泰出色泰國餐廳 Chilli Thai Restaurant : 淨飲青咖喱汁

14 January 2014, Tuesday

繼續放工搵食系列... 今日好有雅興, 坐幾個站地鐵去天后搵食... 鎖定咗一間泰國菜同一間甜品店...

先食泰國菜, 門外搭了棚, 門前有個傳統報紙檔...



店外可以望到店內的Open Kitchen...


一貫泰式餐廳風格, 擺放了鮮花供奉神明...


時間尚早, 店內未有其他客人... 我地有卡位坐之餘仲可以揀位, 緊係坐係隻大帆船側邊啦...



好, 睇下餐牌有咩好食先...


泰式大蝦金邊粉 $72
-- 飯麵唔係應該最遲上嘅咩?!! 居然最早來?!! 金邊粉炒得均勻, 軟硬適中, 少少酸少少甜, 加埋櫻花蝦的鮮, 花生碎的香, 肉質爽脆的大蝦, 整體味道配合得好平衡, 好味, 食幾注就無晒...


沙嗲串燒 (豬/雞) 半打 $68
-- 豬肉及雞肉各半, 賣相不俗... 先試雞肉, 唔蘸沙嗲醬住, 嗯, 好香喎, 應該用金不換醃過, 面頭有少少青綠色, 肉質柔軟, 少少焦香, 好味呀!!! 再試下蘸埋沙嗲醬, 沙嗲醬好杰身, 花生的香味好強勁, 好味!!! 到豬肉, 都係用金不換醃過, 好香, 肉質柔軟, 少少焦香, 好味!!! 一樣係蘸唔蘸沙嗲醬都咁正!!!


焗酥皮青咖喱 (雞/牛腩) $138
-- 其實呢, 無酥皮的青咖喱係平一半, 不過見酥皮青咖喱個器皿咁Cutie, 好想試吓... 我同店員講要"鴨仔青咖喱", 睇清楚, 似雞多一點喎, 嘩咔咔咔... 個酥皮超薄呀, 焗到金黃色好靚呀, 不過味道原來同青咖喱唔係好夾...


推開酥皮, 入面有好多牛腩, 仲有茄子同青豆... 青咖喱好香椰奶味, 辣得來有少少甜, 好好味, 撈白飯食一流... 雞仔器皿仲好保溫, 食到落底青咖喱汁都仲好暖, 太好味, 無晒飯, 我就咁用鐵匙舀青咖喱汁來飲, Yummy!!!


椰青 $38
-- 好多椰肉, 好厚好結實, 青咖喱辣到我飛起, 好神奇, 飲一口椰青即時止辣...


埋單3百幾?!! 咁貴?!! 落單時唔知椰青同白飯幾錢... 原來椰青要 $38, 白飯 $14... 真係飲椰青唔知貴囉... 不過食物真係幾好味, 都值得再食...

店員都好似係泰國人, 識講廣東話...

好坐卡位的話一定要訂位, 好似都幾Full...

焗酥皮青咖喱牛腩太足料, 飽到唔郁得, 取消甜品行程... 2個人來應該唔好叫金邊粉, 叫2個白飯來撈青咖喱汁食一流...

是次每人消費約 $170 元
味道： 4 環境： 4 服務： 4 衛生： 4 抵食： 4
###
地址 : 天后電氣道86號
電話 : 2571 2287