丼丼屋食堂 Dondonya Shokudo : 130蚊的鰻魚飯

15 January 2014, Wednesday

唔知點解, 硬係鐘意去大X屋多過去丼丼屋, 其實丼丼屋食物都唔錯, 不過係份量較少...

今日路過丼丼屋, 興起又走入去食吓...



時間尚早, 門外未有人潮出現...


中間個卡位好似幾正...


我地今晚坐呢種半梳化位, 都幾舒服...


寒冷天氣警告生效中, 店方免費供應熱水...


鰻魚石頭鍋丼 $118
-- 新菜色, 試下先!!! 昨天的新聞話中環快餐店鰻魚飯賣$100全城起哄, 呢度嘅鰻魚飯加埋一要130蚊, 鰻魚份量偏少, 鰻魚汁不太夠, 慶幸鰻魚尚算肥美, 入口沒有腥味...


撈呀撈呀撈...


咦?!! 居然有飯焦!!! 個石頭鍋真係好熱喎...


牛肉石頭鍋丼 $73
-- 好驚嚇... 牛肉竟然係生的!!! 快手快腳將牛肉推向邊緣, 搞咗一陣, 好彩都熟, 味道係黑椒味囉... 後來Honey發現要加埋旁邊碗醬汁先會好味...


升級為定食 +$15
-- 包括小食, 沙律, 麵豉湯... 貌似牛蒡絲的小食, 食落味道應該係荀絲, not 賣飛佛... 沙律都幾新鮮, 柚子汁酸酸甜甜幾好味... 麵豉湯有點奇怪, 不是平時慣常飲到的麵豉湯...


枱面有醬料架, 無用武之地...


環境原本係OK舒服的, 但搭枱的小女孩爬上梳化後, 用對鞋底對住我不斷爬來爬去扭動身體, 不斷出現我件羽絨外套差點幫佢抺鞋底的驚險場面, 佢外婆叫咗佢十幾廿次坐好佢都當耳邊風, 佢都起碼都小三, 唔係K3, 我真係好想狠狠的教訓佢...

明明記得好似係行出去收銀埋單, 但枱面又無單, 以為自己記錯, 之後叫職員埋單, 佢先臨急係唔知邊度拎出單出來, 叫我地去門口比錢...

去到門口時, 發現我第一次來幫襯時遇到的光害問題已解決...

食完成個人無晒Mood, 應該係因為... 唔好味囉... 未至於難食...

是次每人消費約 $110 元
味道： 3 環境： 3 服務： 3 衛生： 4 抵食： 3
###
地址 : 太古太古城道18號太古城中心1樓102號鋪
電話 : 2164 8636