Kitchen M : 來亦難時去亦難

6 December 2013, Friday

今日繼續11月之星飯局!!!

上星期五先食咗, 今日又再食?!! 是的!!! 上星期五係E5小組食, 今晚係8B大組食, 又或者可以稱呼呢餐做8B Annual Dinner, 我都要向貓兄寫個服字, 咁世紀性嘅活動都比佢搞得成, 勁!!!


壽星原先揀咗去尖東, 話方便無敵, 查實我無咩異議, 但無理由唔溫馨提示一下主人家, 上次Outback嘈到拆天搞到人人散席時喉嚨痛爆的慘痛經歷, 結果唔知點解一個屈尾十就變咗去K11, 搞到有人想乘機用"如果有人就唔到小朋友佢可以唔來"做藉口放飛機, 嘿, 想放飛機?!! 邊有咁易吖...

Kitchen M可列入搵難餐廳指南一星!!! 我同貓兄一齊係尖沙咀地鐵站N4出口出, 隨即去CS問路, 上次係CS問點去帕莎 Al Pasha基本上相當成功, 今次簡直嘔血!!! 問咗4次點去Kitchen M, 個CS依然阿呆x阿夢上身, O咀兼眼神恍惚, 再問佢邊部Lift去到 (因帕莎只有1部好隱閉的Lift去到), 佢答部部都得, 咁我地求其搭1部, 結果真係部部Lift都去到, 但我地兜咗3個圈都搵唔到間餐廳, 後期已經係跟住Shop Numbers行晒成個商場, 最後搵到Floor Plan, 原來要穿過時裝店轉幾個彎先去到, 比你如果有間時裝店係要穿過酒樓的大堂+內堂+廚房厠所先去到嘅, 你路過酒樓大堂時會唔會估到有間時裝店係入面?!!

穿過時裝店後看到的第一眼, 白色的矮身磚牆後, 有個幾cm高的視窗!!! 唔似比客人望入去的Open Kitchen, 我地坐得咁近好似被廚房監視住咁...


鑽媽話最大的枱比人Book咗, 只剩下8人枱要我地9個人坐... 實情係... 我地就係全場最大果張枱!!! 全場都係呢d可以左右無限拼拆的茶餐廳木枱, 2人枱放藍麵包已經細到無位擺其他食物!!! 張枱細到咁, 居然仲迫我地9個人坐4張呢D拼枱, 嘿, 都得o架喇... 大家認住而家藍色玻璃位置, 等陣走佬靠佢...


我個位對到呢個招牌實一實...


初時大家都話Set Dinner好抵食, 但我同貓兄同何超都想食羊鞍, 我地3個決定散叫Share, 仲掉埋位坐埋一齊, 搞搞下唔知點解個個都變散叫Share, 玩咩?!! 咁我一早就唔使掉位啦... 不過長枱大圍Share唔方便, 最後我地分開左右2批Share...

落好晒單先有麵包食... 麵包有3款咁多, 黑麥版硬豬外脆內軟, 左下的包包亦好鬆軟, 的確唔錯...


落單後10分鐘...

意大利水牛芝士蕃茄沙律 $78
-- 賣飛佛!!! 曾經有一段時間, 我瘋狂地愛上佢, 每個週末都會買材料返屋企整來吃... Kitchen M將個蕃茄切到薄到無朋友, 水牛芝士彈性及緊緻度略為不足, 灑在沙律上的香草變成生菜絲, 味道略遜不特止, 賣相仲好奇怪...


係地球另一面的Wild Mushroom Soup $58... 唔知點解係都要人影相...


坐係南極的朋友仲Order咗Traditional Onion Soup $58... Tuna Salad w/ French Fried Beans, Black Olive, Boiled Egg & Cherry Tomato $88... Sorry, 我隻手無咁長, 真係幫唔到你地影相留念...

又過咗20分鐘...

香煎深海鮮帶子炒橄欖油蒜片紅椒扁意粉 $138
-- 堅好味, 皆因3人已餓至神經錯亂... 帶子嫩滑鮮味, 意粉柔韌彈牙, 香辣惹味...


又過多10分鐘...

酥炸軟殼蟹薄餅 $118
-- 我地3個人叫3樣食物(沙律+意粉+羊鞍)驚唔飽, 成功聳擁食燒春雞的Miss Chan Chan再叫個Pizza 4人Share, 哈哈... 薄餅其貌不揚, 差點薄過我塊面皮, 幸好都幾香脆, 咬落竟然好香芝士味, 同軟殼蟹出奇地夾, 真係估佢唔到... 但記得一定要趁熱辣辣時食, 凍咗無味...


燒香草法國春雞, 炒青菜, 薯角 (半隻) $148
-- 估唔到法國春雞都幾大隻, 外皮烤至金黃, 入口肉質幼嫩, 調味恰到好處... 查實... 呢個係Miss Chan Chan私人的, 唔係For Share, 卻因坐埋係地球嘅同一邊, 慘被3隻餓狼陰下陰下咁瓜分, 哈哈, 好可憐... 春雞不是100%熟, 軟骨與軟骨之間見到血水, 席間眾人皆參與討論此雞會否真的來自法國, 抑或係本地, 最怕是深圳的H7N9農場, 仿佛大家都回到陳馮富珍日日都食雞的年代...


係地球另一面的A4日本和牛 $398
-- 職員係都要放係我面前, 好啦, 咁比下面影下你啦... 唔貴唔食的壽星鑽媽竟然命令我切開片和牛做一條條, 方便進食, 喂, 我路人甲喎, 豈有此理, 我就拮你舊A4和牛一條食先, 然後先再慢慢切... Well, 鹹牛咁, 我切時仲見到D大大粒粗鹽停係舊和牛上面, 最慘係Feel唔到和牛果種澎湃嘅牛味, 在場的C9議論紛紛, 細聽之下, 原來佢地平時家常便飯都去高級超市買和牛同黑豚回家煮, 有眼不識太山, 失敬失敬!!!


係地球另一面的海鮮忌廉墨魚汁意粉 $148, 又迫人影, 吖, 你地Blog又懶寫相又懶影, 又好意思命令人地做o野o架喎...


坐係南北極的朋友仲Order咗帕爾馬火腿薄餅 $158, 佢地叫得太多食物, 食剩半個咁多, 結果由餓狼組解體, 凍咗味道都OK喎... 影都見過的海鮮意大利飯 $148, 牛肝菌黑松露意大利飯 $108, Parma Ham Pizza Mozzarella Traditional Onion Soup $58... Tuna Salad w/ French Fried Beans, Black Olive, Boiled Egg & Cherry Tomato $88... Sorry, 手唔夠長, 真係幫唔到你地影相留念...

香草燒澳洲羊架 $238
-- 7:34PM落單, 8:57PM先上枱, 足足1小時23分鐘!!! 食完所有食物之後, 經理想收晒我地嘅餐具, 仲問我地要唔要Order甜品, 吓?!!!!!! 個羊架都未到!!!!!! 果時大約係8:20PM左右... 又再等... 等到8:35PM左右, 仲未到, 又搵侍應弟弟Check下, 由始至終2人都無再返轉頭交代... 又再等... 等到8:45PM左右,又再搵經理問下間餐廳係咪無羊?!! 無羊我地就即刻埋單走!!! 一如我所料, 10分鐘內即到!!! 經理辯稱唔係煎而係要焗所以好耐, 嘿, 你早D講我地咪唔使成日追囉!!!
如果唔咬沾咗調味料嘅邊邊, 件羊係完全無味的!!! 連羊膻味都無!!!
如果咬沾咗調味料嘅邊邊, 件羊係超鹹的!!! 都係引唔到羊膻味出來!!! 
優點係肉質幼嫩不乾硬, 7成熟卻無半點血水... 


無Mood地食完羊架, 懶人一族決定Order2份甜品拼盤...

法式甜品拼盤 $98
-- 芒果拿破崙夠酥脆, 法式焦糖燉蛋唔夠香滑, 馬卡龍一向只懂賣萌... 純黑朱古力蛋糕賣相普通, 入口朱古力味香濃, 口感幼滑, 是法式甜品拼盤中最好味的!!!


DD席間提及火星人暈妮近日重返地球, 想與眾人聚舊...

埋緊單時, 眾人走夾唔抖, 衝去商場洗手間, 當貓兄跟著行的時候, 餐廳竟然話時裝店已關門, 唔可以行!!! 吓?!! 我地嘅朋友係前面喎!!!

無奈下, 我地要由餐廳水吧旁的門, 行到商場外的露天通道, 再從另一道門重回商場內!!!

真係第一次去餐廳去到咁呢Hea, 一定唔會同老人家去囉, 失散咗都唔知點算!!! 

是次每人消費約 $300 元
味道： 4 環境： 4 服務： 3 衛生： 3 抵食： 2
###
地址 : 尖沙咀河內道18號K11購物藝術館122號
電話 : 2736 1832

[ 拍攝器材: Sony Xperia™ Z1 ]