Spice 8 : 印泰二合一

10 August 2012, Friday
今晚約咗貓兄去睇話劇「愛可以多狗」, 睇話劇我都係第一次咋, 好興奮呀... 幾年前睇過一次音樂劇「歌劇魅影」, 當時因為太攰, 瞓咗一陣, 希望今次唔會啦, 哈哈...


個Show係香港理工大學賽馬會綜藝館公演, 我地去理工大學附近嘅國際都會商場搵食...

行咗個圈, 揀咗呢間評語唔錯嘅印度餐廳「Spice 8」... 餐廳嘅擺位一度令我地擔心係要食Buffet嘅, 後尾問一問服務員妹妹, 原來係散叫嘅, 好彩...

印度菜餐牌背面係泰國菜, 搞到我同貓兄揀餸時牛頭唔搭馬嘴...

Mango Lassi -- 酸乳酪+奶+芒果... 嘩... 好酸呀... 嗒真d好勁芒果味... 再嗒真d都幾好飲, 酸得o黎幾香甜, OK, 好特別, 值得一試!!!

Spice 8 加多加多沙律 Gado Gado Salad -- 隻蛋... 好似我係屋企切都好過佢... 沙律材料有青瓜、豆角、荳芽、椰菜、西蘭花、薯仔、紅蘿蔔, OK新鮮... 沙律醬味道好特別, 有沙爹醬同花生, 味道唔錯...


沙爹牛肉串 Beef Satay -- 好味!!! 沙爹燒完都唔會太乾, 燒得幾香口, 沙爹醬都好味... 沙爹上面淋咗d綠綠地色嘅醬, 應該係青芥末, 唔辣, 幾香... 咁多樣食物, 呢個賣相最好...

(前) 印度燴羊肉 Lamb Rogan Josh -- 好辣呀!!! 好香羊味呀!!! 好好味呀!!! 羊肉都幾多, 好軟腍, 咖哩汁甘香濃郁, 撈薄餅一流...
(後) 印度薄餅 Roti -- 熱辣辣, 幾煙韌, 幾香口, 還可以...

印度牛油烤餅 Butter Naan -- 嘩!!! 點解個烤餅成攤油係面o架?!! 好驚呀, LaLa聲倒咗佢... 咦... 唔係喎, 我地係Order牛油烤餅, 唔通果d係牛油?!! Oh No... 倒晒... 同薄餅差不多, 都係熱辣辣, 煙煙韌韌, 不過好怪囉, d牛油唔係應該撈埋入面粉度先烤嘅咩?!! 搞到而家一d牛油味都冇...

貓兄食完第一客薄餅, 話唔係想要呢樣... 食完第二客, 又話唔係要呢樣... 我意會到佢想食嘅係千層牛油薄餅... 問下服務員妹妹, 佢話佢地呢度冇... Oh...

食飽飽, 埋單呀唔該... 原本時間好鬆動, 可惜外籍服務員冇咗件事... 最後要搵返服務員妹妹幫手, 好快搞掂, 剩番幾分鐘咋, 遲到啦)))

趕到去賽馬會綜藝館, 好彩d人仲進緊場... 仲可以有幾分鐘比我考驗吓部新相機個大光圈... Yeah!!!

是次每人消費約 140 元
味道： 3 環境： 3 服務： 3 衛生： 3 抵食： 4
###
地址 : 紅磡都會道6號國際都會商場7樓749-750號舖
電話 : 2330 7950