澳洲「野生探索」2013の從香港到阿德萊德

16 March 2013, Saturday
 
20^oC, Cloudy 

朋友一家三口到達機場後去咗開餐, 食飽飽就Whatsapp我地, 原來去墨爾本同去悉尼的航班登機閘口都只係隔離左右... 我地離開香港機場貴賓室, 去到登機閘口同朋友影返張合照Upload去Facebook, 之後就要分道揚鑣... 聽日係阿德萊德見喇, Bye~

Adelaide係南澳嘅首府, 居然得國泰有直航?!! 直航當然好, 但我地想去埋Sydney同Melbourne, 國泰飛來回2程嘅價錢, 等於澳航飛5程... 無言... 國泰Fans輸咗喇... 反正朋友已經出咗澳航機票, 坐同一班機去Adelaide應該會開心d... 但係落實出機票都係2月頭, 只係遲咗幾日Confirm, 就要1個人貴千幾蚊, 無奈下決定同朋友分開飛, 佢地飛Melbourne轉機, 我地飛Sydney轉機, 我地係香港遲朋友5分鐘飛, 但係要遲2個鐘先到Adelaide, 激死... 最激氣係比晒錢之後冇耐, 國泰就出特價機票...

我同Honey第一次坐A380, 好興奮呀~

架飛機大咗, 要早d寄行李之餘, 登機時間都要早d... 登機通道內中途設咗安檢站, 個大嬸撿查Honey背包時, 揑落單反相機支長鏡, 居然話係水樽?!! Honey同佢講係相機, 佢唔理, 繼續大力狂揑!!! 我心諗 : 揑夠未呀? 咁大力, 爛啦!!!

我好似係排第一登機, 當然係我之前, 有長者及小童優先登機... 平時我一定揀窗口位, 不過根據以往經驗, 坐長途機d人瞓到死豬咁, 3-4-3的座位設計, 2個人坐窗口位, 好難出入去Toilets, 所以今次破天荒, 係有得揀嘅情況下揀咗中間果排...

架機唔滿, 有d窗口位只係坐咗2個人, 正到暈... 我都好彩, 隔離的2位單身少女都比較纖弱, 唔會太迫...

架A380好新淨呀~ 等我神經企鵝走出o黎搶吓鏡先!!! 今次行程嘅其中一個重要環節, 係去Phillip Island探我嘅老表神仙企鵝...


講開揀位, 我地第一次坐澳航, 都唔知個程序, 好緊張, 好驚心水位置好快比人揀晒... 之前一晚我仲走咗去試食, Online Check-in重任落咗係Honey身上... 踏入起飛前24小時, 之前交落比Honey d Link原來係錯嘅!!! 果條Link係比Surcharge優先揀位用, 原來起飛前24小時會多咗Online Check-in條Link, 要輸入好多資料, Honey又唔知我將d Passports同e-Tickets放咗係邊, 我地要用電話聯絡好多次先擺平, 果一刻真係好後悔, 我真係唔應該出發前1晚仲走去試食, 我太對唔住Honey喇, Sorry!!!

19:55 A380起飛好寧靜呀...

上機冇耐就派晚餐啦... Pork or Chicken... 咦... 點解... 同空姐派嘅餐單唔同嘅?!! 唏!!! 原來空姐派嘅係相反方向, 由悉尼出發的餐單, Beef or Fish!!!

Garden Salad with Balsamic Vinaigrette
-- 黑醋係我永遠嘅至愛!!! 沙律OK新鮮, 酸咪咪好開胃...

Stir Fried Pork with Yu Shiang Sauce, Bok Choy and Fragrant Rice
-- 酸酸甜甜的豬肉絲雖然硬咗少少, 但味道還可以, 食得落... 好味過Travellers' Lounge...

Cherry Almond Tart
-- 點解隔離左右都有, 得我一個冇?!! 你地睇吓上面張相, 真係冇!!! 好彩空姐仲派緊飲品, 即時問佢拎返!!! 不過佢都係o係其中一個盤度抽比我, 唔知邊個會成為下一個不幸運兒... 味道好一般, 都吞得落...

Chocolate
-- 冇食到, 帶埋佢入境, 留返旅途中口痕時享用...

我地原本打算跟朋友Join Barossa Valley嘅酒莊一天團, 朋友之後臨時改咗計劃轉去袋鼠島, Honey係飛機上可以飲返支Barossa Valley出嘅紅酒當補數...

航機上的Movie係Video On Demand, 我睇咗套有中文字幕的Life of Pi (少年Pi的奇幻漂流)... 然後再睇埋Skyfall (新鐵金剛:智破天凶城), 好鬼悶又冇字幕, 不停強調Old Fashion Works...

航班中段的Relax drink... 吉百利熱朱古力!!! 估唔到有咁大粒綿花糖, I Like It... 

睇完2套大電視, 係時候食早餐...

個胃唔係幾舒服, Orange Juice同Yoghurt都冇食到, 但係唔敢帶走, 因為有機會唔入得境... Salad凍冰冰都唔敢食...

Banana Muffin
-- 都幾香幾鬆軟...

Scrambled Eggs with Seared Bacon, Roasted Potatoes and Spinach
-- 個胃唔舒服時, 蛋一定唔食得... 只好食薯仔... 菠菜d味好似嘔吐物咁, 哽唔落...

就夠鐘落機, 唔夠時間睇多一部電影... 食飽冇事做, Click吓個Touch-Screen電視八吓有咩功能先... Oh... 原來架飛機裝咗支Cam可以睇到外面嘅情況o架...

同埋呢, 個System係有埋餐單... 都唔明點解空姐仲要派d錯嘅餐牌比我地...

架機樣樣都好, 不過, 我個耳機係爛o架, 搞到我一時聽到一時聽唔到...

朝早6點幾抵達悉尼... 過咗海關之後, 要自己推住件行李, 由T1(國際)推去唔知邊度Check-in, 然後坐巴士去T3(內陸)...

T3候機處有Free WiFi... 呵呵... 毒友們, 上吧!!!

11:05 起飛了...

航機上看到的, 盡是一片片啡色的Dairy Farm~

航機上派發的朱古力Snacks Bar, 味道Very Nice...

13:00 嚮往已久的Adelaide天空, 吸一口氣, 大叫一聲, 我終於到達了!!!


Adelaide市中心同機場超近, 由機場來到市中心的酒店, 承為AU$26.70 (約HK$215)!!! 比Adelaide Airport網頁所講的AU$20為貴, 但差額仍可接受... (朋友一家三口, 早我地2小時到, 佢話佢地只係坐咗AU$23)

~~~ 相關網址 ~~~

Adelaide Airport Air Travel Passengers Services
http://www.adelaideairport.com.au/air-travel/passengers/services

Australia Taxi Fare Calculator
http://www.taxifare.com.au/

~~~ 時差 ~~~

請注意, Adelaide同Sydney係有半小時時差的, 正值夏令時間, 時差如下: -

澳洲東部: Sydney, Melbourne 時區GMT +11:00
澳洲中部: Adelaide 時區GMT +10:30
香港全部: Hong Kong 時區GMT +08:00

即係Adelaide快香港2個半鐘, Sydney同Melbourne快香港3個鐘~ 純以香港時間計, 即係我由尋晚8點出發, 到今朝10點到達, 歷時14小時!!!

澳洲「野生探索」2013 の 總匯 http://www.kenmerry.com/2014/07/2013.html