加國「喜行」の《冰川探險》Columbia Icefield 哥倫比亞冰原

24 April 2014, Thursday

[-3 to 10°C] ~ Day 9 ~

哥倫比亞冰原 (Columbia Icefield) 位於加拿大洛磯山脈, 橫跨北美洲大陸分水嶺, 其中一些部分位於班夫國家公園和賈斯珀國家公園, 面積大約325平方公里，厚度為100到365米，每年降雪量約為7米, 是北極圈以南最大的冰原之一, 其中最著名的阿薩巴斯卡冰河(Athabasca Glacier) 末端距離路邊只有1.5公里, 遊客有機會體驗大自然的強大輝煌力量, 參與冰原雪車之旅, 踏上古老冰川, 下車撫摸經歷千萬年的冰雪結晶, 如果來到加拿大唔去洛磯山脈體驗下冰川探險, 就等於去到埃及唔去睇金字塔一樣...

我會將此列為人生必做的10件事!!!


從Lake Louise出發到Columbia Icefield, 車程120 km, 約需1.5小時...

沿著高速公路「冰原大道」前往哥倫比亞冰原... 我用Sony Cybershot DSC-RX100的Sport Mode影出來的窗外景色也不賴吧...





10:00AM 到達哥倫比亞冰原冰川探知館... 導遊未落車已趕鴨仔, 沿途講咗幾十次唔好影相, 理由係尋日冰川封咗, 尋日同今日的旅行團迫埋晒今日一齊來, 時間好緊迫...


導遊去取入場劵期間, 團友們有20分鐘去下洗手間, 導遊千叮萬囑大家唔好走開, 商店都唔好入...

團友們好勁, 得咁少時間, 都可以係唔知邊樹執咗2支冰柱返來影相... 仲夠時間借埋比我地影...


冰川冒險會係冬季關閉, 每年春季重新開放... 冰川玻璃橋開放時間更短, 只在5月至9月期間開放... 詳情可瀏覽 哥倫比亞冰原冰川探險 (Columbia Icefield Glacier Adventure)
http://www.brewster.ca/rocky-mountains/destinations/columbia-icefield/activities/columbia-icefield-glacier-adventure/

導遊開始趕鴨仔入籠... 呢一刻其實我幾驚... 好怕行錯咗去冰川玻璃橋(Glacier Skywalk), 我會驚到腳軟爬咗係地下等心臟病發... 要行上離地280米的玻璃地板觀景平台, 欣賞由壯觀的冰川形成的峽谷和瀑布, 往下看包保你的腎上腺素升到BaBa聲...


Departure Time : 10:30AM



又話係坐大碌車嘅?!! 點解會係普通巴士o架?!!




噓... 原來係去中途站轉車, 嚇死... 呢度都幾食風的...


期待咗半年, 終於可以登上巨輪雪車(Ice Explorer)啦, 好興奮呀!!!


一步一步向前邁著, 擺返個10大最老土Poses先啦... Yeah!!! 巨輪雪車(Ice Explorer)連車頂都係大窗, 遊客可全視線欣賞哥倫比亞冰原攝人美景...



一生人難得一次的機會, 雙腳踏在由第二次冰河時期所遺留下來的遺跡 -- 深達300公尺之亞達巴斯加冰河 (Athabasca Glacier), 內心激昂之情難以形容!!!  

係冰川上逗留的時間只有10分鐘, 我地要努力善用每1分每1秒, 誓要將壯麗山河美不勝收的景色盡量收入相機內... 

導遊千叮萬囑提醒大家只可以行係有剷過雪地方, 無剷過雪的地方千祈唔好行埋去, 因為可能會有Invisible的冰罅, 深不見底的, 曾經有人跌咗落去, 要幾十年後先搵得返...
 
 



攝影技巧不俗的團友幫我地影合照, 感動中... 突然刮起大風雪!!! 堅凍, 未至於喪凍, 勉強頂得住... 一陣咁多啦... (呵呵, 我今日著咗2條褲+2對襪)


Kenmerry首度以真面目示人... 無打格仔... 其實應該係"再度", 係10東歐「暴雨洪災」的捷克篇(布拉格)都做過矇面超人... WaKaKaKa...


咦... 部相機好似凍傻咗喎... 無晒反應嘅...


大碌車個碌有人咁高, 張相未能將神髓活現...

搵司機影合照留念是常識吧... 個車碌真係堅大... (唔知係咪導遊吩咐大家落車時都要比CA$1貼士比大碌車司機, 所以佢果樣仲開心過我)

令人嘆為觀止的必看景點, 終於完成冰川之旅, 興奮到飛起, 我得咗喇!!!

11:45AM 回到哥倫比亞冰原冰川探知館, 導遊要去餐廳打點一下, 我地先有少少時間同阿薩巴斯卡冰河 (Athabasca Glacier) 影張大合照... 非常感激團友幫忙影咗張咁靚的合照...
 






後來得知阿薩巴斯卡冰川從1844年開始,  每年以約5米的速度減退, 並已經退去超過1.5公里 (在過去125年, 失去超過一半的體積), 我的內心由興奮變得內疚, 我成為了其中1個令阿薩巴斯卡冰川係未來消失的幫兇...

由於它靠近冰原大道, 容易前往, 是北美訪問量最大的冰川, 但卻不推薦旅客自行前往冰川, 除非有適當的裝備, 否則隱藏的裂縫有機會導致措手不及的遊客死亡...

12:00NN 冰原自助餐 @ Glacier Dining Room





自助午餐味道麻麻, 勉強吞得落嘅... 薯仔同紅蘿蔔好似無煮過咁, 硬過乜... 真係任你食, 你都唔會拎第 2 Round...


導遊比咗1小時我地享用午餐, 不過味道咁, 都無謂浪費時間, 極速食完, 即刻衝出觀景台影相... 

用Sony RX100影"一掃全景"可以影到晒2條冰川, 好正...


Honey買咗唔夠1個月的Olympus OM-D E-M10, 竟然同1個景都影咗44張99%相似的照片, 唔怪得我部機個Harddisk會爆得咁快啦~~~
 

Zoom近D... 都幾似瑞士少女峰...


再Zoom近D...


嘩嘩嘩!!! 原來Honey Zoom咗一張起伏的冰川照, 仲影到巨輪雪車(Ice Explorer)移動緊去冰川呀... 呢... 中間位置偏左下角條黑線呀... 好叻叻呀!!!


有人真係見到咩都可以抽水... (作狀) 嘿嘿, 剷雪難唔到我嘅...



1:15PM Good Bye, Columbia Icefield~~~

食完Lunch, 已經無行程可言... 下午的節目係... 坐車+坐車+坐車, 中途都會搵洗手間比大家方便下嘅... 直至夜晚去到酒店為止, 全日車程3百幾公里, 淨係聽下都暈得一陣陣...

3:30PM British Columbia Visitor Centre @ Golden

各位團友, 唔該你地去一去洗手間, 下一站要1.5小時... 

遊客中心內的楓葉形波板糖 CA$2/支, 買來做手信都OK抵...

5:00PM 太平洋鐵路最後一根釘 @ 飛鷹坳


重回到行程第1日的其中1站... 各位團友, 唔該你地去一去洗手間, 下一站又要1.5小時...

呀... 唔係, 應該係2.5小時!!! 因為係5:23PM果陣, 導遊叫大家將山區時間改返做太平洋時間 (5:23PM > 4:23PM)...

開始落雨, Golden鎮攝氏0度, 果然, 係山區入面係唔需要睇天氣報告, 因為... 導遊金句 : "什麼也有機會發生"!!!


6:30PM 參觀Planet Bee Honey Farm & Honeymoon Meadery 養蜂場 @ 維農市 (說穿了只是1間商店, 養蜂場係商店旁無得參觀)


尋找蜂后遊戲... 嘩... 海底撈針咩?!! 咦... 搵到, 紫色箭咀指住果隻, 背脊畫咗白色記號的...


去到海外都要發揚香港「鳩嗚」精神... 嗰蜜糖我係去全世界都飲住。因為點解呀？我去到邊度我都好鐘意飲蜜糖嘅，（去到）每一個國家必須要飲，花蜜乜乜乜。 

開始購物前, 店內有蜜蜂講座, 店員伯伯好認真地用英語講解, 有晒Powerpoint, 大家都好專心聽, 咪當睇National Gergraphic囉... 突然來自某強國的團友(佢地1行8人, 日日都好嘈), 企起身大聲講電話, 真係無名火起三千丈, 你扮緊少林足球大師兄, 秒秒鐘幾百萬上落呀?!! 我9秒9起身想驅趕佢, 說時遲那時快, 一名香港Gentlemen都起緊身, 但果位某強國的團友已被1名港女用手一掌推了出店外, 港女好勁呀, 睇唔出呀!!!

7:00PM 晚餐於 Asian Avenue Restaurant @ 維農市






晚餐的質數... 嘿... 咪Food Court果D兩餸套飯咁上下水準囉... 都吞得落嘅...

同枱食飯的廣東太太, 佢個仔係Vancouver讀緊大學, 佢飛過來探仔順便同阿仔來旅行... 席間果枱某強國8人團友大打噴嚏, 震天駭地, Of Course No Cover Mouth啦, 廣東太太即刻話"好彩唔係同佢地坐埋同一張枱", 仲劃清界線, 強調"廣東人緊係講廣東話"... 哈哈, 講得好, 我實撐你!!! (我開始懷疑導遊係有用過個心去編枱的)

Urbanspoon的Link :-
http://www.urbanspoon.com/r/85/1796704/restaurant/British-Columbia/Asian-Avenue-Vernon

8:00PM 酒店

黑麻麻去到酒店, 仲要係後門入, Lobby都無去過, 咩都影唔到, 連自己去咗邊間酒店住都無印象, 憑著抽絲剝繭精神, 用超市單上Store Manager的名字進行搜尋, 再係Google Map的Street View上行返1次去超市條路, 終於比我搵到, Internet真係好利害, 多謝光纖之父 -- 高錕!!!

Prestige Hotel & Conference Centre Vernon
4411 32 Street, Vernon, BC V1T 9G8
http://www.prestigehotelsandresorts.com/prestige-hotel-vernon/


酒店房間都唔錯... 幾簡潔... WiFi終於用到... 可惜Door Secure Lock爛的...



但我完全接受唔到... 咖啡壺同茶包茶杯(箭咀示)放係馬桶側邊, 佢地到底有無衛生常識?!!


第2朝影的酒店房間窗外景色... Safeway超市就係左邊London Drugs係右邊, White Spot係正面前... 仲有Starbucks Coffee 同 Liquor Store...


9:00PM 係Golden酒店食早餐時識咗來自香港探親的兩母女, 今晚住對面房, 大家擺好行李就約埋一齊去逛Safeway超市...




原條開邊三文魚都唔使HK$100, 成隻手咁長, 真空包裝, 好抵呀!!!

尋日係露易斯湖影婚紗相的團友凍親走咗來買葯, 要靚果然要付出代價...

~~~ 題外話 ~~~

我地早幾日去過的Vancouver Island尋晚發生6.7級地震, 乜咁邪o架, 點解我地去到邊都有地震o架?!!

塊面出咗大量水泡, 估計係無塗防曬, 唔醒起雪地的紫外線其實都好勁的...

架旅遊巴比起歐洲果D真係唔多掂, 得1度門上落, 成車Full晒, 前所未見連導遊側邊個位都坐埋人, 可想而知上落一次要用幾多時間...

前晚4AM收到Honey朋友Whatsapp話等我地返到香港一齊去飲茶, 我真係想爆樽, 你呢個International Business Man明知我地去咗加拿大, 唔會唔知有時差啩, 無聊的說話就留返返香港先講啦...

尋晚又比其他人的午夜兇鈴同Whatsapp嘈醒, 求下你地放過我啦)))

朝早係露易斯湖酒店張Data Card插落Tablet之後抆唔返出來, 天呀!!! (不過其實都無關係, 根本週圍都無Signal)... 好彩夜晚用M4 Sebertool萬用鉗夾得返出來... 作為1個XX工程師, 帶住支"士巴拿" (Spanner) 係身都係好正常啫... XD

*** 今日係12月28日, 自從12月中Delete咗Candy Crush Saga之後, 寫Blog的進度突飛猛進, 能夠搣甩鋪糖衣毒癮真係好彩... 2015年的願望 -- 我要重新振作做(微型粘)土人 **



加國「喜行大溫」2014 の 總匯 http://www.kenmerry.com/2015/01/Vancouver-Canada.html