Berliner German Bar and Restaurant : 你德唔德?!!

20 November 2014, Thursday

是夜舉行11月之星生日飯局, 萬千星輝賀貓兄!!!

原本約好咗12月初去蟹膳食餐貴嘅, 點知...

KaKaMa突然話佢買比我地的台灣手信11月尾到期, 要緊急召集大家出來!!! 我第一個回應係... "嘩!!! 如果收到過期手信, 我一定第一時間Upload上Facebook囉"... 嘩咔咔咔... 真心話到咁, 仲唔係真正朋友?!!


奧海城III期離地鐵站真係非比尋常咁遠... 趕到我氣咳... 唔記得影餐廳門口個大酒桶...



其實... 我唔知點解壽星揀食德國菜但又無揀食德國豬手同飲德國啤酒... 不過坐低就有得食, 淨係需要苦惱飲咩好, 我都唔太介意嘅...

行到好口渴的關係, 好想飲凍飲... 左揀右揀都唔係太啱心水, 又係飲返熱檸茶... 最難得係阿姐逐樣推介我逐樣Reject, 阿姐仍然好有禮貌, 最後我問熱檸茶有無得Refill熱水, 阿姐仲話"有, 無的話我私人Refill比你", 勁豪氣!!! 阿姐, 比10個讚妳!!!


Pumpernickel with Smoked Salmon, Potato Salad, Capers and Dill
-- 例遲的KaKaMa, 是要付出代價的... 成件事勁好笑, 咁受害人自稱已出站, 我地咪落單囉, 食物又一擁而上, 咁肚餓自然就會食, 點知比我地食清咁滯, 無理由留隻碟係度比人見, 我狼吞虎嚥薯仔沙律, 含住係口未吞就好趕咁搵職員拎走條碟... 偷食真係特別有快感, 哈哈哈... 


Berliner Warm Apperizer Platter 特色拼盤 $168
-- 小食拼盤有精選煙豬肉腸、德國鹹豬手肉夾餅配洋蔥蓉、煙三文魚伴德國黑麥包、香燒肉粒及炸脆大蝦... 個夾餅口感都幾奇怪, 味道仍未見精彩... 豬肉腸好味... 香燒肉粒不太行... 煙三文魚同黑麥包其實唔太夾... 炸蝦好油呀...


Pork Belly Sliders 德國式燒豬腩肉包配紅酒洋蔥及香草汁 $72
-- Mini Burger個包比較乾旱, 味道似麥皮... 餡料味道不見突出, 不難吃的...


Traditional Thin Crust Pizza 洋蔥煙肉脆薄餅 $128
-- 好味... 薄脆餅底唔錯, 咬落啖啖都係餡, 配料似食焗薯, 好香口...


Sausge Platter of Bratwurst, Regensburger, Nurnberger and Cheese Krainer 肉腸拼盤配燒薯及酸椰菜 $218
-- 幾款什腸都好味, 唔會過鹹, 唔配啤酒都OK... 燒薯粉嫩美味, 酸椰菜酸度低, 為香港人可接受程度 (係德國食的酸到苦)...


甜品餐牌唔太吸引, 決定轉場...

樓上許留山係路邊開2張枱, 座位窄到喊, 食物唔吸引兼貴到嘔,坐低咗唔夠3分鐘起身走...

嘿嘿... 就係咁... 造就咗我第一次坐龍媽車... 我地出發去大角咀食街食甜品Lu~ Yo Ho~

是次每人消費約 $230 元
味道： 3 環境： 4 服務： 4 衛生： 4 抵食： 3
###
地址 : 大角咀海泓道1號奧海城三期地下G18號舖
電話 : 2148 5388