今日力仔請客, 酒微菜薄, 招呼唔到, 大家飲多幾杯啦...
主人家包咗間房, 擺得落3圍之餘, 仲可以擺多2張中枱比人係未入席前坐低飲杯茶傾下計... 5星級酒店, 5星級服務, 細細聲話你知, 佢仲係米豬蓮指南擇過星嘅呢... 金色的枱布, 紅色的座椅, 配上中式古雅擺設, 簡約中見心思... 枱與枱之間有一定距離, 坐下後感覺好寬敞, 在這裡請客一點也不失禮...
未入席前房內有最少2名職員Standby, 因為今日著長褸, 放係椅背可能會拖地, 我問職員可否推個掛衣車入來掛外套, 佢真係辦得到, 仲主動建議將掛衣車放在柱後, 大方優雅, Very Nice, 服務滿分!!! 我掛好外套後一眾賓客相繼掛起外套, 掛衣車瞬間已爆滿...
入席前大家高興地合照, 職員亦很樂意幫忙拍大合照, 唔該晒...
入席時間到了, 先生們, 女仕們, 小朋友們, 我地將帶領你們進入一個充滿夢幻的美味世界, 請坐好, 切勿離開座位... (嘩咔咔咔, 似唔似主題公園的廣播呀)
鴻運金豬喜當頭 (Yummy No. 3)
-- 職員將乳豬全體帶到枱邊Show咗幾秒, 我連伸手攞相機的時間都無, 鴻運金豬就被帶走了, Oh No!!!
飲杯!!!!!!!!!
乳豬的皮超脆, 輕輕一咬, 噗一聲, 再咀嚼, 嗦囉嗦囉... 職員分比我果幾件都無肥膏, 啖啖肉, 肉汁在口腔內徘徊, 香味四溢, 好得呀!!! 平時練仙唔肯食o野的姪女食完4件竟然話要Encore, 掂!!! 我都想Encore, 不過我嘅BMI已經爆晒燈, 無晒Quota, 都係忍下口好...
美極乾煎大蝦碌 (Yummy No. 2)
-- 上枱時大家都嘩一聲, 大蝦碌真係堅大囉!!! 雖然賣相一點都不花巧, 但睇下都知好味...
飲杯!!!!!!!!!
大蝦碌煎開為2段, 蝦頭果段的蝦肉亦很大, 內臟已清掉, 十萬個放心咬下去... 蝦肉鮮甜, 爽脆彈牙, 加上美極更是鮮甜惹味, 嗚嗚嗚嗚, 好好味呀!!! (感動中)
嘻嘻... 因為我地果枱唔夠12個人, 所以我秒殺大蝦碌後, 極速再夾多1隻, 仲暖笠笠的, 爽爆, 呵呵呵呵...
富貴鵝肝花姿丸 (Yummy No. 1)
-- 咦... 炸薯波?!! 好巨型喎...
飲杯!!!!!!!!!
一切開, 白雪雪花姿丸內的鵝肝奪眶而出, 多到塞唔返入去花姿丸內!!! 吃時要小心, 睇住香煙擁出來, 超熱, 超燙嘴的!!! 外皮脆脆的, 花姿丸好彈牙, 鵝肝油潤, 比美出奇蛋, 1粒丸入面, 帶比你3重驚喜!!! 花姿丸鮮味, 鵝肝甘香豐腴, 呀!!!!!! 好好味呀!!!
嘻嘻... 我前後好似秒殺咗3粒, 滿足到暈, 呵呵呵呵...
鼎湖上素
-- 食肉獸休息時間... 為了掩人耳目, 同姪女玩下我部手機入面個相機的AR效果先... 慶祝活動模式同化妝舞會模式好啱今晚用, 姪女用時尚的士高模式就笑到彎晒腰咔咔大笑...
海皇燕窩羹
-- 我一向唔太喜歡羹湯, 呢度都唔算太差, 以漿糊度來計算的話... (最怕杰身的)
福祿鮮鮑片
-- 鮑片鮮甜, 口感柔韌有嚼頭, 鮑汁味道也不錯... 吃罷鮑片就停手是我的一貫作風, 呵呵呵, 食肉獸, 食肉獸...
清蒸大海斑
-- 嘩, 好多薑蔥呀!!! 魚頭面目有點猙獰, 好兇猛吓... 魚肉鮮味滑溜, 蒸的火喉剛剛好, 豉油鮮甜, 不過我宴席前半段食得太多, 已經好飽, 食了一小碗海斑便夠喉...
當紅脆皮雞
-- 大家都飽到呆了... 我夾了雞翼來吃, 肉質不老不嫩, 味帶鹹香, 大家淺嚐後剩下大半碟便叫職員打包, 最後塞了給的, 第二晚叮熱來拌湯米吃, 仍然好美味... 又食又拎, 掙晒, 呵呵呵呵...
太極鴛鴦飯
-- 大家都已經飽到反白眼, 職員奉上時問要唔要分, 我地答唔需要... 如果填得1碗滿滿的, 一定唔會有人食... 我只滔了一湯匙茄汁飯給自己同Honey, 酸微微的, 很醒胃, Honey居然Encore咗2次, 勁!!! 其他人見狀, 又滔少少試試, 均讚好味...
金瑤伊府麵
-- 哈哈... 個伊麵呢?!! 個伊麵去咗邊呀?!! 點解無相睇嘅?!! 係... 係我失職, 唔記得影相, 又無試味, Sorry囉...
生磨合桃露
-- 入口幼滑充滿合桃香, 味道甜美, 不稀不杰, Yum Yum... 返到屋企先發現, 除咗打包咗雞之外, 竟然仲有碗合桃露, 講, 係邊個塞入去嘅?!! 點解無人同我講, 差點打瀉了... 第二晚食完打包雞, 再叮埋打包合桃露來飲, 依然美味...
嘉福美點雙輝映
-- 因為比姪仔捉住我玩Double包剪揼, 玩咗好鬼耐, 之後嬸嬸又走埋來吹水(姪仔已逃之夭夭), 吹咗好耐, 到大家散席時我先發現美點雙輝在枱上, 急忙放入口試味... 奶皇水晶包放涼了, 不太甜, 皮很薄, 不錯... (大家話太甜, 可能佢地熱食)
煎堆仔一向不是我杯茶, 沒有什麼驚喜, 亦不難吃...
主人家帶了紅白酒來, 店方話如果係佢地度開一枝酒就免一枝自携酒的開瓶費, 都Fair...
今晚的食物太美味喇, Honey好少會由頭食到尾, 好彩早餐只吃了餅乾, 午餐只吃了麥皮... 餓著來, 飽到捧著肚皮走... 大滿足!!!
多謝主人家的款待, 散席時一對金童玉女還在門口與賓客握手送別, 太客氣了... 祝你地白頭偕老, 永結同心!!! 嘻嘻, 好老土咩?!! 一生受用喎!!!
是次每人消費約 $N/A 元
味道： 5 環境： 5 服務： 5 衛生： 5 抵食：3
###
地址 : 尖沙咀麼地道70號海景嘉福酒店B2層
電話 : 2731 2883
沒有留言:
張貼留言