生原創(蛋包飯) Omerice : 真正的蛋包飯

22 September 2012, Saturday

北角清風街近年發生大變天, 由數年前只有數間食店, 發展至今天十數間, 以往清風街以車房及夜冷店作主導, 今日車房及夜冷店仍在, 只是數目減少了...

夠膽量將食店開在車房旁邊, 店主對自家出品的食物似乎信心十足...

昨天才吃過CoCo壹番屋的蛋包飯, 今日又再吃蛋包飯?!! 我都估唔到會食得咁密, 不過既然順路, 就食咗先啦...

唔識字?!! 唔緊要!!! 剩係睇門口個招牌都知呢度係賣蛋o架啦!!!


店內充滿日式味道, 坐係吧台嘅客人可以感受到百分百日本Feel...

吧位旁邊有數張枱, 牆邊設有衣架掛外套, 這個設備在日本很常見... 但座位超級擠迫, 我地坐係大門口旁邊的2人枱, 擠迫程度更甚, 連坐低及離座都有困難...

店內除供應蛋包飯之外, 仲有烏冬、串燒、魚生及日式料理...

Order蛋包飯, 可加$8配汽水, 原來係支裝汽水, 即刻覺得抵d...


蛋包飯可以配茄汁/咖喱汁/白汁... 尋日先啱啱食完咖喱, 今日唔食住啦, 試吓茄汁啦...

噴香牛肉蛋包飯 ($78) -- WoW... 好靚呀!!! 咁樣先叫做蛋包飯吖嘛, 尋日係CoCo食果d太唔似樣...

切開o黎睇吓先... 牛肉同飯一齊炒香咗先再用蛋衣包住上碟, 飯身濕濕地, 盡吸牛肉精華, 隱隱滲出黑椒味, 蛋味濃郁, 好好味呀!!!

 

沖繩風涼瓜肉末蛋包飯 ($60) -- 咦... 單憑外表, 真係好難分到入面係咩餡料... 會唔會好易撈亂呢?!!

切開睇吓先... WoW... 沖繩風涼瓜呀, 一d都唔苦o架!!! 炒飯味道同我碟牛肉飯差不多... 應該係用同一隻汁炒...

 

味道好好, 服務都OK, 環境都好好, 但唔好坐囉... 都值得再食嘅, 但唔適合一大班朋友慢慢坐邊傾邊食...

是次每人消費約 $80 元
味道： 4 環境： 3 服務： 3 衛生： 3 抵食： 3
###
地址 : 天后清風街3號地下
電話 : 2512 1809