[試食邀請] 公主餅店 Princess Cafe & Bistro : 清風街的清風

20 November 2014, Thursday

天后清風街一向多好o野食, 我同Honey久唔久都會去覓食一番, 偶爾會發掘到好多驚喜...

自從今年6月開始減肥至今, 都好耐無落過去啦...

原來清風街近期又靜悄悄地刮起了一股清風... Princess公主餅店!!!

如果比姪女知道我今日去食公主甜品, 肯定佢一定要跟埋來!!! (同普羅小女孩一樣, 佢都係公主迷, 只要聽到公主2字就會雙眼發光)


Princess公主餅店主打全人手製作, 以低脂、低糖健康為主的曲奇和甜品...


清風街我已經熟晒路, 出咗天后地鐵站話咁快就到...

WoW... 店內的牆畫有齊姪女最愛... 公主+城堡+旋轉木馬!!! 帶埋佢來肯定唔使走...


店內的陳設一齊來得太"公主"... 好鍾意佢個Logo, 好Elegant...


High Tea 3層架擺放了Princess人手新鮮製造的Mini Cake, 造型獨特又有創意, 皇冠、禮帽、銀袋、玫瑰、小熊, 100%『公主』先有資格享用到的甜品!!! 所有甜品都以低糖低脂為製作理念, 就算我減緊食都可以食, 呵呵, 好開心呀!!!


來個Close-up看清楚... Mini Cake真係做得好精美呀!!!




Princess Cafe的曲奇好多元化, 有4個系列咁多... 抗氧化堅果系列、美容纖體花茶系列、公主首創鹹味曲奇、季節限定辣味曲奇...

最近仲推出咗聖誕特別版, 好可愛呀!!!



每次去到曲奇店最興奮的, 當然係試味啦, 我今日一口氣試咗9款, 超開心, 呵呵呵呵...


曲奇餅的包裝盒好靚呀!!! 收到的朋友一定會好開心...



每片曲奇獨立包裝, 唔使擔心開咗包裝之後食唔晒會變腍... 包裝上仲印咗曲奇的口味, 大黟人分享時唔使再不停回答"呢包咩味? 果包咩味?"嘅問題... 每盒曲奇都有Catalogue, 又唔使再答"仲有咩味揀"嘅問題, 自己睇, 唔該... 

美容纖體花茶系列有8款口味... 伯爵茶、草莓茶、茉莉花茶、混合乾果茶、洋甘菊果茶、薄荷茶、圓肉杞子茶、洛神花茶... 圓肉杞子茶曲奇入口時好重牛油味, 嗒落圓肉同杞子的甜味就會走出來, 好好味呀!!! 草莓茶曲奇呈粉紅色, 雖然好香草莓味, 好好味, 我都好鍾意, 但無得傾, 一定要留起晒比我的小公主姪女獨享... (心中已暗暗盤算訂1盒全草莓味曲奇來博取小紅顏歡心)


公主首創鹹味曲奇有8款口味... 黑松露、魚子醬、鵝肝醬、西班牙火腿、蟹肉、芝士、煙三文魚、XO醬... 嘩嘩嘩, 全部都係名貴食材, 用來送禮肯定唔失禮!!! 我食咗西班牙火腿同芝士同XO醬, 3樣都好好味, 味道非常濃郁, 好有驚喜!!!


抗氧化堅果系列有8款口味... 芝麻腰果、夏威夷果仁、健康五穀、朱古力杏仁、原味牛油、榛子果仁、咖啡合桃、開心果仁... 呢盒一定要獨食, 果仁曲奇一向係我至愛, 唔捨得同人分享, 頂多比幾塊健康五穀比Honey食...




全港首創「無牛油、無糖、無麵粉健康曲奇」... 聽落好神奇!!! 以天然的山藥粉、糙米粉、橄欖油、椰子油和雜莓乾果制作, 非常健康, 對麵粉敏感的人都可以食...


3點3下午茶時間... 等我扮吓公主先, 呵呵... 不過呢... 原本我屋企無適合擺蛋糕曲奇的碟仔, 拎住個粉紅LC心心盅頂住先啦~~~


Princess Cafe仲有辣味曲奇、全蛋白薄脆、全蛋白橄欖油薄脆, 大家有興趣的話, 可以上佢個網站 http://www.princess-hk.com或者粉絲專頁 http://www.facebook.com/princesshkhk 了解下...

多謝店方的邀請, 咁我以後想食曲奇唔使再撲去九龍城咁遠喇... (早幾日先同同事講起以前專程去赤柱買曲奇的往事)

是次每人消費約 N/A 元
味道： 4 環境： 4 服務： 4 衛生： 4 抵食： 3
###
地址 : 天后清風街25號A1地舖
電話 : 2866 9062