Ken & Merry 為食男女，遊走世界!!!: 福氣共聚 @ 香港迪士尼樂園 Hong Kong Disneyland

5 March 2015, Thursday

原來今年連1篇關於生活的Blog都未寫過...

關於飲食的都只有5篇...

都唔知自己忙咩... (好似係忙太極表演, 然後又要上堂又要考筆試, 大掃除, 出席農曆新年前後大大小小的聚會, Hiking + Gym... 等等)

家庭及中學同學聚會照不便公開, 就由正月十五中國情人節來展開今年的第1篇生活Blog啦...

唔同連個天都唔鍾意我? 農曆年前已決定好昨天及今天其中一日去迪士尼, 卻整個星期都Raining...

我部Sony RX100壞壞地(係溫哥華落住大雨照影相), Honey部Olympus EM10買咗成年都只係用過2次, 我決定打佢主意... 咁買咗唔好嘥嘛, 呵呵... 原本打算拎去廸士尼練習下, 不過未出發已經落緊雨, 都係唔好啦, 等陣連呢部都壞埋, 想唔買過部新嘅都唔得喇~

出發前開抽濕機抽咗部Sony RX100一陣, 估唔到之後全日都無神喎, Good Good~

10:30AM係屋企出發, 11:30AM就到達, 都好快喎...

是日主角... 自拍神棍!!!

我地好少自拍, 今日當練習下... 主要原因係... 落雨嘛!!! 相機又唔敢攞出來, 部Sony Z1自稱防水防跌, 就算真係咁唔好彩入水或者跌傻, 都用咗2年啦, 嘻嘻, 都係時候...

Lights, Camera, Action!!! (趁未落雨, 一口氣影晒所有露天景先)

嘩!!! 好好運呀今日, 行咗1個大圈仲未落雨, 仲要樂園內勁少人, 全部機動遊戲都顯示等候時間5分鐘, 主要遊客係日本同印度, 內地同本地都屬少數, 好似去返SARS前的香港咁, 今年應該都有運行~

補上1張入園時偷拍的照片, 今日好多小朋友著住廸士尼Grad Day畢業袍, 超可愛呀, 八卦向職員查詢, 好似係幼稚園搞的Event...

玩完自拍, 玩他拍...

今次去職員影相區影完唔係比一疊Numbers紙你, 而係比1張印有2D Barcode的PhotoPass卡, 到下一個職員影相區, 只要出示PhotoPass, 職員Scan一Scan卡上的2D Barcode, 就會將你影的相片聯繫到PhotoPass, 不單環保, 更節省職員逐一找出閣下相片ssss的時間, 好似話買咗相之後, 用卡上的Number上網站隨時睇到相添呀, 好先進呀~

時候唔早, 去Plaza Inn嘆個靚茶先繼續喪玩...

今日唔打算玩機動遊戲, 旨在行下公園, 影下新春主題裝飾, 輕輕鬆鬆, 樂在園中...

未夠鐘睇巡遊, 去畫室畫下畫先~ 排隊時問職員攞咗新春特別版貼紙, 得Duffy都好吖~

畫完唐裝唐老鴨, 時間啱啱好, 巡遊開始!!! 由著住廸士尼Grad Day畢業袍的小朋友及家長打頭陣... (揮手)

今日堅少人, 居然少到可以坐係行人路上的長椅蹺住腳睇巡遊, 之後玩埋自拍都仲得, 始料不及...

有圖有真相...

By Sony RX100...

自拍By Sony Z1...舞蹈員好好笑, 唔知幾時開始攝咗入我鏡頭, 好彩我反應快, 按得切Bluetooth Remote Button...

眼見不會影響別人, 繼續練習... 如果人多一定會收起自拍神棍, 驚會整傷人...

企到咁後睇巡遊, 目的只有1個... 同Mickey & Minnie影相!!!

巡遊一完, 轉眼跑入身後涼亭排隊, 其他人都好醒目, 用同一策略, 身前已有幾組人, 其中2組係日本遊客, 全身裝備都係迪士尼, 非常專業...

排了30分鐘, 終於到我地啦, Yeah~~~

影埋Mickety & Minnie已經無晒世藝, 走咗去玩巴斯光年, 不過好似壞機, 人唔多, 但人龍郁都唔郁, 最大收穫係見到中學時代識得的1位攝影師, 經朋友Wahstsapp核實...

無玩到, 走咗去睇米奇金像劇... 純粹搵個地方坐下... 之前睇過幾次, 唔識欣賞, 今日人少到可以坐第1行... 係, 你無睇錯, 係第1行!!! 原來坐第1行近距離睇又幾有氣氛喎...

初時得我地2個坐晒成張長椅, 後尾有2個小學妹妹坐咗埋來, 我問佢媽媽係邊, 佢答"後2行, 同家姐一齊", 我話佢好勇敢, 佢指住手袋仔話有手提電話, 仲補句"其實都無咩啫"... 嘿嘿... 係嘅係嘅, 姨姨少見多怪...