隆姐泰國美食館 Lung Jie Thai Restaurant : 中伏!!! 九龍城泰人泰菜唔一定好食

27 February 2014, Thursday

記憶中, 已經好耐無o黎九龍城食飯...

KaKaMa未做KaKaMa之前, 好鍾意搵埋我同貓兄週圍搵食, 九龍城係我地搵食熱點, 回憶中, 每次來搵食都係好味的, 特別係泰國人主理的泰國菜... 咳... 唔好諗太遠, 都只係講緊新機場已經運作緊的年代...

今日唔知邊樹來的雅興, 我地又重臨舊地了...



餐廳由貓兄搵, 我可以休息吓, 呵呵...

開餐前, 我同貓兄走咗去曲奇四重奏試食曲奇, 試咗好多款, 好滿足, 呵呵~ (我地一袋二袋咁行出門口, 唔係齋試唔買嘅呢)

來到餐廳門口, 看見內裡的格局, 不禁有點心寒, 但隨即安慰自己, 可能敗絮其外金玉其中呢, 不要隨便以貌取人...


由於事前我無調查貓兄所選的餐廳有什麼好吃, 所以事發時亦不應該發表任何怨言, 現在來個有碗話碗的事後報告...

泰式拼盤 $96
-- 很不濟... 蝦餅唔好味, 春卷勉強OK, 魚餅不成, 蝦卷OK... 餐牌上列明的香葉包雞不見了...


泰式柚子沙律 $48
-- 唔明柚子沙律點解又有木瓜, 木瓜好酸好硬, 柚子多汁, 不太甜, 但唔明點解食到一陣膠碟味...


蒜蓉炒椰菜苗 $58
-- 椰菜係我的天敵, 泰侍應話椰菜苗唔係椰菜, 好, Try Try... 結果... 中伏!!! 個樣係唔似椰菜, 一咬, 100%椰菜味, OMG!!!


香葉辣椒蝦球飯 $50
-- 少辣都辣到飛起, 除辣椒味外, 完全沒有味道... 蝦尾黑黝黝, 有點可怕... 好後悔...


泰國椰青 $33
-- 椰青汁清甜, 椰青肉又硬又薄, 好硬刮, 刮到都黐住椰殼, 很沒趣, 放棄椰青肉...


龍眼冰 $18 椰汁冰 $20


咖喱南瓜軟殼蟹 $148
-- Poster的咖喱南瓜海鮮係$138, 寫住海鮮可以轉軟殼蟹, 但無提不加錢, 重點係, 完全無咖喱味!!! 南瓜肉不香不甜... 軟殼蟹係用梅林牌... 落單後仲要等30分鐘先有得食, 嘿...


薄餅 $25
-- 本想用來蘸咖喱汁食, 可惜, 咖喱無咖喱味, 點了薄餅也徒然...


糖水 (送)
-- 竟然係全餐最好味的!!! 應該話, 全餐都好難食, 呢個芋頭西米露只係OK好味...


埋單Cash Only!!! 要收茶錢(人頭計), 無加一...

8:05PM 門口已有好多人等位... 剛好只吃了1小時, 500大元, 吃了這餐有點倒胃口的東東, 我可否說它一點也不便宜?!!

店內係快餐店格局, 雖然有卡位坐, 但係張枱都好細, 仲要坐咗一陣突然有個超大黑影接近身貼身咁背住我坐, 好驚驚呀!!! 之後阿姐居然係我地卡位背部中間上菜, 聲都唔聲, 如果我將頭移近貓兄個頭, 成碟餸就倒頭淋... 

是次每人消費約 $167 元
味道： 2 環境： 2 服務： 3 衛生： 2 抵食： 2
###
地址 : 九龍城衙前塱道2A-B地下
電話 : 2383 5382