋底，真正生米煮成熟粥。


蓋上蒸架，靜候主角出場。


餐牌還在趕印中，初步定價套餐B價錢HK$388/位 (2位起)，套餐包括：前菜、9層海鮮鍋、飲品。



登登登登... 登登登登... 有請... 9層鮮登場！嘩嘩嘩嘩嘩嘩嘩嘩嘩嘩！霸氣迫人的陣容，自問身形是大碼，整個人也被其淹沒了。


由上而下解究令眾人驚嘆的韓國9層「桑拿海鮮」蒸氣鍋，每一層都是讓人充滿期待的驚喜。各種海鮮放在那一層，主要是以海鮮需要的烹調時間而決定，放置最高的３職，是最快熟的。

第一層：蟶子皇和象拔蚌仔



２者皆超級巨型，你看我的地盤粗活手指，拼埋去變成小學生的手指。


第二層：大蚌和廣島蠔



第三層：新鮮花尾龍躉、海蝦、粟米



第四層：元貝



第五層：北寄貝、白蘿蔔


第六層：青口、蜆


第七層：蕃薯、南瓜


第八層：沙巴肉蟹、翡翠螺、鮑魚


第九層：韓式豬手粥

開餐前先來一張何其壯觀的海解大合照吧！


想即刻食？No Way！Ladies & Gentlemen，請乖乖苦候１５分鐘，雖然蒸氣鍋不斷溢出鮮味，但衛生署廣告都有講啦，食物要徹底煮熟先至好食，暫時吞住口水止住咳先。

店主有見及此，請我地食刺身分散下注意力先。


噹，噹，噹，噹，夠鐘啦，食得啦！

咪住，比個小貼士大家先，由於海鮮鍋是食完一層先到下層，時間掌握是非常重要，食得太快會唔熟，食得太慢又會韌，所以大家要跟足指示做呀，相機食先固然重要，但如果遇到１碟食物要影幾百個角度的朋友，你真係要提點一下，速戰速決才是王道。

WoW！食得喇，食得喇，好開心呀！一層一層來，唔好心急吖，但係要快！


老實講，蟶子皇同象拔蚌仔都太大隻啦，感覺太唔真實啦，要夾到落自己隻碗先有果份切切實實的佔有感。新鮮的海鮮最好的烹調方法是蒸，上盛的海鮮最好的調味是＂無＂。裸調的蟶子皇同象拔蚌仔入口鮮味爆爆爆燈，彈牙得來又唔韌，一粒沙都無，匹敵蒲台島X記海鮮。


大蚌和廣島蠔都係裸吃（零調味），廣島蠔同大蚌除咗鮮嫩彈牙，時間掌握得剛好，如影相時間再短一點更完美，廣島蠔肉厚肥美，鮮甜富彈性，帶點微腥，大蚌相對前３者鮮甜度較輕，肉質仍然是彈得無話可說。



老實講，最大驚喜的當然係最頂果２層零調味巨型海鮮，由呢層開始就要細水長流。

新鮮花尾龍躉要蘸點豉油來吃，都怪我地影相影太耐，肉質有點過老，大家要小心睇時間。海蝦扎實鮮甜。粟米份人最收收埋埋，外表純樸，一咬狂噴汁噴到老友食家手上，一次又一次，我最後要坐側身食，唔只多汁，仲甜到漏，好正。


好多蜆呀，肉質鮮甜有彈性，Yummy！大家好禮讓，慢慢嘆，終於等埋最後幾粒蜆開口，結果...


元貝肉質過老了，大家開始意識到，唔可以再影相影咁耐啦，同埋要食快少少，剛才食蜆嘆慢板出事啦！


坦白講，我未見過有殼的北寄貝，肥大肉厚，鮮甜彈牙，除咗正，唔知仲可以講咩。白蘿蔔太厚身，未夠軟腍，我地將佢再放低Ｄ蒸多一陣，嘆「桑拿海鮮」蒸氣鍋就有呢個好處，唔鍾意口感太腍的朋友，大可以先食，鍾意腍嘅放低幾層蒸耐Ｄ又得。


戲肉又來，成晚無時停。嘩嘩嘩，又鮑魚又肉蟹，我唔講住啦。全部海鮮事前無調味，估唔到鮑魚清蒸都咁好味，好新鮮又軟又彈，我蘸咗少少豉油咋，已經好正。沙巴肉蟹啖啖肉好扎實，鮮甜又滑嫩。翡翠螺平時Buffet冷盤我唔敢食，又腥又容易胃炎，今晚破格一試，完全無腥味，鮮度同彈性略遜鮑魚，但仍很美味。


齋食海鮮已經夠到條腸就來爆開，再加埋超甜蕃薯同南瓜，食咗一半投降，決定每樣留少少來撈粥食。


肴了個半鐘的海鮮豬手粥，稀爛爛的剛好不會太飽滯，非一般的鹹鮮，剛才所有海鮮的精華都一點一滴匯聚粥底之中，油份稍多，店主表示會多加改良。


帶鹹的粥底，混入剛才吃剩的蕃薯同南瓜，甜味中和了鹹味，意外地將鮮味提升，好好味呀！強烈建議大家一試，２碗粥完全唔同味。


臨走時發現坐椅蓋可揭起放下整個手袋，無聊的我又要去搞搞震一番。


從未如此滿足過，一晚食勻咁多海鮮，隻隻新鮮，肥大肉厚，淨食海鮮都飽，已盤算帶埋家姐細佬來擦多一餐。

店主話遲Ｄ會供應埋阿拉斯加蟹同埋韓式雪花冰，聽說刨冰機亦是用上最高規格，口感特別幼滑。好令人期待。

是次每人消費約 N/A 元
味道： 4 環境： 4 服務： 4 衛生： 4 抵食：5
###
地址 : 香港 大坑 浣紗街1-5號 浣紗閣 1樓
電話 : 2321 8998