Ken & Merry 為食男女，遊走世界!!!: 加國「喜行」の《香港情濃》Aberdeen Centre 時代坊品嚐「三大名物」風沙雞翼&海南雞飯

17 April 2014, Thursday

[8-11°C, Light Rain] ~ Day 2 ~

前文提要... 早上去龍景軒飲完早茶, 中午搭SkyTrain去Downtown, 下午坐咗一陣Big Bus (Hop-On Hop-Off Sightseeing Tour Bus)~ 5PM打道回府返到酒店~

今晚無約人食晚飯, 兩口子去咗酒店對面的時代坊(Aberdeen Centre)行吓商場食吓晚飯...

Aberdeen Centre於1989年興建, 將亞洲購物中心模式引入大溫, 為中西合壁以亞裔客戶為主的高級購物中心, 吸引消費力強之主流及華裔客戶, 為華人提供較高級消費選擇之熱點~

地址 : 4151 Hazelbridge Way, Richmond, BC V6X 3R8加拿大
電話 : +1 604-270-1234
網址 : www.aberdeencentre.com

Aberdeen Centre內有大形音樂噴泉, 都幾似N年前屯門八佰伴果個, 童年回憶一下子湧上心頭, 令我對Aberdeen Centre產生了無形的親切感...

再行多陣, 嘩嘩嘩!!! 10元店呀!!! 貨品同香港9成相似呀, 因為香港Aeon 12元店賣的好多都係Daiso產品, Richmond呢度應該叫2蚊店, 大部分產品售價為CA$2 (約HK$14)... 唔知係咪外國的月亮特別圓, 我覺得呢間Daiso的產品賣相都特別嫵媚, 行完Daiso對Aberdeen Centre的歸屬感更加強烈...

之後路過呢間Saint Germain Bakery麵包店就買咗1袋6個全麥餐包CA$3.25 (約HK$23)第2朝做早餐... 見到店內剪報話佢地出名係現場制作蛋糕, 好奇望入廚房, 真係整緊蛋糕喎, 無花無假... 最正嘅係, 店員同我講廣東話, 超親切~

再向前行係H-Mart 韓亞龍超級市場 (www.hanahreum.ca), 制作韓國料理所需要的材料及用品一應供全, 最有親切感的農心辛辣麵呢度都有...

香蕉 CA$0.65 (約HK$4.5)~

韓式核桃糕 CA$1.99 (約HK$14)~ 紅豆餡, 超正~

原來翠明假期係Aberdeen Centre開咗分店!!!

嘩!!! 連Miniatures都有呀!!! 嗯... 不過一間微型Cafe要賣成CA$1888 (約HK$13200), 未免太貴... 如果我來呢邊生活都可以考慮吓靠售賣手作仔維生, 1個月賣出1套都夠皮~

逛完就去Aberdeen Centre的Food Court品嚐「三大名物」-- 風沙雞翼同海南雞飯!!!

6隻風沙雞翼 CA$9.5 (約HK$66)
-- 嘩!!! 超級超級好味呀!!! 超級燙嘴, 好香, 又酥又脆, 好惹味, 仲唔乾爭爭, 太正喇, 食到唔停得口, 不愧為Aberdeen Centre三大正物!!! 味道係一流, 嘿, 不過賣相就欠奉~ 我唔係誇張, 風沙雞翼魅力真係沒法擋, 隔2個舖位韓國食店個女職員都公然企係佢地Counter入面食緊...

海南雞飯配湯 CA$7.75 (約HK$55)
-- Aberdeen Centre三大正物之一的海南雞飯又係超級超級好味呀!!! Honey食一啖已激讚好味, 雞肉滑嫩到呢, 去咗骨, 勁多肉, 調味又恰到好處, 係香港係食唔到的, 正宗新加坡味道, 椰香白飯香到不得之了, 連跟餐的湯都唔係省油的燈, 足料到呢, 仲要無味精... 重點係, 呢度係Food Court咋喎, 質數比香港的餐廳更高!!!