加國「喜行」の 出發鳥

16 April 2014, Wednesday

Honey同我都係第一次踏足加拿大(對我來講甚至係第一次踏足北美洲), 我地同樣都係第一次出席海外婚禮, 都咪話唔興奮, 出發前當然要做足功課喇, 搵旅遊景點, 研究交通方法, 除咗要搵酒店附近有咩食邊度有超市, 仲要搵埋酒店附近邊度有Coin Laundry, 都咪話唔攰...

居然仲可以懶懶閒, 第一次出發前7日都未搬行李篋出來執o野, 以前係緊張大師, 6星期前就搬定出來, 超Crazy, 哈哈...

第一次離開香港14日咁耐...

第一次出動3個行李篋咁多... (回程時更誇張到要借用"國寶"紅白藍膠袋)


原本時間上係夾唔到免費機場轎車接送服務(Airport Limousine), 又因為我地懶懶閒, 收唔到Redemption Coupon又唔去追討, 等到出發前2個月先醒起, 結果錯有錯著, 舒舒服服, 一陣間就由屋企直達香港國際機場...


由於長途機的關係, 2個人坐窗口位係無著數的, 出入極唔方便, 一定要揀中間果排邊位, 仲要遠離廁所同機尾, 又要避開Baby Seat, 2日前已急於在網上辦理登機手續, 取得手機登機證... 到達機場時, 迷迷糊糊地見到"自助登機專櫃"就衝埋去, 個職員又唔問清楚就點咗我去馬可孛羅會會員專櫃排隊, 搞到勁瘀, 唔知情嘅會以為我地係第一次搭飛機...  

成功將行李寄艙後, 循例到美心飲茶... 去到門口先發現轉咗名做"美心.翠園 (Maxim's Jade Garden)", 不以為然地入咗去, 結果... 貴咗唔緊要, 但好Q難食, 同以前相差太遠, 絕對無下次...

詳細食評 : http://www.kenmerry.com/2014/05/maxims-jade-garden.html

正所謂有得洗唔洗, 罪大惡極!!! 我地明明好飽, 明明無咩時間剩, 但死都要用埋Pirority Pass個免費香港機場貴賓室 (Airport Lounge), 入到去齋拎支蒸餾水來食定通鼻塞藥, 坐咗唔夠15分鐘, 幫襯埋個Toilet就極速閃人... 上次East Hall入面裝修靚D私隱度高D, 今次West Hall十足街邊茶記...



去到登機閘口見到咁多人排隊都幾驚... 我地似乎係排最尾... 好彩我地得個細細旅行袋同背包要放上去行李架, 就算無晒位都可以放腳底, 會辛苦D囉... (幸好最後都可以放上行李架)


坐係Honey旁的年青小伙子, 一直玩弄其iMac, 縱使機師多次廣播, 佢都當成耳邊風, 直至空姐發現並要求佢關機, 佢都只係將iMac插到椅背的袋上, 空姐一轉身, 佢又再9秒9拎部iPhone出來玩, 之後又比空姐發現要佢收機... 查實有無咁"機"渴呀?!!

事前準備充足, 起飛前1小時食咗通鼻塞藥, Ear Block情況輕微, Happy, Lucky!!! 

起飛後不久, 開始派發飛機餐...

松子蕃茄菠菜奶油汁意式長通粉
-- 味道還可以, 茄汁底長通粉加分, 總算吃得完...


 唔想Jet Lag, 死都唔瞓!!! 睇咗2部電影--《哈比人：荒谷惡龍》 (The Hobbit: The Desolation of Smaug) 同埋《雷神奇俠2：黑暗世界》 (Marvel's Thor: The Dark World), 又再開始派發飛機餐...

香草奶油鮮菌奄列配煙肉、雞肉腸及香草蕃茄
-- 之前2餐都未消化, 呢餐味道又有點倒胃口, 食剩大半... 之後多個小時胃部也感到不適, 有點想吐...


繼續死撐(開對眼)!!! 再睇多1部電影--《超人：鋼鐵英雄》(Man of Steel)...

飛機上的一段小插曲, 令我實在看不過眼, 忍不住要四處張揚... 坐我右邊窗口位的是1位印度男人+1位印度女人+1位白人男人, 印度男人靠窗坐, 身軀非常有份量, 完全不可能正常地面向前坐, 全程11小時是背靠窗斜坐...

不記得何時, 只記得當時機內黑漆漆, 當白人男人離開座位去洗手間時, 印度男人見機不可失, 亦跟著行出來, 但被白人男人的耳筒阻住, 佢居然拔起猛力掉到地上, 到白人男人回來時, 到處搵耳筒, 都搵咗好耐, 我忍唔住係椅底個手袋度拎部電話出來開電筒App幫佢搵, 原來掉咗去我前面個位旁, 我拍吓白人男人, 佢見到我照住佢個耳筒就拾起, 我同佢講:"I saw someone drop on floor", 事件完結?!! No!!!

不記得何時, 到機內重見天日, 當白人男人離開座位時, 印度男人又再度出動, 今次仲過份!!! 當時白人男人已回到座位旁, 見印度男人蠕動緊出來, 就企係度等, 點知... 個印度男人覺得人地勾住椅背的外套阻住佢, 佢居然當住人地面前, 拔起猛力掉到地上, OMG!!! 咩人渣o黎o架?!! 放係人地椅上都得啩, 出奇地白人男人只係盯住整個過程, 居然無出聲亦無出手, 好o野!!! 呢啖氣比著我真係吞唔落...

另一段小插曲, 係Meat Products入境事宜... 事前擔心Honey會食唔落第2餐飛機餐會餓親, 買定美珍香豬肉乾比佢係機上食, 最後都無食, 剩返不足4小時左右時發現入境表要填Meat Products, 問過空姐話應該唔入得境, OMG!!! 即刻打開來吃, 居然有5大片(真空獨立包裝), 真係食唔晒, 我同Honey 1人KO 1片, 剩下3片真係唔想浪費, 我就拎咗去空姐休息區, 佢地當然婉拒, 但我真係唔想浪費, 所以強行放下, 哈哈, 呢個乘客好粗暴呀!!! (後來空姐運送其中1片去前面Business Class區域比其他同袍, 竟然又再同我Say Thank You, 好利害呀, 機內黑漆漆都知我坐邊) 我都有向佢地Say Thank You, 多得佢地幫手食我先唔洗浪費食物咋...

11小時的機程, 只剩下不足2小時, 根本不足以再睇多1部電影, 唯有摸呢摸路, 時間緩緩地流走, 準時到達(YVR) Vancouver International Airport, 呢程長途機比想像中輕鬆...

Welcome to Canada!!!


[11°C, Rain]

外籍人士入境條人龍超長, 入境職員處理超超超超慢, 好似排咗接近1小時, 終於被分流到Counter再排, 我正前方2個Counters正處理2位單身女士入境個案, 超勁耐, 可能我表現得太不耐煩, 又或者我背脊的熊熊烈火燒得太猛, 入境職員問我地住邊, 我急急答"Radisson Hotel, Next to Aberdeen Centre", 可能講得太快, 佢露出奇怪表情問"Aberdeen Centre?!!", Honey同我都同時搶住補充"Radisson Hotel", 未知是否太來勢洶洶, 入境職員即時蓋入境印放行, 我即場O咀, 仲諗住有排問, 好無癮, 哈哈哈... 我地離開時, 隔離Counter個單身黑髮大嬸都仲未被放行, 佢係我地被分流前已經被盤問緊...

一路上唔覺有海關Check行李, 我所擔心的豬肉乾事件有點白擔心... 

初到貴境真係有樣睇, 正當我頭惡惡咁週圍搵酒店Airport Shuttle的電話, 義工老伯伯好友善咁走埋來幫忙, 雖然佢話唔Sure, 但都指示我地去到正確位置... 原本想去埋7仔買埋Voice+Data電話卡, 不過老伯伯講到好似攀山涉水, 好驚, 放棄!!! (其實唔遠, 不過要拖住3個篋又上又落都幾煩)

只要步出機場, 就會見到Green區, 只要係電話亭搵到自己間酒店名, 輸入Shortcut就會駁到去酒店, Radisson Hotel就要按*16, 非常方便... (過咗Green區, 前面就已經係Skytrain, 其實坐Skytrain去酒店都好方便, 不過無理由有免費車唔坐o架)


等咗20分鐘, 再加多5分鐘, 酒店Airport Shuttle終於到達... 原本得我地2個, 回酒店途中司機又接到Call, 要兜去Terminal 2接多1個客, 所以耐咗少少, 否則車程只需十多分鐘...


甫步入酒店, 朋友已在等候, 其實佢有話去機場接我地, 不過我地怕麻煩到人, 堅持要坐酒店免費車, 比咗房租無理由唔用, 結果浪費咗自己時間, 好無聊, 哈哈哈...

放低行李, 朋友即刻車我地去最最最緊要的地方--7仔!!! 買Speakout7eleven Voice+Data電話卡, 價格及詳情稍後分享...


之後朋友車我地去佢屋企參觀... 做加拿大人真幸福, 中產階層已可住House+前後花園... 好羨慕呀!!!!!!


朋友急不及待車我地去第1個景點--漁人碼頭 (Steveston Village Fisherman's Wharf)!!!


由於天色已晚又下著雨, 商店已關門, 遊人亦稀少, 海邊又大風, 我地又著涼鞋, 又20小時以上無瞓過, 覺得好好好凍, 所以只拍了少許照片便離開, 擇日再來!!!


跟著朋友車我地四處看看Richmond (包括工業區), 之後竟然又車返我地去機場?!! 哈哈, 原來朋友的太太在機場工作, 接過7PM放工的太太後, 大家一起到Richmond Centre對面的怡園粉麵茶餐廳 (Excelsior Restaurant)一起吃晚飯...

詳細食評 : http://www.kenmerry.com/2014/05/excelsior-restaurant.html

吃飽飽朋友車我地返酒店, 沖個熱水涼便倒頭大睡, 接近30小時無瞓過, 由11PM瞓到3AM, 4AM再瞓到9PM, 完全失去知覺!!! (其實坐Skytrain返酒店都係2個站, 好方便)

加國「喜行」の Day 1... <<完>>

加國「喜行大溫」2014 の 總匯 http://www.kenmerry.com/2015/01/Vancouver-Canada.html