DIY「無題」情人節浪漫燭光「四道菜」晚餐 (懶人包必備)

14 February 2013, Thursday

尋晚食咗一餐「泰」著數的情人節晚餐, 試食完拍拍Pat Pat就走人, 感覺有d似食完霸王餐靜雞雞偷走, 哈哈, 到而家都仲未係好習慣...

近年來情人節都已經轉咗食中餐, 因為唔使同人迫又唔使被迫食貴夾唔飽的套餐...

舊年開始試吓玩煮飯仔, 自己係屋企煮, 不過係煮中餐, 同埋入廚冇耐, 唔多見得人, 哈哈... (雖然而家都仲係地獄廚神)

膽粗粗今朝先上網搵食譜, 幸好有好多好心人, 無私地將畢生絕學Share上網, 將我地一眾地獄廚神從絕望的深淵拯救出o黎, 居然又比我過到骨喎, 呵呵呵呵... 總算一切順利, 係有少少阻滯咁囉... (話說... 買唔到露筍之餘, 仲要買好晒餸上咗小巴Do埋八達通, 小巴站前面撞車, 單程路, 塞死晒, 等咗好耐2幫司機都好似仲鬧緊交, 乘客開始走人, 我唯有孭住2袋餸徒步回家, 年初三行完山對腳仲酸軟緊嘅呢)

o黎, 大家睇睇今晚個餐牌啱唔啱食先...

DaDa... DIY「無題」情人節浪漫燭光「四道菜」晚餐 ♪(*^^)o∀*∀o(^^*)♪



餐飲: 日本山形縣葡萄果汁
頭盤: 香草蕃茄水牛芝士青橄欖, 黑醋
主菜: 澳洲和牛西冷伴新薯, 日式燒汁
主菜: 露筍醃火腿意粉, 新鮮羅勒醬
甜品: 布朗尼伴香檳士多啤梨雪糕
餐茶: 蜜桃芒果蜂蜜紅茶

先睇睇今日買咗咩餸先... 當收銀阿姐同我講幾錢時, 真係打個突, 拍得住同出街食一樣咁貴!!! OMG...

日本山形縣葡萄果汁... 貪佢的顏色, 可以用o黎扮吓紅酒影相, 嘩咔咔咔...


蕃茄, 水牛芝士, 青橄欖...


澳洲和牛西冷扒, 新薯, 日式燒汁...


醃火腿, 意粉, 新鮮羅勒醬... (行咗2間超市都搵唔到露筍, 好彩Honey放工去第3間買到, 太趕冇影相)


布朗尼, 香檳士多啤梨雪糕... 比錢時, 收銀阿姐同入袋妹妹講呢隻MarketO的Brownie過年前每一日跌幾多個價位, 我忍唔住搭訕, 話自己過年前入咗2盒, 收銀阿姐即刻問我"有冇嘔血?", 我答"嘔晒啦!!! 所以今日入多1盒溝淡佢"... 超無聊的對白, 嘩咔咔咔...


先要在此感謝「大少奶's Delicatessen」,「鬼嫁料理手帳」及「法蘭Sai 太太~簡單生活」, 本人參考咗佢地的食譜, 得到了大成功!!! 些些!!!

好, 開餐啦!!! 點返支蠟燭先... 竟然有禮物收, Thank you~~~


頭盤: 香草蕃茄水牛芝士青橄欖, 黑醋... 切吓蕃茄同芝士, 加d青橄欖、香草、橄欖油及黑醋撈勻就食得, Yeah!!! 1級懶人包必備!!!


餐飲: 日本山形縣葡萄果汁... 打開蓋掩, 飲得, Yeah!!! 1級懶人包必備!!!

主菜: 澳洲和牛西冷伴新薯, 日式燒汁... 加d香草、海鹽、黑椒醃一醃塊牛扒, 新薯烚一烚, 煎一煎牛扒2邊, 加入日式燒汁, 上碟, 食得, Yeah!!! 2級懶人包必備!!!


主菜: 露筍醃火腿意粉, 新鮮羅勒醬... 意粉烚一烚, 露筍烚一烚, 煎熟醃火腿, 加d新鮮羅勒醬、露筍、意粉, 撈勻就食得, Yeah!!! 2級懶人包必備!!!

甜品: 布朗尼伴香檳士多啤梨雪糕... 擺舊雪糕係Brownies上面, 食得, Yeah!!! 1級懶人包必備!!!

餐茶: 蜜桃芒果蜂蜜紅茶... 沖埋個蜜桃芒果紅茶茶包, 等2分鐘, 加蜂蜜, 飲得, Yeah!!! 1級懶人包必備!!!

懶人餐絕密大公開!!! 唔好噓, 唔該... 我走先... 呀哈哈哈...