東后齋 Queen of the East : 荷塘之花 迷倒眾生

28 December 2012, Friday

個人2012年最大的突破係... 出席試食活動!!!

今年開始打出少少少少少少名堂, 久唔久都收到試食邀請, 10月份係最誇張, 幾乎每個星期都要出席試食活動, 其實都幾攰, 自己比錢食可以慢慢寫BLOG, 寫唔寫, 幾時寫, 都係自己話事... 試食的食店一般都好心急, 希望係試食之後1-2日就出文, 基本上係唔可能, 第一, 我要揀相, 揀完相又要執相, 第二, 我要有靈感, 主題同內文有時要隔幾日, 甚至十幾日, 先至會靈光一閃, 一兩日內迫文出o黎, 只會係冇靈魂, 死實實的文...

初時收到邀請都有少少誠惶誠恐, 幸好一直都很順利, 直到今天, 試食終於碰壁!!! 出發前致電店舖確認, 對方竟然話唔識得邀請我的人, OMG!!! 點會咁o架?!! 自己一個人遇到咁嘅事, 本來冇咩所謂, 但我仲約咗另一位食家一齊去, 佢仲帶埋單反相機返工, 而家撲空了, 害佢空歡喜一場, 真係有d內疚...

為咗消減怨氣, 我決定要去筲箕灣東大街品嘗「荷塘之花」!!!
係筲箕灣東大街的食店已經嘗試得七七八八, 日前終於留意到呢間唔係太起眼嘅東后齋... 店外店內的裝潢都係一切從簡...

牆上有荷花掛畫, 亦有對聯及觀音像, 氣氛很祥和...

菠蘿咕嚕魔芋 [東后推介] $88
-- 見到個芋字, 就傻更更以為係芋頭, 上菜見到個款已經打個突, 一食... 咩o黎o架?!! 搵店員問清楚, 原來係台灣魔芋, 係植物, 口感好似麵筋, QQ彈牙, 真係誤會晒... 咕嚕汁味道剛好, 可惜菠蘿酸到震~

香樁野菌炒飯 [東后推介] $72
-- 見網民強烈推介, 一試底蘊, 果然又真係炒得好香口, 米飯粒粒分明, 材料豐富口感有層次, 好味道~

荷塘之花 [廚師推介] $158
-- 好戲當然要壓軸... 將冬瓜切至超薄身, 將粉嫩的蓮子捲起, 然後堆砌成蓮蓬狀, 蒸熟, 簡直巧奪天工!!! 連伴菜的紅蘿蔔都切成心型, 一絲不拘... 味道清香, 好好味~
食物質數高, 賣相及味道都相當好, 服務員亦很友善, 人客絡繹不絕, 夜d去都冇位...

是次每人消費約 $180 元
味道： 4 環境： 3 服務： 3 衛生： 3 抵食： 2
###地址 : 筲箕灣筲箕灣東大街51號東灣閣地下A2鋪
電話 : 2567 9999