一杯鐵板燒居酒屋 teppan-yakitori : 沒有最差的服務, 只有...

4 March 2015, Wednesday

春節團拜停不了, 新的一年, 當然要同台山4寶大吃大喝一番...

選址較近KaKaMa的apm... 平時好少去apm, 原來apm都有好有特色的日本餐廳... 我真係太Out了...

餐廳門口掛上了綠藻球, 即係入面有酒飲啦~

接待處的Counter用不同的木箱拼貼而成, 甚具特色...

有人知道入口這個金像是什麼東東嗎?





Book咗6:30pm, 8:15pm就要還枱, 得1小時45分鐘, 想傾多陣都唔得, 應該話食慢d都唔得... 未去食已經唔係好Satisfied... 閒日都限時比較少見...

由於好趕頭趕命, 所以已經一早吩咐好最早到達的2個人LaLa聲落單, 唔好等人齊 (得龍媽1個準時到達現場)... 好彩, 當我地諗好叫咩o野食時, 大家都到齊了... 可以盡情落單~


今日天氣都幾凍, 唔想飲凍飲, 落完單問男服務員有無熱茶, 服務員閉口指住Drink List, 寓意No Free Hot Tea吧... 結果... 平時實係飲凍飲果2位, 居然飲熱的陳年柑桔蜜!!! 平時飲熱飲的我同貓兄, 居然飲凍的海鹽荔枝梳打&巨蜂乳酸梳打!!!

正當心裡滴滴咕咕抱怨之際... (害我要飲高糖分飲品, 減肥大計又要被狠狠的插一刀)... 見到隔離枱竟然有熱水供應?!! Free Hot Water!!! 又無搞錯呀?!! 算點呀?!! 錢都事少, 害我飲咗好多糖落肚呀!!! 唔知又要踩幾多粒鐘Stepper先可以消耗返!!! ROAR!!!!!! (咆哮)

呢位服務員的惡行又豈止咁少... 落單時佢係鼻向天+黑面+金口難開, 感覺自己猶如係暴發戶家門前乞食... 我地落單時都唔該前唔該後, 成個落單過程佢1句說話都無講過就走咗去, 我都唔知自己有無落過單, 亦唔知佢聽唔聽到我講o野...

平復心情後, 先開始影吓間餐廳... 無可否認, 餐廳內部裝修係幾有日本特色的...





~ Round 1 ~

鍋蛋石頭燒飯 $60
-- 都幾難食的石頭飯!!!賣相欠奉... 份量不多, 濕淋淋的飯, 食糊仔咁, 不要說蛋香, 連飯香都無, 無水的白粥比佢更美味...



鮮魷魚炒麵 $68
-- 勁多魷魚, 仲幾彈牙, 口感十足, 炒麵偏腍, 鹹中帶甜, 水準不俗...


豚平關西燒 $55
-- 好味!!! 可能係個醬甜甜地啩, 整體味道好夾, BB醬+燒汁都好難難食... 口感係淋身咗少少, 不過我上次係大板食到的都係咁 (咁我第一次自己燒, 燒得差是常識吧)... 呢度餐廳的專業廚師唔係日日煮的嗎?!! 補充 : 除了粉漿及醬汁, 吃不到有材料在內, 可能太肚餓一口吞掉所以察覺唔到啩, 又或是材料太Tiny?!!


燒羊扒 $60
-- 上枱時見到得2件, 貓兄話叫多1客, 我即刻話 : "試咗味先"... 一咬... 嘩... 鹹到呢!!! 要狂灌水, 救命... 剩係得孜然粉的味, 亳無羊味!!! 「叫多1客」議案一致通過... 否決!!! 其實肉質是OK的, 燒得都幾香, 可惜就是太鹹, 同埋我入來唔係要食新疆菜囉...


雞肉明太子 $25
-- 貓兄問 : "明太子係邊?"... 我答 : "Lay埋係醬入面"... 其實... 我都係亂蹹, 我都唔知係邊... 味道是... 千島醬囉... 雞肉不太乾身, 頗柔軟...


鹽燒活鰻 $55
-- 嗯... 呢個得喎, 貓兄同我都大讚好食!!! 大家一致通過, 好耐無食過肉質彈牙的鰻魚, 燒得好香, 皮脆肉嫩, 鹽燒帶出鮮味, 完全唔腥, 掂呀, 好味!!!


燒豆腐 $28
-- 好一般, 唔識欣賞... 豆腐外面又唔脆, 豆腐入面又唔滑, 豆香欠奉, 個醬汁同豆腐又唔夾...


香蔥吞拿魚腩 $180
-- 我對吞拿魚一向無感情... 我只知自己吞了一堆凍的無鮮味的魚肉落肚,油脂?!! 唔覺喎... 另... 說好的香蔥呢?!! Sushi豉油不是1人1碟的, 要2人Share 1碟, 不太衛生, 正值流感高峰期, 有點擔心...


海鹽荔枝梳打/陳年柑桔蜜/巨蜂乳酸梳打 $35
-- 搞了飲管幾下, 可能我無用盡九牛二虎之力去搞勻, 初時飲到一陣鹹的, 之後就是一杯普通的荔枝梳打, 有荔枝香味+甜味... 貓兄原本都想試, 等我試完之後, 佢最後決定飲巨蜂乳酸梳打...


食到尾聲, 另一位男服務員來收碟時, 我地話 : "唔該, 想加o野"... 嘩!!! 佢塊面黑到呢, 眼神同嘴面都顯得極度厭惡, 嘴藐藐, 好唔滿意咁...

喂!!! 我而家乞緊食呀?!! 無名火起三千丈!!! 但都唔理得佢咁多, 唔想望佢, 唔想比佢影響到我地聚餐的心情, 極速Order完唔想再見到佢...

有位好勤力的阿姐, 全餐粗暴地收碟, 快到有幾次都未食完就問你攞碟, 見而家好少咁勤力的員工, 都唔知讚你好吖定係... Anyway, 有上面2位哥仔提供咁有獨特氣質的服務, 已經將勤力阿姐比下去, 你只係排第三啫...

~ Round 2 ~

決定叫Round 2前, 貓兄問大家有幾成飽, 龍媽話都夠, 我就喪人喪語話 : "重新再食一次都得, 不過我減緊肥, 唔好啦, 哈哈", KaKaMa聽到就話 : "你都要減肥, 咁我點呀"... 其實呢, 我都係為健康而減肥, 唔想老咗週身病痛呢樣唔食得果樣唔食得, 而家減定將來先可以繼續喪食, 身形方面我唔係太介意, 反正我唔會著暴露或貼身的衫褲...

加州卷 $120
-- 樣子討人喜歡, 蟹肉卻是腥的, 本應是清新脫俗的菜色, 蒙上了污點... 有點後悔, 又害我增加了卡路里, 好食都話吖...


東洋卷 $55
-- 同餐牌有點出入, 唔知點解我會幻想到有士多啤梨係入面... 不難吃的, 只是現實與理想有很大偏差, 腦海仍然苦惱中, 難以投入心情去欣賞...



餃子 $45
-- 好想食, 又唔敢提出, 驚比人話用$45去食餃子?!! 估唔到KaKaMa同貓兄都想食, 更估唔到幾鬼好味, 餡料填得超飽滿的, 皮薄餡靚, 餃子皮煎得香脆, 沒有半點多餘油份, 我好似以極速係其他人未食完第1粒之前, 搶多咗1粒來食...


雞肉京蔥燒 $25
-- OK呀味道唔錯, 燒汁香甜, 雞肉嫩滑, 京蔥吸咗雞油都好香...


燒日本蕃薯 $25
-- 點解呢... 日本蕃薯無甜味嘅呢?!! 亦不夠粉嫩... 吞罷還想我說什麼呢...


價錢唔平, 份量細細, 食食下又幾飽喎...

味道方面都幾參差不齊, 落單前需謹慎選擇...

服務方面, 可以說比澳牛好一點點吧... 

環境氣氛大好, 但都給服務員破壞了...

埋單時, 問有咩卡有Discount, 答案係景樂集團(King Parrot)VIP Card... 吓?!! 又係景樂集團(King Parrot)?!! 唔怪得硬件上搞到咁好啦, 軟件上就...好有佢地集團的Style呀...

餐廳對面是扭蛋店, 服務質數同呢間日本餐廳一樣咁誇啦啦, 難度這才是觀塘區的Service Standard?!! 連中兩元, 很不悅的一夜!!!

是次每人消費約 $250 元
味道： 3 環境： 4 服務： 2 衛生： 3 抵食：3
###
地址 : 觀塘觀塘道418號創紀之城五期(apm)4樓20-21號舖
電話 : 3148 1483