新同樂魚翅酒家 Sun Tung Lok Chinese Cuisine : 稱職米芝蓮三星

10 December 2012, Monday
開業40年的新同樂, 係2011年榮獲米芝蓮三星榮譽, 係全球唯一非酒店三星中菜食府... Honey激讚炆牛腩同埋豬大腸好好味, 講咗好多次話要帶我去試吓, 今日終於有機會一試...

我地被安排坐係1間只有3張枱的房內, 裝修簡潔, 新淨光猛...

呢雙象牙筷子都幾恐怖... 個頭黃甘甘, 仲有好多黑色的裂縫...


百花脆皮乳豬 (1份) $268
-- 樣子奇趣, 肥嘟嘟的乳豬皮, 甘香豐腴, 超級香脆, 放涼咗都仲好脆, 咬落索索聲, 好神奇... 乳豬皮下係蝦膠, 鮮味十足, 爽口彈牙, 好好味... 不愧為新同樂名菜...

燒汁乾煏牛肋骨 (1位) $138
-- 新同樂名菜, 牛肋骨肉質柔軟有彈性, 牛味香濃, 醬汁香甜入味, 賣相精緻, 好好味...

連帶裝飾用的蔬菜, 也看得出廚師對食物的賣相很認真...

梅菜皇扣肉包 $42
-- 網上的食評一致認為梅菜味不足, 我好怕食全肥豬肉, 所以將肥豬肉抽出來, 切走一半再放回包內... 噢... 好味喎!!! 梅菜味即時出返來, 好平衡, 合上眼把肥豬肉放入口, 其實不肥, 甘香軟腍... 哈哈... 唔合埋眼真係唔敢放入口...

臘味煲仔飯 (1位) $78
-- 煲仔細細, 1人位, 居然可以煲得咁完美, 飲身粒粒乾爽分明, 飯焦脆口而不會過硬, 臘味香而不膩, 甜豉油甘香甜美, 如此出色, 實在驚喜...

同樂三式美點 $42
-- 沙翁沒有特色, 特色凍糕香滑, 家鄉茶粿可以不試...

食物著實不錯, 服務比美6星級酒店, 只有3張枱的房間, 2位服務員很有禮貌, 不停為客人服務, 很貼心... 貴係貴咗少少, 但物有所值!!!

人一世物一世, 一定要豪一次!!!
是次每人消費約 $340 元
味道： 4 環境： 5 服務： 4 衛生： 4 抵食： 2
###
地址 : 尖沙咀彌敦道132號美麗華商場4樓D號舖
電話 : 2152 1417