燒肉の牛太・本陣 Honjin : 先苦後甘

5 June 2014, Thursday

KaKaMa同貓兄剛從泡菜國回來, 急不及待送上佢地係首爾買比我同龍媽的手信, 好興奮呀!!!

台山四寶飯局又來啦~~~

吖... 更正 : 6月之星壽宴又來啦~~~

都怪鑽媽又唔出席, 搞到E5飯局長期變台山四寶飯局... 嗯... 不如來個Stock Take吧!!! 近半年鑽媽無出席(甚至唔回覆Whatsapp)的飯局 : 印尼餐廳、秀韓國餐館、老趙越南餐廳+宏、隆姐泰國美食館+Smile Yogurt、Cafe Marco、PizzaExpress...
近半年鑽媽有出席的飯局 : E5 1月之星飯局Yamm、8B Annual Dinner Kitchen M、E5 11月之星飯局新斗記...
屈指一算, 原來已經有5個月無見過鑽媽... 鑽媽, 妳知道我在想妳嗎?!!


講返6月之星, 佢搵餐廳都搵得好求奇吓... 貓兄話去東九, 佢求其Search德福的越南菜/泰國菜/日本菜, 其實只要比小小時間睇一睇食評都會見到好唔妥... 後來佢按大家要求轉去apm, 睇得出佢又係求其Search越南菜/泰國菜/日本菜, 完全無睇過食評... 唉... 算喇... 但求出來聚一聚, 食咩都好啦~~~

本陣在1997年於日本兵庫縣姬路市成立...


網上食評狠批放題, 入座時我堅決反對食放題...

網上食評安排入座的職員態度極差, 今日得以一見, 果然真人與網評一樣差...

散叫限食100分鐘...

個帶位職員要我地坐呢張連椅背都無的枱, 我地要求坐卡位, 佢竟然話果張係8人枱, 唔係呀化?!! 2張枱明明一模一樣, 你當我地傻o架?!! 喧嚷一輪之後, 對座位要求最高的壽星竟然無拉隊走人, 噢, 咁我都唔介意坐左邊張正常木椅...


職員急於落單, 我真係一點都唔急, 又唔係食Buffet, Order咗你遲遲唔上菜我咪Cancel囉... 我都未坐定, 門口個職員已經走埋來催我地4-5次, 好煩呀!!! 壽星突然亂來, 都未決定好食咩就落單, 一路落一路揀, 搞到個職員等得唔耐煩走開咗幾次...

壽星越叫越多, 竟然無人制止佢, 職員仲慫恿佢叫$298的拼盤, 比貓兄一句"每樣得2片夠邊個食"拋窒, 結果Order埋和牛肋肉同和牛脊肉同壺漬和牛, 就係呢1分鐘開始, 我覺得個職員態度無咁惡劣... 講到而家由頭到尾都係1個職員(門口帶位, 入座, 落單)...

之後我地開始玩自拍神棍, 職員ssss好似覺得好好笑咁, 之後服務同氣氛開始好轉... 有先苦後甘的感覺... (注意 : 未至於甜)

開飯前, 派手信!!! 大豐收呀, Yeah!!! 貓兄同KaKaMa真係太客氣啦, 多謝晒呀, 呵呵呵呵...


可爾必思 蘇打 $19
-- Calpico日本乳酸菌飲料味道像益力多, 酸酸甜甜的, 溝梳打可溝淡酸甜味, 又有氣, 都幾好飲...


鮮蝦凱撒沙律 $49
-- 沙律醬6選1, 揀咗味道較清新的柚子醬油醋... 沙律賣相好嚇人, 蔬菜唔係太新鮮, 食咗1-2啖無食...


豬仔骨 $49
-- 全餐最失敗, 好難燒, 燒得耐又燶, 燒得唔夠耐整唔熟就大件事, 咁辛苦搞咁耐仲要食落口無咩肉, 呻笨...


雜菌牛油燒 $49
-- 上桌時無開孔, 職員發現後收返去開孔, 卻開錯在底部, 結果, 無論邊個方向放, 都係流走晒D汁, 燒到乾爭爭, 導致情況非常混亂, 都無時間/心情影相...


羊架 $69
-- 比翼雙飛的造型倒是頭一趟見... 羊架肉嫩, 夠膻夠鮮, 好味...


日本產黑豚腩肉 $69
-- 肥廋均稱, 燒起上來很搶火, 入口甘香, 肉質幼嫩, 豬味濃郁, 燒久了仍很Juicy, 好味...


秘制燒汁壺漬和牛 $129
-- 甜甜的, 全餐最好味, 肉質柔軟, 牛味濃郁, 仲有雜錦蔬菜可以燒吓...


嚴選霜降黑毛和牛肋肉 $149
-- 雪花分佈得好靚, 2面略燒一會, 蘸點鹽吃已非常滋味... 油脂甘香, 肉質柔軟, 牛味濃郁, 要合上眼慢慢享受...


嚴選霜降黑毛和牛脊肉 $149
-- 同樣是嚴選霜降黑毛和牛, 牛脊肉的賣相不及牛肋肉, 肉質同樣柔軟, 牛味同樣濃郁, 好味...


極上厚切牛舌 $69
-- 我最怕食牛舌豬橫脷之類, 唔知點解佢地第一樣就叫牛舌, 都幾爽口嘅, 味道都OK, 但過唔到心理關口, 1件夠晒數...


燒呀燒, 快搶燒... 食呀食, 食它吧!!! 燒得好, 食得鬼馬, 可稱霸只有它!!! (有無人知係改邊首歌的歌詞?!! wakakaka)


場內通風系統麻麻地, 食咗一陣已濃煙密佈...

環境唔算好, 因為椅子不好坐, 服務唔算好, 價格中庸, 食物質數不太差, 唔介意服務同椅子的話, 可以一試... 

時間1分1秒過去, 我地未夠鐘一早就食完, 就算傾多陣計都未夠鐘埋單, 不過好想轉場食FoYo, 所以未比人趕走自己已經走夾唔抖... 點知... FoYo無4人枱, 結果轉場去Starbucks飲咖啡食蛋糕...

我部手機(Sony Xperia Z1)影相始終無部相機(Sony Cybershot RX100)咁好, 影出來的相片又暗又無光澤... 定係因為中午落大雨時淋到全身濕透, 無心機影呢?!!

是次每人消費約 $240 元
味道： 4 環境： 3 服務： 3 衛生： 3 抵食： 3
###
地址 : 觀塘觀塘道418號創紀之城五期(apm)4樓23號舖
電話 : 2172 6322