八月芳 Xi Yue : 菲林卷。手快有、手慢無！

30 November 2013, Saturday

八月芳由始至終我只吃過午市, 皆因平日午市真係唔多掂, 對晚市完全無信心...

驚險舊文重溫 : 鳥籠點心、商務套餐... 
正常舊文重溫 : 港島東農墟...

八月芳的週末特價茶市質數出奇地高, 重點係唔使點排隊, 價錢又唔貴...



呢篇唔好當佢係食評, 純粹試下買咗唔夠1個月的新手提電話Sony Xperia™ Z1嘅拍照功能...

今日個位唔錯, 靠牆坐仲有盤花睇下, 仲要係4人枱, 勁鬆動...


行近埋張枱時, 見隔離枱(前方)得2個人飲茶, 但係就放咗2碟菲林卷係枱面, 真係咁好味?!! 我又即刻Order咗1碟... 之後聽到侍應同隔離枱(左方)講無晒菲林卷, 之後又再聽到侍應同隔離枱(後方)講無晒菲林卷... 我仲打定輸數, 點知我地竟然有得食喎, Yeah!!! 芝麻味好濃, 唔太甜, 滑得來有彈性, 好好味!!! 手快有、手慢無!!!


終於知道要點就個手機鏡頭角度...

桂圓茶湯圓好夠薑之餘又重桂圓味, 好得!!! 麵醬燒茄子似煎釀三寶濕水版...


呢個鱆魚肉餅飯, 落單後吹咗2次, 足足1小時先拎出來... 味道OK...


仲有鮑魚汁炆鳳爪... 味道夠, 唔夠腍...


菠蘿鮑魚雞粒酥... 牛油撻入面加咗雞肉餡再鋪上菠蘿皮, 都幾特別, 但好似唔係幾夾...


我幾鐘意呢度個前菜, 因為有鹹酸菜...


呢度最正係茶客都屬於文靜, 無半點嘈音...

今晚有宴會, 茶市提早於3:30PM收...

是次每人消費約 $80 元
味道： 4 環境： 4 服務：3 衛生： 3 抵食： 4
###
地址 : 鰂魚涌英皇道979號太古坊康橋大廈1樓
電話 : 2284 4868

[ 拍攝器材: Sony Xperia™ Z1 ]