加國「喜行」の《舊生聚餐》Lago, Fairmont Chateau Lake Louise

23 April 2014, Wednesday 

[0-6°C] ~ Day 8 ~

跟得翠明假期, 比得近乎其他廉價旅行團雙倍團費, 咁緊係要食好住好嘅啦~

Honey的朋友聽到我地會係露易斯湖堡壘酒店住1晚兼食埋午餐後, 都不禁O咀, 佢話未聽過有朋友係度住, 多數好少少的旅行團都只會係度飲個下午茶...

暴走於結冰的露易斯湖上的照片實在太多(單日超過1200張照片), 加上日間暴走完夜間又再暴走多1次, 要一次過執晒所有相真係會人都癲... 都係捨難取易啦~~~ 寫咗餐露易斯湖堡壘酒店午餐先啦喂~~~

12:30pm 一眾團友用餐於露易斯湖堡壘酒店內的意大利餐廳 -- Lago!!! 入口好歐陸Feel呀!!!


Lago貫徹露易斯湖堡壘酒店的溫婉典雅, 歐陸式的陳設很有家的感覺, 既舒適又溫暖...



跟團去旅行的特別之處, 是要與來自五湖四海亳不相識的人同枱吃飯, 合不來的可能Just to say hi, 合得來的則會滔滔不絕談天說地, 好講求緣份... 今天要上演一幕緣份的天空!!! 同枱的8人大軍有的來自香港有的來自多倫多, 畢業於伊利沙伯官立中學, 一眾同學在畢業後數十年一起到溫哥華參加旅行團, 這份深厚的感情真的很令人羨慕, 更奧妙的是, 其中1人竟與Honey畢業於同一所大學同一個學院, 更曾受教於同一位教授(此教授已離開該所大學多年), 對方比Honey大10年以上, 以師兄自居一點也不為過, 2人即時打破隔膜, 攬頭攬頸仲影埋合照... 咳咳... 兩位先生, 唔該冷靜少少, 小心你地的溫情會溶化餐廳外超過1米高的積雪呀... 

相認前, 對方已超級熱情地主動提議幫我地影合照... (當然, 動機離唔開係想我地幫返佢地影合照啦, 屬人之常情)


呢隻披住七彩熊貓皮嘅美豚, 基本上無機會出鏡!!! 皆因洛磯山脈實在太凍凍凍凍凍喇!!! 都4月尾啦, 湖面都仲結緊冰, 加上厚厚的積雪, 4天行程每天都不時刮起大風雪, 我真係好擔心自己帶唔夠衫會凍病囉!!! 已經背心+衛衣+羽絨背心(薄)+羽絨外套(薄)+防風防水外套+冷帽(厚)+冷手套(厚)+頸巾, 十足5月稯咁, 但都唔多夠暖...


大家有1.5小時享用包括3道菜的意式午餐, 時間非常充裕, 可以慢慢品嚐箇中味道...

餐湯
-- 先來我最愛的南瓜... 湯!!! 開餐前, 要為大家先上一課英文課... S stand for?!! 不解釋!!! 呢個S在味覺上沒有太大貢獻, 相信整色整水都只求為突顯其6星級酒店餐廳的層次...


主菜
-- 又到咗100萬嘅問題, 當然要出動到50/50幫手!!! 1牛1雞, 分散投資... 牛柳肉質柔軟, 肉味香濃, 厚切仍然保持火喉均勻, 非常美味!!! 最抵讚的是服務員, Service要比200分, 同枱有人要求5成熟, 但出品界乎6成至7成, 服務員嘗試向客人解釋了1次, 客人不接受, 服務員真係去廚房要求重新煮過1份, 第2次的出品客人非常滿意, 好6星級的服務呀!!!




雞也不太差, 用上我最愛的部位--雞脾!!! 啖啖肉, 正!!! 在外國吃到的雞, 肉質當然不會嫩滑, 但這雞脾不至乾柴程度, 已算不錯... 伴碟的薯蓉超級滑, 好味到秒殺!!!


甜品
-- Choco mousse cake, 賣飛佛!!! 6星級酒店嘛, 賣相當然唔少得, 碟子全部畫上大大的"L"字, 嘻嘻, 今次我識, L stand for Lake Louise!!! 有外表, 更有內涵!!! 朱古力慕斯蛋糕好味得很!!! 朱古力味醇厚, 慕斯細緻滑溜, 好想好想再食多1件呀!!!



全個行程之中要數食物最美味的、環境最靚的、服務最好的, 非Lago莫屬!!! 今日真係好幸福呀!!!

2:00pm 各位團友, 我地要向Banff進發喇!!!

官方網址 :-
http://www.fairmont.com/lake-louise/dining/lago

Urbanspoon的Link :-
http://www.urbanspoon.com/r/72/1711977/restaurant/Alberta/Lago-Lake-Louise

是次每人消費約 HK$ N/A 元
味道： 5 環境： 5 服務： 5 衛生： 5 抵食：5
###
地址 : #111 Lake Louise Dr Lake Louise, AB
電話 : (403) 522-1898


加國「喜行大溫」2014 の 總匯 http://www.kenmerry.com/2015/01/Vancouver-Canada.html