和幸日本燒肉料理 Wako Japanese Yakiniku Restaurant : 烤肉定烤自己?

6 September 2013, Friday

好友毛毛生日, 講到明近日返工好辛苦, 一定要食好o野... 慘... 我最怕聽到咁嘅要求... 如果試新餐廳, 有機會又貴又中蕉... 都係去d去過嘅餐廳穩陣d... 前年生日龍媽拉大隊來食過一次, 非常美味, 令人念念不忘... (想看上次的食評? 請瀏覽http://www.kenmerry.com/2011/09/wako-japanese-yakiniku-restaurant.html) 我同毛毛都好鐘意食烤肉, 和幸的確是最好的選擇...

店內的裝飾非常認真, 真係有置身日本漁村之感... 2個人也是坐4人梳化位, 非常寬敞...


吧台亦設有烤爐, 很少見...




和幸這個燒烤爐有別於坊間的, 中間有舊好似炭咁嘅物體, 好巨型, 優點係熱力均勻, 無咁易燒焦食物... 缺點係熄爐後熱力歷久不散, 就係因為佢, 我中暑了!!! 食完烤肉, 全身火燙, 面都紅晒, 頭顱發滾, 我坐到最近走廊位置撥扇, 又用冰凍的玻璃杯敷額頭沒好轉, 再叫多一杯冰凍飲料, 飲埋敷埋都沒好轉, 去洗手間洗面洗頸, 好了一會又再發滾... 店員見狀終於去開大D個冷氣, 終於Feel到d風吹埋來... 毛毛好擔心, 比咗d Panadol我食... 坐咗好耐, 終於無咁辛苦... 但返到屋企都仲係好似曬咗1日太陽中過暑咁... 唔見在場人士有相同問題, 可能因為我坐果個位, 剛巧有個櫃擋住d風, 所以出事...


未決定好食咩之前, 店員先奉上2碟前菜 ($20)... 白飯魚漬, 醬油味道鮮甜, 魚乾硬硬的, 有咬口, 秒速吞噬...


在開飯網印了Coupon免費送的, 但不可與店方派發的現金劵一同使用... 金菇一會兒便變腍, 牛油溶化到日本清酒中, 醬汁掛在金菇上, 吃起來好香酒味, 簡單中見心思...


特選海鮮黑毛和牛盛 $528
-- 銀碼唔係幾吉利... "唔易發"... 嘩咔咔...

北海道鱈場蟹腳, 份量比想像中少, 只有1隻腳... 掛住傾計, 燒過了火, 蟹肉被燒乾了, 粘著蟹殼, 很難分開, 只嚐到海水的鹹味...
花虎蝦也是燒過了火, 蝦肉被燒乾了, 粘著蝦殼, 肉質乾身, 但嚐得出鮮味...
帆立貝連殼燒, 加了牛油及日本清酒, 淡淡牛油香與濃郁的酒香, 沒有掩蓋帆立貝的原味, 帆立貝很新鮮, 肉質爽彈, 好味...
黑毛和牛胸腹肉雪花紋路不俗, 為了突出牛肉的原味, 沒有太多的調味, 加了點蔥粒及芝麻增加香味, 2面略煎一會, 入口油香滿腔, 肉汁四溢, 肉味爆燈, 口感柔嫩, 好好味呀!!! 嘻嘻... 毛毛誡牛, 只吃了1片, 益晒我...
鹿兒島黑豚用上五花腩, 煎香了2邊, 肉質軟腍, 入口甘香, 黑豚味道比普通的豚特別香濃味美, 我在家中煮烏冬也要用上黑豚, 普通的豚肉已不能滿足我的口舌之慾...


哈哈... 每次燒烤總是心急如焚, 將烤爐填得滿滿的... 聽到吱吱喳喳的聲音, 嗅到烤肉產生的香噴噴煙霧, 教人口水直流...


白桃乳酸梳打 $28
-- 食燒烤一定要飲凍飲才夠爽...香桃的香甜, 乳酸的酸澀, 梳打的氣泡, 非常搭配... 冰涼透心, 1杯不夠喉唷...


吃罷烤肉和烤海鮮, 味覺上已得到大滿足!!! 但是肚子還是空空如也呢, 我地要繼續食食食... 來到居酒屋, 又怎能不吃串燒呢...

串燒露筍卷 $58
--  露筍以薄薄的豬肉包著燒, 肉香與油脂滲到爽嫩的露筍中, 烤好後灑點鹽來調味, 很美味哦, 佐酒真是一流...


串燒羊扒 $116
-- 厚厚的羊扒, 表面微微燒至焦香, 肉汁閃爍, 賣相簡單但非常吸引, 羊膻味略輕, 用手拿著吃, 不用蘸芥末醬也很滋味...


自家製燒芝士餅 $55
-- 外表普普通通的芝士蛋糕, 小時候總期望在冰箱內找到它... 看到那綿密的細孔嗎?


吱吱喳喳... 吓... 芝士餅也烤? 瘋了嗎? 哈哈, No No... 將芝士餅略烤至表面香脆後, 芝士餅的芝味更濃更香, 外脆內軟, 好好味, 食到唔停得口呀!!!


是夜全場滿座, 服務員非常忙碌, 要找到他們落單明顯有難度...

結帳時店方派發了$180現金劵, 可於下次再幫襯時全數使用... 我還有幾天便要動手術脫智慧齒, 1個月內是沒有可能重臨, 所以贈予毛毛了... 毛毛笑說"又食又拎, 有點不好意思"... 不打緊啦, 我拿了又不能用會很浪費呀...

2人合共吃了$950, 是貴了一點, 但全部食物也很美味, 看到毛毛吃得很滿意的樣子, 我可以鬆一口氣了...

每次出來吃飯, 大家都好似放監咁, 話題滔滔不絕,今次又傾到11點先肯走啦, 哈哈... 好開心呀, 下次繼續!!!

是次每人消費約 $480 元
味道： 5 環境： 4 服務： 3 衛生： 4 抵食： 3
###
地址 : 銅鑼灣謝斐道496號金利文廣場3樓
電話 : 2117 4268