Ken & Merry 為食男女，遊走世界!!!: 拉麵來 Ramen Kureha : 超強蒜味充斥口腔

2 December 2014, Tuesday

Running Man有星期一情侶, Ken & Merry都有星期二姊妹, 是日Tuesday又要上演餓鬼出籠啦~~~

食力組合對上一次一齊去大坑搵食, 好似已經係好多年前嘅事喇... 浣紗廚房都執鬼埋喇...

今日的目標係... 日本拉麵!!!

6點前去到, 未開門, 唯有係門外等候... 餐廳外觀有95%日本本土Feel... 哈哈, 自家制麵4隻中文字出賣咗佢...

影門口相期間有外籍人士加入等候, 店員開門時竟然招呼佢地入座先?!! 可能外籍人士自己都覺得唔多妥, 同我地講咗聲Thank you...

我地被安排坐在面壁位... 外籍人士有得坐吧枱...

成間舖都掛滿兒時玩意, 懷舊味濃...

無緣品嚐星期六日限量供應30碗的鎮店之寶「魂之一杯」, 希望再來時有機會食到啦...

同係沖繩一樣, 落單跟自己喜好填紙仔... 忽然覺得好似食車仔麵咁...

同日本的拉麵店一樣, 有生蒜供應, 右邊是榨蒜器... 第一次見佢係響北海道, 果時都未有Y!Blog, 唔記得一風堂定一國堂喇, 果時都唔知係咩, 大鄉里出城咁... 平時我一次要攪下佢先安落, 不過... 今日我唔需要佢!!!

順帶一提其他調味... 我喳喳聲KO咗碗麵先醒起無添加全何額外調味...

熊本黑蒜油豚骨湯麵 $92
-- 嘩!!! 好黑呀!!! 食完條脷同腸會唔會發黑o架?!! 蝦佬喂可以Promote佢喎, 哈哈... 蒜味太強勁勁勁, 將豚骨濃湯底的味道完全淹蓋, 所以食完麵無飲到D湯... 普通硬度的麵身對我來講仲係太硬, 下次要試下軟的... 叉燒肥肥地又厚又腍, 好味...

追加味付玉子 +$15
-- 糖芯蛋好味, 火喉剛好, 好軟滑, 有蛋香...

濃厚魚介豚骨湯麵 $98 (追加味付玉子 +$15)
-- 力仔就好欣賞佢碗拉麵, 符合佢的最低要求 -- 食到一半都仲出緊煙!!! 佢就好啦, 可以飲晒D湯...

汽水 $15, 啤酒 $25... 減緊肥唔想飲汽水, 好彩比我見到吧枱度有綠茶, 都係$15...

力仔好滿意, 我就OK啦, 一來我唔太好拉麵, 平時都係食山頭火, 二來剛去完沖繩, 食咗沖繩Top拉麵, 有比較自然唔會太有驚喜... 幸好拉麵來不致被比下去, 咁, 係咪算高質數呢in HK?!!

沖繩「婚紗攝影」2014の≪朝拜拉麵≫ 暖暮那覇牧志店 (DANBO だんぼ)
http://www.kenmerry.com/2014/11/danbo.html

沖繩「婚紗攝影」2014の≪三大拉麵≫ 琉球新麺通堂リュウキュウシンメントンドウ
http://www.kenmerry.com/2014/10/ryukyu-shinmen-tondou.html

埋單送張吸印仔咭, 1碗麵有1個印, 10個印送1碗麵, 有機會都可以帶Honey來試試...

夜晚刷牙個牙刷果然可以清潔牙縫... 原本個口已經無咩蒜味, 隻牙刷索咗牙縫的黑蒜油, 再刷落其他牙度, 成口都係超強蒜味, OMG!!!

是次每人消費約 $50 元
味道： 3 環境： 4 服務： 4 衛生： 4 抵食： 3
###
地址 : 大坑浣紗街20-22號地下B舖
電話 : 2808 4468

食1碗拉麵又點會夠飽... 當然要行去天后食我地至愛的... 晶晶甜品 Ching Ching Dessert!!!

我好鍾意食甜品, 晶晶乜乜乜...