Ken & Merry 為食男女，遊走世界!!!: Tango Argentinian Steakhouse : 熊抱阿根廷

2 July 2014, Wednesday

貓兄的外籍同事經常大讚特讚中環SoHo區的阿根廷菜Tango Argentinian Steakhouse, 5成熟的牛扒有多柔軟多美味, 聽得貓兄心癢難熬, 相約台山4寶前往, 奈何一眾好友無動於衷, 事件無疾而終...

上星期1600隻快閃熊貓落戶PMQ... 3個星期咁多喇... 貓兄約埋我今天去探熊貓, 順便可以來個熊抱阿根廷!!! 魚與熊掌, 兩者兼得, 呵呵, 減肥?!! 聽日先啦~ 我尋日已經消耗咗好多卡路里啦~

人間美食, 有時唔係你付出金錢就食到, 仲要付出汗水的... (嘩, 熱死人喇)

大熱天時, 要由中環地鐵站行到餐廳, 真的有點吃力... 大汗淋漓, 未到餐廳已全身濕透, 不停抺汗, 就算去到餐廳坐低了, 店員走埋來2次想落單, 我仍在抺汗, 真係咩好氣氛也被我抺走了, 有點大殺風景...

利用了不同的Pattern及質料來營造出簡單卻不失型格的餐廳入口..

大廳的裝潢歐陸味道濃厚... 木枱椅, 木地板, 以木組成的橫樑天花, 紅磚牆身, 有點迷霧的壁燈, 情調十足, 很適合熱戀中的情侶來談心...

Family Table 自成一角... 以刀叉湯匙茶匙來造的燈罩演活生活藝術...

剛過了午餐時間, 店內客人不多, 可以選擇座位, 貓兄與我不約而同選擇了陽台位置, 雖然熱一點, High Chair又不好坐, 但吊在天花的牛角扇令個Mood好像更悠閒, 而且可以與太陽伯伯一起用餐... (什麼? 剛才不是說天氣太熱很辛苦的嗎? 不是每天也努力塗防曬霜的嗎? 女人真愛講一套做一套)

看一看餐牌, 12 oz Ribeye Steak午餐$268包頭盤及飲品, 其他午餐一律$138包頭盤及飲品... 甜品另加$40... 選擇很多, 價錢也不太貴哦~

直覺貓兄必試12 oz Ribeye Steak才不枉此行, 唯天氣悶熱非常, 實在沒胃口幹掉12安士的牛扒... 點好餐後, 店員送上餐前麵包...

Toston, Garlic Bread (Lomo Iberico, Slow Cooked Tomatoes, Sweet Garlic Cream)
-- Toston係乜東東?!! 網上話係拉丁美洲流行的開胃菜或配菜, 將厚厚的綠色的芭蕉芯片煎兩次... 坦白講, 除了普通的麵包底, 我食唔出有咩係煎過的... 火箭菜好新鮮... 見到Iberico雙眼就發光的我, 今次要失望了, 鹹香欠奉, 質地乾硬... 小麥草與蕃茄除了新鮮, 沒其他... 醬汁的味道不錯, 整體唔難食但唔會推介...

Mixed Ceviche (Citrus Dressing)
-- 將海鮮浸在柑橘汁裡, 中南美洲的名菜, 源自秘魯... 三文魚的顏色略淡, 不太新鮮... 整體味道是OK的...

Grilled Calamari (Tomato and Avocado Salad, Lemon Aioli)
-- 烤魷魚好好好味呀!!! 肉質柔軟鮮嫩, 淡淡的魷味, 一邊咀嚼一邊滲出... 番茄同牛油果都好新鮮, 檸檬蒜泥蛋黃醬好惹味, 令沙律份外出色... Yummy Yummy, 推介給不用擔心膽固醇的朋友~