北園酒家 North Garden Restaurant : 環境唔錯

31 March 2013, Sunday

呢篇冇「夜上海」咁離譜, 隔2個月先寫, 呢篇1個月啫, 嘩咔咔咔... (實情係唔打算寫, 唔提就等於唔存在... 不過上星期突發神功, 1星期內完成4個星期的黏土功課, 勁... 攰!!! 又可以Free返少少時間出來寫Blog)

北園其實幾就腳, 上環地鐵站一出過條馬路就到...

朋友訂咗1樓小菜廳, 環境都幾清幽, 人客唔多, 得幾枱, 靜靜地傾計一流...

大家都肚餓, 懶得慢慢揀, 叫咗套餐... 唉... 又唔記得影低餐牌... 唯有出絕招... 斷估冇痛苦!!!

避風塘長腳蟹
-- 炒得好香好惹味, 少少辣多多脆, 金蒜多多益善, 肉地扎扎實實, 正呀!!! 睇落好似份量不足, 食落又食極都有喎, 嘻嘻... 我估我唔聲唔聲靜靜雞都食咗3份1碟, 賺呀!!!

燉湯
-- 份量都幾足, 老火湯, 落足料, 唔錯喎...

炒石斑
-- 味道都唔錯o架, 唔腥囉... 我食魚冇咩要求, 只要唔腥, 冇泥味, 冇骨, 冇皮就更好, d肉唔好太硬過晒火... 哈哈, 懶蟲上身...

煀石斑
--  ♫♪♫ 誰人迫我 屈我辱我 ♫♪♫  無... 個廚啫!!! 都煀得你幾入味, 難得係唔太油, 我食咗幾舊...

蒸冬瓜
-- 大大舊, 冇賣相!!! 冬瓜蒸得幾腍, 味道可以, 幾舊西蘭花都唔放過...

炸子雞
-- 印象中味道不錯...

糖水
-- 印象中煲得唔錯...

好似仲有果盤...

以上菜式, 我的味覺或有偏差!!! 皆因係澳洲旅行期間, 日日都係飲可樂, 食漢堡包&炸薯條, 食到嘴都歪埋, 返來香港唔夠1星期, 真係放咩落口都係珍饈百味...

帶咗Tablet去同朋友分享旅行照片, 2位服務員嬸嬸可能太得閒, 長時間企係朋友身後睇埋一份...

埋單時朋友有現金劵, 好似平咗幾十蚊... 當時覺得幾抵食, 而家睇返相又好似冇咩落肚... 200蚊1個人, 可以接受啦... 環境真係好舒適...是次每人消費約 $200 元
味道： 4 環境： 4 服務： 4 衛生： 4 抵食： 4
###地址 : 上環德輔道中249-253號東寧大廈1-2 樓
電話 : 2739 2338