加國「喜行」の《豪食住玩》Fairmont Chateau Lake Louise 露易斯湖堡壘酒店

23 April 2014, Wednesday

[0-6°C] ~ Day 8 ~

露易絲湖城堡酒店(Fairmont Chateau Lake Louise)位於加拿大艾伯塔省, 由加拿大太平洋鐵路集團建造於19世紀末20世紀初, 座落於洛磯山脈地標露易絲湖畔, 坐擁絕美湖光山色景緻, 洛磯山脈磅礡的氣勢, 富麗堂皇的維多利亞式古堡建築風格, 酒店內華麗精緻, 讓人陶醉於古典浪漫氣氛當中...

露易絲湖景色秀麗, 四季景致分明, 冬天湖面被白雪覆蓋, 夜幕低垂, 山下的小木屋滲出輕弱的閃爍燭光, 一張活生生的聖誕卡呈現眼前... (懶惰的拉姑寫呢篇Blog時正值聖誕節, 特別有氣氛)


今天早上的行程由於大雪關係, 有機會導致或已經發生雪崩, 哥倫比亞冰川今天被封鎖了, 導遊將行程調動, 調轉第2天及第3天的行程... 先欣賞幽鶴國家公園(BC省)內的翡翠湖(Emerald Lake), 秒看完弓河瀑布(Bow Falls)...
 

午飯前在露易斯湖上暴走... 



於露易斯湖堡壘酒店內的意大利餐廳Lago享受豐盛午餐...  

 

午餐後驅車上訪硫磺山(Sulphur Mountain), 再來個走馬看Banff (班芙鎮快閃黨), 係銀龍食埋個唔錯的中式晚餐, 夜晚7點返回露易斯湖堡壘酒店...

 
係酒店Lobby等候導遊派發房間鎖匙時, 當然要四周圍影下相, 將呢間咁靚嘅堡壘酒店收入相機帶返香港... 不過我覺得自己D相影得麻麻, 未能將堡壘酒店攝人的氣魄呈現出來, 而且美輪美奐的裝飾品實在多不勝數, 不能盡錄...






一般旅行團會係呢間湖景餐廳食個下午茶, 比較少團會係度食Lunch同宿一宵...




拎咗房間鎖匙之後, 又要展開另一段旅程... 九曲十三彎的搬行李行大運!!!

未知是否由於酒店本身係古堡關係, 好多路都唔通的, 電梯亦非直達, 我地要自己推住件20KG的行李, 又上又落, 又上又落, 先去到同Lobby同層的房間... 都行咗15分鐘先到...第2朝先發覺, 只要行出酒店外面, 條路又短又直, 係酒店內行就好似係尖沙咀站內行去尖東站的出口咁費時失事...

沿途都好靚, 當參觀藝術博物館, 行遠少少都無損失...




終於來到期待已久的露易斯湖堡壘酒店房間!!! 無土豪金, 但好舒服呀!!! 講唔出的細節, 果種貼心又無形的感覺, 好利害呀!!! 好佩服酒店團隊的細心...

床鋪好似雲一樣咁輕柔, 經常失眠的我今晚一覺瞓到大天光, 甜到呢... 起身時個髮型Astro Boy上身囉... (尋晚係張床度嘆係Banff買的Pop Candy, 嘆完就瞓咗, 牙都無刷, 嘻嘻, 可想而知張枱有幾勁)


我地房間係巷尾, 大單邊, 房內有3個大窗, 估計比其他團友多2個, 心理上Jetso咗, 哈哈... 放眼窗外, 一幅又一幅白雪皚皚的山景畫呈現眼前, 瞬間的寧靜, 情緒立時平復下來, 但感覺一點也不冰冷...
 

Hea係晾腳梳化嘆Cake睇雪又得...
 

部係書枱扮寫Blog偽文青睇雪又得... 


再唔係, 行出房門凍下等頭腦清醒D又得... 得咗!!! 我地住巷尾, 間房隻門真係黐到緊急出口實一實, 零距離... 原本可以就咁行出去露易斯湖, 但逃生梯被半層樓咁高的厚厚積雪覆蓋住, 好驚落咗去要等到夏天導遊先搵得返我出來, 都係LaLa聲返入房繼續影相吧啦~~~ 



心情特別好嗎?!! 玄關的鏡子和衣帽間的大木門看來也特別美... 浴室好大好舒適, 有齊浴缸同淋浴間, 沐浴露從未遇過咁好用, 毛巾擺放得宜, 垂手可得... 電風筒有成6粒制咁多, 好難開啟...




嘩嘩嘩!!! KEURIG 膠囊咖啡機!!! 第一次住酒店遇到膠囊咖啡機咋!!! 好High Class呀!!! 同埋咖啡機同熱水壺終於分開喇... 除咗今晚有正常熱茶飲之外, 係加拿大咁多日都係飲有咖啡味的茶, 好唔習慣囉...


擺好行李, 打點好一切, 夜晚8點又再行落露易斯湖散步, 用腳架影下合照, 玩到差不多9點先返房休息, 都幾滿足, 但如果可以係夏天再來一次, 係湖上泛舟, 咁就真係此生無撼啦... 

晚上的露易斯湖... 睇落週圍都好似瑞士馬特洪峰咁...








夜晚係外面影相超凍, 入返酒店之後, 行人通道窗邊的窗台原來係暖板o黎o架, 我地坐咗一陣, 暖返個身先返房...

房內的夜景太美了... 




我要好好享受今晚係露易斯湖堡壘酒店 (Fairmont Chateau Lake Louise)的時光, 洛磯山脈4天團的重中之重... 套用表弟果句 : (係度瞓) Are you kidding me?!!

哈哈... 我瞓啦!!! 晚安!!! Good Night!!! 早抖!!!

其實表弟今晚入住的Banff International Hotel都唔差吖, 有Free WiFi, 反而我地住貴一貴的Fairmont Chateau Lake Louise都無... 表弟行條斑馬線已經有超市同埋大把商店, 我地住係深山連人影都無隻...

~~~ 第2日 ~~~ 

(行程話) The Fairmont Chateau Lake Louise 給你一個寧靜沒有Morning Call的5星級早上...  

唉... 原本就係嘅... 可惜尋日大雪關係, 有機會導致或已經發生雪崩, 哥倫比亞冰川被封鎖, 導遊將第2天及第3天的行程調轉... 

各位團友, 唔該8:15AM推行李上旅遊巴, 8:30AM準時開車...

昨天在Banff超市買的Pastries大派用場... 



從房間看晨曦的露易斯湖... WoW... 好美哦...


從房間影出去...

從地下影上去...


我地應該係住箭咀指住果間房...


被列為4星級的酒店, 只為唔係全部房間有冷氣機, 卻能帶給你5++星的享受...

好滿意的住宿... 無洗多到冤枉錢...

<< 待續 >>

** 其實我都唔明點解呢篇Blog要拖足8個月先寫, 今天是Boxing Day, 總算又嘔到一篇出來, 希望可以盡快嘔埋餘下的行程, 等我2015年可以重新做(微型粘土)人 **


加國「喜行大溫」2014 の 總匯 http://www.kenmerry.com/2015/01/Vancouver-Canada.html