[試食邀請] GASTROBOX : 暖心情侶小天地

25 November 2014, Tuesday

上次同貓兄去金馬倫道食地中海菜, 行錯路上咗一座非常簇新的大廈The Cameron, 大堂型格十足, 同金馬倫道嘅感覺好唔同, 好似行咗入第2個世界咁...

今晚居然又比我有機會舊地重遊, 感覺特別親切... 幾勁呀, 係地圖Check過1次就可以合埋眼行到去喇... 好Easy啫...

餐廳入口以銅配大玻璃, 簡潔中看出品味, 但驚喜還在後頭, 用餐區的深處更是氣派十足...



Wow... 我的Dream House靈魂人物 -- 壁爐!!! 坐係旁邊用餐, 內心好溫暖呀!!! 加埋水晶吊燈, 好高貴呀!!! 仿如給你一個5星級的盛宴...


餐廳內環境較為昏暗, 凝神注視閃爍的燭光, 暗嘆坐係我對面的... 點解唔係Honey?!! 全場都係Sweet到爆燈的情侶, 我地2個女仔來食飯氣氛好似有點怪... 

哈哈... 別想太多... 專心Chatting吧!!! 撇除被情侶們包圍的因素, 其實GASTROBOX都係個唔錯的地方, 適合同朋友摸下酒杯底, 傾下心事...

好, 先來杯Welcone Drink吧...

Virgin Colada $68
House Wine (White) Marquis de Pennautier Terroirs Chardonnay 2011, France $75

Set Dinner有4款Main Course可以選擇... 包沙律、餐湯、主菜及餐茶...

煙三文魚凱撒沙律
-- 減肥中的我的欣物, 食多幾碟都唔怕... 沙律菜好新鮮, 咬落爽脆, 麵包多士粒香脆, 巴馬臣芝士濃郁, 煙三文魚份量也不少...


是日餐湯
-- 菇迷天堂... 黑松露蘑菇湯!!! 上桌時傳出陣陣的黑松露氣味, 入口啖啖菇菇粒, 好Rich... 伴餐湯的麵包是我最愛的意式香草軟包, 將其中一面輕烘, 香脆中帶軟綿, 原來更好吃...


烤特級安格斯T骨牛扒 (16安士) $338
-- 主菜選了16安士安格斯T骨牛扒... 又話減緊肥嘅?!! 16安士喎, 唔係8安士喎, 2個女仔點食得晒呀?!! 你估錯喇, 就係食得晒!!! 怕血的我點了Medium Well, 上桌時陣陣焦香撲鼻, 惹人垂涎, ... 肉味香濃, 滿以為會吃剩一半, 誰知越食越起勁, 食食下清碟, 好勁呀!!! 食時記得蘸芥末醬, 好辣但勁香, 無咗芥末醬應該未必食得晒...


扒三文魚柳伴帶子配文也汁 $248
-- 健康之選, 女士們必點主菜... 三文魚煎得皮也脆脆的, 一點腥味也沒有, 2顆帶子略煎至表面呈金黃色, Medium Well, 入口柔軟有彈性...


精選甜品 +$35
-- 嘩嘩嘩... Pac-Man公仔好可愛呀!!! 咁得意, 真係唔捨得食喎... (把口係咁講, 轉個頭即刻嗒吓人地係咩味... 不出所料, 黃色係芒果, 紅色係草莓, 只係估唔到綠色係青蘋果)


嘩嘩嘩... 有花收好開心呀!!! 朵花真係唔捨得摧啦, 只係KO了藍莓芝士餅... 底層用了餅碎做餅底, 無咁膩... 藍莓的雲石紋都整得好靚...


GASTROBOX裡裡外外的環境都比諾士佛臺好, 價錢相約, 不失為一個情侶談心新天地, 如果冬天可以依偎在壁爐旁邊進餐, 實行Sweet到漏...

16安士牛扒真係一點也不簡單, 之後足足用咗2-3日先可以完全消化...

多謝店方的邀請, GASTROBOX 真是一個好地方...

是次每人消費約 N/A 元
味道： 3 環境： 4 服務： 4 衛生： 4 抵食： 3
###
地址 : 尖沙咀金馬倫道33號 The Cameron 1樓101號舖
電話 : 2369 8383