空間之旅：林偉而 - 裝置十年 Space Journey: William Lim, A Decade of Installations

20 August 2012, Monday

ArtisTree又有新搞作...


空間之旅：林偉而 - 裝置十年...

入口有20個水缸, 係用中文數目字同阿拉伯數目字, 由1數到10, 用燈光透射到地面, 幾特別...

用600個回收月餅盒砌成嘅中秋塔...

用信封編織而成嘅遊亭...

中秋花燈會模型...

仲有其他展品, 大家有興趣就去睇吓啦...

「空間之旅：林偉而 - 裝置十年」小檔案: -

日期: 2012年8月15至9月2日
地點: 港島東太古坊康和大廈1樓ArtisTree
時間: 上午10時至晚上8時
費用: 免費入場

Simplylife Bakery Cafe (II) : Simple But Delicious

21 August 2012, Tuesday

印象中只食過一次Simplylife, 見佢成日爆晒棚, 其實都有d費解... 今日早咗少少食Lunch, 又週圍都食到悶晒, 興起再走o黎Try Try...


餐廳外面嘅區域仲未有客...

今次因為時間尚早, 都係坐係餐廳入面... 仲要都係坐番上次同一張枱, 有冇咁橋呀?!!

午餐包飲品及主菜($82), 加頭盤OR甜品($92), 加頭盤AND甜品($102)... 甜品係Brownies/Cheese Cake, 冇咩興趣, 所以我地要2份Set Lunch加頭盤...

想飲熱檸茶居然加$10... 唔係化?!! 咁咪照餐牌Order Homemade Iced Tea同埋Soft Drink囉...

Homemade Iced Tea -- 估唔到, 茶味好重, 好似有d似蜜桃茶味, 幾好飲...


頭盤可以揀是日餐湯或者沙律...

是日餐湯 -- 蘑菇湯味道OK... 麵包都幾好味...

 

沙律 -- 嘩... 咁多菇嘅?!! 使唔使咁大隻添呀?!! 西柚唔苦, 菜好新鮮...


南瓜栗子有機糙米飯 -- 呢個我至Like!!! 南瓜切成立方體形狀, 加埋栗子一切煮, 粒粒米都比南瓜蓉包住, 好Creamy, 好香好好味!!!

意大利煙肉芝士牛肉漢堡 -- 一向唔多叫Burger嘅我, 見到隔離枱碟Burger好正咁, 所以叫o黎試吓... 個樣係咪好吸引呢... 薯條最正, 因為用薯格做法, 好冶味... 伴菜嘅焗蕃茄同焗洋蔥都好好味... 煙肉唔鹹又唔硬, OK喎... 牛肉漢堡好Juicy又香牛肉味, 仲好厚身, 好味...

比起2年前, 1個午餐只係加咗$10, 都算係咁...

味道同上菜速度比2年前提升咗, 可以再食... 不過份量太大, 唔可以時時食, 哈哈...

是次每人消費約$100元
味道： 4 環境： 4 服務： 4 衛生： 4 抵食： 3
###
地址 : 太古太古城道18號太古城中心1樓142號
電話 : 2967 8163

美心皇宮 Maxim's Palace Chinese Restaurant : 懷舊點心車也來個數碼化

15 August 2012, Wednesday
今朝去咗睇「獨特的香港縮影」展覽, 狂影大半粒鐘之後, 就轉到最就腳嘅美心皇宮食Lunch... 真係好就腳, 就係大會堂低座咋嘛, 行幾步就係~

呢間美心皇宮係1979年已經開始係度, 果時叫大會堂酒樓, 唔知呢架舊式點心車有冇咁老呢...


好懷念... 細個時一見到呢架甜品車, 對眼真係閃到抽筋, 呀哈哈哈...


呢架舊式點心車就潮囉... 前面加咗個Display, Show下d點心嘅制作過程... 唔好話外國遊客吖, 連我都想睇埋一份呀... 所以話吖, 老有所為, 舊人舊物一樣可以與時並進, 只有不斷努力, 增值及裝備自己... 咦... 咁似政府宣傳片d對白嘅, 嘩咔咔咔...


3年前裝修過, 個禮堂都幾靚, 特別鍾意天花d水晶燈...
7

落地玻璃全海景, 望到對面海, 好開揚...

蒸蘿蔔糕 -- 味道唔錯, 蘿蔔都食到大大粒, 係蘿蔔唔夠甜囉...

蒸排骨 -- 味道都OK...

叉燒腸 -- 味道OK...

椒鹽鮮魷 -- 有驚喜!!! 廚師啱啱煮好, 已經急不及待捧出o黎放入點心車, 新鮮熱辣!!! 冇用炸醬, 大大件, 真材實料, 入口彈牙煙韌, 美味非常!!!

芝麻包 -- 香濃黑芝麻味, 唔錯唔錯...

薑汁豆花 -- 可以揀薑汁, 黃糖, 杏汁... 薑汁幾好味... 可惜豆花片得太厚, 好嚡口...

位於商業區, 午餐時間, 門口好多人排隊...

推車仔嘅年長嬸嬸好好人, 見我拎起相機, 佢話"影相呀?", 仲拉番後少少架點心車比我影... 太感動... 其實我冇打算騷擾到佢地嘅工作, 一向都抱住"影到就影, 影唔到都冇辦法"嘅宗旨...

價錢唔平, 環境唔錯, 服務都幾好, 不過味道平平, 一試無妨...

是次每人消費約 140 元
味道： 3 環境： 4 服務： 3 衛生： 3 抵食： 2
###
地址 : 中環愛丁堡廣場5-7號大會堂低座3樓
電話 : 2521 1303

露台餐廳 The Verandah : 傾城之假日早午自助餐

12 August 2012, Sunday
淺水灣酒店一向都係我同Honey嘅心頭好, 每逢天氣好, 都會好想去飲個下午茶... 酒店係1920年落成, 歷史悠久, 充滿殖民地色彩, 漫步其中, 可以回到過去, 懷愐一下殖民時期嘅情懷...

張愛玲嘅《傾城之戀》都係o係呢度拍o架... 荷李活電影《生死戀(Love Is a Many-Splendored Thing)》都係出現過呢個景, 講緊1955年喎... 簡直星光熠熠...

淺水灣酒店嘅露台餐廳，同尖沙咀半島酒店嘅露台餐廳係同一間餐廳, 質數有幾有保證, 你自己諗啦~

Honey幾個月見到淺水灣酒店露台餐廳有Sunday Brunch, 好吸引吓喎, 試過幾次打去Book位, 次次都Full晒, 最後決定提早2個月Book位, 保證有位之餘, 仲保證係窗口位...

2個月時間慢慢流逝, 期待已久的日子終於來臨啦!!! 星期日一早起身, 梳洗完畢, 長途跋涉, 攀山涉水, 向淺水灣進發~

沿途冇乜塞車, 順利準時到達, Very Nice!!! 可惜... 今日天氣認真麻麻, 天陰陰咁, 隨時會落出傾盆大雨... 趁仲有十幾分鐘先夠鐘又未開始落雨, 我地係淺水灣酒店打個圈影吓相先~

大家睇吓, 餐廳外貌幾咁高貴!!! 咳... 咁高級嘅餐廳, 係有Dress Code嘅, Smart Casual是也, 拖鞋膠鞋背心果d通通唔入得, 出發前請注意一下!!! 咦... 咁我使唔使著到《時光倒流70年(Somewhere In Time)》咁呀?!! 燈籠裙, 寬邊帽加埋把喱士遮, 呀哈哈哈...

仲有幾分鐘就開始啦... 去自助區影吓相先... 嘩嘩嘩... 好多o野食呀!!! 以下嘅相片, 可能只係佔自助區嘅6分之1左右... 因為我影相時, 好多食物都仲係用保鮮紙封住, 真係保鮮至Last Moment...

生蠔係你揀咗之後, 廚師係你面前即開, 再幫你落檸檬汁同茄汁, 好掂呀))) 保證新鮮!!!

煙三文魚淨係望吓都知掂啦, 藝術品咁呀!!!


有我至愛嘅羊奶芝士呀, Yo Ho~

又蝦又帶子又鵝肝, 全部大大粒, 好足本呀... 睇到我瞳孔都跟住放大...

行一個圈已經令我進入瘋狂狀態... 我唔影相啦, 我要食o野啦)))

LaLa聲返埋位, 要Order咗Sunday Brunch嘅主菜先可以開動引擎... Sunday Brunch包括Appetisers Buffet, Main Courses, Dessert Buffet, Coffee or Tea... 張餐牌都靚過人, 印埋酒店嘅招牌外觀~

Main Courses嘅選擇有: -
. Poached egg on a toasted muffin garnished with Alaskan crab
. Fillet of Atlantic salmon on green asparagus
. New Zealand rack of lamb
. Eggplant parmigiano, crispy polenta
. Roasted pork loin garnished with braised red cabbage

經理推介Lamb Rack同Pork Loin... 我見出面咁多好o野食, 主菜唔想食得太飽, 所以揀咗Poached egg, 應該唔會好大份嘅啫... Honey就揀咗Lamb Rack...

經理之後仲推介我地加$168任飲香檳, 不過我地志在食o野, 隊酒呢d... 唔使預我地喇!!! 之後經理斟咗少少香檳比我地試飲... 哦呵呵呵... 咁客氣呀... 點好意思呀咁...

Sunday Brunch仲包埋任飲4種自助飲品, 偏廳入面有鮮榨西瓜汁、鮮榨橙汁、鮮榨蔬菜汁(青蘋果+西芹+胡蘿蔔)、什果賓治... 原來呢杯唔充滿鮮果嘅飲品唔係什果賓治o黎o架, 入面有酒o架, 係White Sangria至真呀... 結果要Honey一個人幹掉呢4杯含酒精飲品, 哈哈~ 我飲咗鮮榨西瓜汁, 超新鮮, 好清甜呀, 好好飲呀... 之後又膽粗粗試咗鮮榨蔬菜汁, 好飲喎, 真係估佢唔到, 居然一d都唔苦, 仲甜甜地, 係西芹味比較出d...

好, 可以開始食o野lu!!! 頭盤同甜品都係自助餐形式, All You Can Eat!!!

事不宜遲, 先來一Round冷盤... 羊奶芝士伴香草蕃茄一向都係我嘅至愛, 羊奶芝士大大片厚厚的, 亳不吝嗇, Yummy!!! Parma Ham都唔錯... 帶子又大隻又鮮甜又爽脆, 伴野茶沙律汁食, 好味到不得了, 我之後狂掃, 哈哈~ 蝦都好好味, 又係大大隻, 蝦肉鮮甜彈牙, 又係力掃項目之一...

第二Round超超超有驚喜呀!!! 你地睇吓, 隻鱈場蟹(阿拉斯加帝王蟹)蟹腳幾咁粗壯, 唔係好似平時見到果d好似木筷子咁幼嘅蟹腳, 佢開咗邊都仲大隻過2對木筷子, 仲要咬落超鮮甜, 海水味散去後, 就到濃郁嘅蟹味, 好鮮甜好有咬口, d肉結實到不得了, 從未食過咁好味又咁啖啖肉嘅凍鱈場蟹腳, Ichiban x 100!!! 凍蝦又係掂到不得了, 從未食過咁大隻嘅凍蝦, 蝦頭d膏多到爆, 甘香到暈, 蝦身啖啖肉之餘, 仲超鮮甜超彈牙, 蝦味爆晒棚, 勁勁勁好味呀!!! 香草煙三文魚又係好得, 勁大片, 脂肪分佈好平均, 肉質軟腍, 淡淡嘅煙燻味, 唔會過鹹, 讚呀!!! 


第三Round已經Encore第二Round, 哈哈, 好Crazy!!! 原本想再Encore多一Round, 但係其他食物都係超超超吸引, 要忍一忍口, 試吓其他食物先...

第四Round就o黎幹一番沙律事業!!! 沙律款式超多, 琳瑯滿目, 泰式、越式、印尼、充滿亞洲風情, 還有西式的... 可謂各適其適!!! 若然咁都仲唔啱你心水, 放心, 酒店方面亦供應自家撈沙律, 客人可在沙律Mixing Bowl自行調教自己最愛的口味, 我比10個讚呀!!!

印尼沙律好好味, 又帶又蝦又魷魚圈, 材料好鬼豐富... 泰式牛肉沙律好惹味, 但有d辣, 正是引人之處... 泰國青木瓜沙律, 酸May May, 好醒胃... 印度鷹嘴豆沙律好重咖哩味, 仲有舊好似牛丸咁嘅物體, 味道好特別, 我第一次食咋... 牛油果薯仔紅腰豆沙律, 好味又有益... 最正係, 咁多款沙律嘅沙律醬係完完全全唔同味o架, 唔似坊間嘅Buffet, 10盆沙律都1個味...


再o黎就到刺身啦!!! 三文魚刺身切成粒粒狀, 脂肪紋路清晰均勻, 肉質鮮嫩緊緻, 淨係睇個樣已經知道掂啦!!! 八爪魚刺身同油甘魚刺身都好新鮮~

廚師係現場不停為大家煎鵝肝... 嗯... 好香呀!!! 快d, 快d... 煎呀煎, 煎呀煎, 終於都煎好啦!!! 我前面有3位女士+1位抱B男士, 好彩每個人都好自律只係拎2碟, 如果1人拎多1碟我都冇得拎喇... 高級酒店果然唔同d, 唔使搶, 大家都好有修養, 唔會1個人搶晒成盤少少都唔分d比人... I Like It!!!


廚師將煎好嘅鵝肝放入四方小碗內, 再加上黑醋煮成嘅醬汁, 正呀!!! 鵝肝煎到皮脆內嫩, 甘香撲鼻, 成個口腔都充滿鵝肝味, 黑醋汁醇厚中帶酸甜, 配鵝肝一流!!! Encore!!! Encore!!! Encore!!! 炸蝦丸d皮炸到熱辣辣好脆, 內裡爽口彈牙, 好香蝦味~


廚師Corner仲有即叫即制意粉, 材料簡單, 雖然只有長通粉、茄汁、芝士, 卻煮出真功夫!!! 好味到暈呀!!! Al Dente!!! 長通粉煮得剛剛好, 煙韌彈牙但唔硬, 好「有咬口」... 醬汁茄味濃郁酸度適中, d芝士碎好香呀!!! 點鮮可以煮得咁完美o架?!!


連Pizza都係現場焗制o架... 仲有幾種味道... 味道冇咩驚喜, 少少地試吓算啦, 留肚比其他美食~

最估唔到, 連龍蝦湯都可以自行調配!!! 講緊係d龍蝦肉同芝士~ 仲有部長幫Honey盛湯, 之後Honey自己想落幾多龍蝦肉同芝士由Honey自己話事... 嘿嘿... 我妄想症又發作... 我開始幻想咁我咪可以拎一碗95%龍蝦肉嘅龍蝦湯, 真係諗吓都興奮~

現場有Live Band演奏, 氣氛好好!!! 仲前前後後最少6-8次行埋d客張枱度演奏生日歌... 仲有好多客人搵佢地合照...

食咗90分鐘頭盤, 終於都係時候食主菜啦!!!

New Zealand rack of lamb -- Honey嘅Main Course, 7成熟, 居然一d血水都冇, 肉質幼嫩, 完全唔韌, 好掂呀!!! 個廚嘅功力好深厚呀!!! 來自紐西蘭嘅羊架, 冇臊味, 靚嘅羊果然唔同d, 正!!!

鵝滿是快烙滴好耳痛, 鵝悶天天一戲個窗, 鵝們在殼習, 鵝悶載升脹, 鵝悶是春天滴化!!! (哈哈哈... 超無聊...)

Poached egg on a toasted muffin garnished with Alaskan crab -- 當我一見到呢碟藝術品, 腦海裡面聯想到嘅係... 春天花花!!! 好靚呀!!! 我成個人好似走咗入春天嘅花園一樣咁呀!!! 呀)))))) 唔捨得食呀!!! 點算好呀!!! 

好, 返回現實!!! 切開佢睇睇先... Muffin麵包上面係蟹肉, 再上面係波蛋, 蛋面再放d蟹肉作點綴... Muffin好鬆軟, 蟹肉有海水味, 波蛋好神奇, 蛋白口感好似綿花, 蛋黃係生嘅, 我冇食到, 所有花花都被我食晒落肚, 好無情, 嘿嘿...

WoW... 終於要同甜品開戰啦~ 加油, 加油, 加油, Fighting, Fighting, Fighting!!!


Tiramisu又係廚師現場即叫即制!!! 忌廉芝士、咖啡酒、可可粉、餅乾... 全部材料落幾多份量由你自己話事, 可以滿足所有客人嘅個人喜好, 好有Heart呀!!! 我要多d咖啡酒多d可可粉吖, 唔該~


忌廉芝士軟滑無比, 咖啡酒同可可粉味道香濃, Yum Yum~


坦白講, 一直以o黎, 我都好唔明白, 點解d人咁鍾意食梳乎厘(Souffle), 濕淋淋一Pat糊咁, 有咩咁好食呀?!!

今日... 謎底終於解開!!! 原來好食嘅梳乎厘係真係好好好好食o架!!! 個焦糖皮好薄但好脆, 未食過個皮又薄又脆嘅梳乎厘, 只係食過個皮好似浸咗水嘅紙杯蛋糕咁嘅梳乎厘... 裡面食落口... 嘩... 好似食咗陣風咁, 轉瞬即逝, 點解會咁奇妙o架?!! 冇咬過冇吞過已經唔知滑咗去邊!!! 好利害呀!!! 藍梅味好好味, 藍草莓醒d!!! (嘿嘿, 有冇人知道最尾呢一句嘅出處呢? 無聊怪又發作啦)


試試3款法式凍餅... 藍莓虎紋芝士凍餅造型可謂費盡心思, 咁細粒提子都可以切到咁靚嘅花, 刀功唔講得少... 藍莓芝士帶藍莓嘅微酸及果香, 虎紋芝士香滑, 好味!!! 黑朱古力慕斯味道濃郁口感滑溜, 木莓的果酸平衡咗慕斯嘅甜味, 有畫龍點睛嘅效果!!! 朱古力芭菲多重口感, 睇到小朋友心花怒放~

即制Pancake味道唔太突出... 朱古力噴泉係小朋友殺手... 木莓批味道有驚喜, 木莓果酸中和Custard甜度, 食完唔覺膩~

雪糕有雲喱拿味、士多啤梨味、朱古力味、芒果味... 個人比較鍾意芒果味, 好似咬緊成條菲律賓芒果咁... 雲喱拿味雖然有雲喱拿籽, 不過味道唔太突出... 士多啤梨味冇太大驚喜...
Cream Brulee好有驚喜!!! 焦糖脆皮有薑味, 好似食緊中式薑汁燉蛋咁, 好好味!!!

生果好靚好新鮮, 西瓜清甜多汁, 菠蘿香甜美味, 藍莓好大粒, 未見過咁大粒嘅藍莓, 好甜, 一d都唔酸... 士多啤梨微酸帶果香...

食足3粒半鐘, 大滿足!!!

食飽飽都繼續坐多一陣, 享受一下呢度嘅懷舊氣息, 欣賞一下淺水灣嘅美麗景色...

海景位Full晒就要坐偏廳, 環境都唔錯, 高貴優雅, 清靜怡人... 似唔似鐵達尼號入面d貴族飲茶傾計嘅Common Room呢?

全場爆滿, 服務員好忙碌但未有亂陣腳, 依然細心有禮, 果然訓練有素~ 搵佢地幫手影相都有少少唔好意思, 但係佢地仍然充滿笑容, 好有耐性咁話可以影到滿意為止, 好窩心~  即席為大家服務嘅廚師亦有好幾個, 務求以食物嘅最佳狀態展示客人面前~

食材用料靚, 食物味道佳, 款式貴精不貴多, 服務超好, 環境一流... 你會話「咁貴, 好正常啫」... 有一點不可不提, 呢度嘅客人超有修養, 唔會狂搶食物, 只係拎自己要食嘅份量, 當鵝肝只剩低1碟, 2位男士互相讓比對方, 結果最後讓咗比我, 哈哈, 鷸蚌唔爭, 漁人得利~
是次每人消費約 600 元
味道： 5 環境： 5 服務： 5 衛生： 5 抵食： 4
###
地址 : 淺水灣淺水灣道109號
電話 : 2292 2822