近期興起團購, 我嘅一班死黨亦唔執輸, 熱衷於呢個新玩意... 之但係... 此團購不同彼團購, 哈哈!!! 我地只係一齊上網買衫, 主攻日本嘅Nissen同韓國嘅Gmarket, 夾埋一個Order送貨, 慳運費之餘, 又唔使自己一個人一次過要買太多衫... 最正嘅係... 出o黎提貨時, 又有藉口食食食!!! 呵呵呵呵~
今次嘅搵食目標... 「港島香格里拉」High Tea!!! 網民口碑唔錯, 所以我對佢充滿期望~
尋晚11點掛起8號風球, 今朝起身第一時間睇天氣報告, 嘩!!! 落晒波?!! 有冇走得咁快呀?!! 太好啦, 尋日仲好擔心今日嘅「大食會」會被迫告吹... 好彩受到上天眷顧... 下午仲好鬼猛太陽添...
由於冇得訂位, 2點正開始入座, 先到先得, 所以我地要好準時去到... (最後都冇人準時, 但係我第一個去到, 嘻嘻)
首先講講, 全餐最最最差嘅... 係張枱!!!
事緣... 貓兄話Island Shangri-la個Lobby好Grand, 叫我地去到揀個好位... 我地到達時, 只得幾枱客, 大把位剩, 但係個職員居然帶我地去靠牆邊嘅小圓枱, 冇景之餘, 其他小圓枱只有2張櫈, 果張小圓枱比幅牆頂咗一邊, 仲要放3張櫈?!! 我望一眼張小圓枱, 都計到放唔到3人Afternoon Tea啦, 個職員日日係度返工, 冇可能唔知呀嘛?!!
我同個職員理論, 我個Point好簡單 -- 我地食High Tea, 呢張枱仔點放得落2 Sets High Tea架, 3杯飲品, 3套茶壺, 3隻碟, 3 Sets 餐具?!!
職員聽完, 就話只可以轉坐門口側邊嘅小方枱, d Sofa 長枱係比多人嘅客... 查實張小方枱都唔大得好多, 無奈接受~
後來... 居然有1家3口嘅外國人, 都有得坐Sofa 長枱, 佢地只係幫襯2份High Tea, 點計都係我地付出多d錢啦, 居然要我地做擠迫戶, 對我地好唔公平囉!!!
之後... 居然有1同胞, 都坐Sofa 長枱, 只係飲1杯橙汁!!!
再之後... 有4位本地客人都係坐Sofa 長枱, 但係佢地都只係幫襯2份High Tea, 因為有1個係外傭, 1個係幼童... 睇到佢地張枱鬆動到離奇, 覺得佢地真係嘆緊High Tea, 再望吓自己張枱... 阿職員, 咁算點先?!! 好嬲呀!!!
(右) Traditional Afternoon Tea 傳統下午茶 (HK$428 for 2)
(左) Chocolate and Berry Afternoon Tea 朱古力配香莓下午茶 (HK$238 for 1)
我地Order咗2份傳統下午茶, 同埋1份朱古力配香莓下午茶... 食物送上枱時, 一片混亂!!!
職員明知唔夠位, 夾硬放低2個架, 結果插咗落我地d碟度, 居然仲用架腳推開我地d碟, 唔係用手嘅喎!!! 我覺得自己被2座山圍起, 完全望唔到我嘅朋友, 點傾計呀?!! 係完全冇考慮到我地嘅感受!!! 而且食高級嘅下午茶, 餐具擺位理應好講究, 職員夾硬將朋友d餐具推晒埋去枱角一堆, 朋友們都迫側晒身坐埋去枱角度碟貼碟咁食, 同去繁忙時間嘅茶餐廳完全冇分別!!!
其實張枱細就係緊嘅, 咁人係生o架嘛, 你可唔可以用吓個腦, 擺得好少少呢?!! 有冇玩過俄羅斯方塊呀?!! 如果移一移d位, 將2個High Tea架放晒係右邊冇人坐果邊, 將我d餐具放係左手邊, 成件事會好好多囉!!! d職員果隻夾硬係, 夾硬到一放低即走, 我地係迫到, 郁一郁d餐具就迫到跌咗落地, 未試過食High Tea食得咁唔High囉!!!
唉...
環境就真係Wonderful嘅... 落地玻璃外面係翠綠嘅公園, 仲有棵百年嘅老榕樹, 係如此靚景之下嘆下午茶原本係人生一大樂事...
配埋大堂嘅特高樓底, 奧地利水晶燈, 再加埋現場鋼琴小提琴合奏... 簡直係完美!!! 可惜... 因為張枱太細, 扣分!!!
好, 係時候介紹吓我份「朱古力配香莓下午茶」喇~
(頂層) 精選法式糕餅及曲奇餅
Strawberry cheese cake -- 極濃郁嘅芝士味, 可惜芝士蛋糕唔係我杯茶, 極力推薦貓兄試少少, 貓兄讚不絕口!!! KaKaMa見狀, 又忍唔住話要試下, 佢都讚好味~
Rich chocolate macaroon -- 鬆脆嘅馬卡龍外殼, 包住超特濃嘅朱古力軟心, 好好好味呀!!!
Mozart (signature Jivara chocolate cake) -- 用上頂級可可豆產地Jivara嘅可可豆, 就連頂級手工製的Valrhona朱古力都係用Jivara出產嘅可可豆, 軟滑香郁, 同脆米餅底構成雙重口感, 美味非常, 難怪可以成為Signature Cake~
(頂層) 精選法式糕餅及曲奇餅
Strawberry cheese cake -- 極濃郁嘅芝士味, 可惜芝士蛋糕唔係我杯茶, 極力推薦貓兄試少少, 貓兄讚不絕口!!! KaKaMa見狀, 又忍唔住話要試下, 佢都讚好味~
Rich chocolate macaroon -- 鬆脆嘅馬卡龍外殼, 包住超特濃嘅朱古力軟心, 好好好味呀!!!
Mozart (signature Jivara chocolate cake) -- 用上頂級可可豆產地Jivara嘅可可豆, 就連頂級手工製的Valrhona朱古力都係用Jivara出產嘅可可豆, 軟滑香郁, 同脆米餅底構成雙重口感, 美味非常, 難怪可以成為Signature Cake~
(中層) 精選法式糕餅及曲奇餅
可憐我份High Tea, 上演一幕「鬆餅」圍城, d 曲奇仲餅踩餅, 嗚嗚嗚嗚... 其他枱嘅鬆餅全部都係用滕藍加布上枱, 佢居然將3份鬆餅夾硬塞晒入我set High Tea嘅中層... 我呢Set High Tea... 好核突呀!!! 一d都唔High呀!!!
我望住佢地, 腦海裡面聯想到嘅就只有N年前, "Pizza黑"嘅自助沙律Bar, d客人要瘋狂咁塞塞塞塞塞, 塞d沙律材料入一個小小嘅碗入面, 塞到爆晒, 再塞d食物就會跌出o黎先被迫罷手...
可憐我份High Tea, 上演一幕「鬆餅」圍城, d 曲奇仲餅踩餅, 嗚嗚嗚嗚... 其他枱嘅鬆餅全部都係用滕藍加布上枱, 佢居然將3份鬆餅夾硬塞晒入我set High Tea嘅中層... 我呢Set High Tea... 好核突呀!!! 一d都唔High呀!!!
我望住佢地, 腦海裡面聯想到嘅就只有N年前, "Pizza黑"嘅自助沙律Bar, d客人要瘋狂咁塞塞塞塞塞, 塞d沙律材料入一個小小嘅碗入面, 塞到爆晒, 再塞d食物就會跌出o黎先被迫罷手...
Soft chocolate sponge and cookies -- 好可憐嘅蛋糕, 我救佢出o黎時, 刮花咗塊面... 蛋糕鬆軟, 朱古力香濃, 再食10件都冇問題... 曲奇就一般啦~
Raspberry mille feuilles -- 雜果拿破崙 Mille Feuilles ... 對吉士我一向麻麻, 再加上我一向避之則吉嘅拖肥, 居然產生微妙嘅化學作用, 出奇地美味... 吉士幼滑香軟, 酥皮甘香鬆脆, 加上超巨型紅莓, 果酸中和吉士嘅甜, 怕甜怕膩嘅朋友絕對唔可以錯過~
Berry tartlet -- 一向都係搶手貨嘅果撻, 其實我唔係咁鐘意食, 跟人搶埋一份都係因為佢外型可愛~ 呢個果撻真係好靚, 我決定將佢微型黏土化, 哈哈~
而家寫Blog睇番個餐牌, 見到有Crispy cones with chocolate and berry mousse, 點解我冇得食o架?!! 當時我都見到有好多超可愛嘅迷你雪糕桶仔不斷係廚房拎出o黎, 唔係枱枱有o架喎, 當時都好好奇究竟要點樣先有得食嘅呢, 仲自我安慰話應該係有小朋友嘅枱先有... Oh No!!! 到底「誰搬走了我的Crispy cones」?!!
(消失的滕藍)
Warm golden raisin and plain scones with strawberry jam, orange jam and clotted cream 暖提子及原味烘鬆餅配士多啤梨, 香橙果醬及忌廉 -- 掛住慢慢嘆晒d法式糕餅先, 忘記咗鬆餅要趁熱食, 放咗好耐先食, 已經唔再暖, 但係都好好味, 牛油味好重, 唔乾身, 蘸士多啤梨果醬一流, 蘸clotted cream反而格格不入~
(底層)
Smoked Atlantic salmon with chive cream on four-grain bread 煙三文魚香草忌廉四穀包 -- 味道唔係太突出~
Egg mayonnaise, cucumber and cress on brioche 蛋沙律, 青瓜及沙律菜軟包 -- 最愛蛋沙律嘅我, 當然鐘意食啦~ 蛋沙律中間加咗一層青瓜, 咬落脆脆地, 同平時軟淋淋嘅口感好唔同, 好特別~
Roast beef with mustard mayonnaise on rye bread 燒牛肉芥末沙律醬麥包 -- 味道唔錯, 係麥包乾咗少少~
Poached chicken and mushroom tartlet 白菌雞撻 -- 味道冇乜特別~
Smoked Atlantic salmon with chive cream on four-grain bread 煙三文魚香草忌廉四穀包 -- 味道唔係太突出~
Egg mayonnaise, cucumber and cress on brioche 蛋沙律, 青瓜及沙律菜軟包 -- 最愛蛋沙律嘅我, 當然鐘意食啦~ 蛋沙律中間加咗一層青瓜, 咬落脆脆地, 同平時軟淋淋嘅口感好唔同, 好特別~
Roast beef with mustard mayonnaise on rye bread 燒牛肉芥末沙律醬麥包 -- 味道唔錯, 係麥包乾咗少少~
Poached chicken and mushroom tartlet 白菌雞撻 -- 味道冇乜特別~
朋友Order嘅「傳統下午茶」, 味道同外型一樣出眾, 只可以講, 樣樣都好味~
「傳統下午茶」同「朱古力配香莓下午茶」嘅分別主要在於精選法式糕餅及曲奇餅, 至於鬆餅同三文治就係一樣嘅~
(左起) Raspberry marechaux, Mango pistachio tart, Strawberry fruit tart~
(左起) Paris Brest, Caramel Macaroon, English fruit cake and shortbread cookies~
飲品有好多選擇, 中式茶有獅峰明前龍井, 極品白牡丹, 猴子採觀音王, 特級滇紅, 陳年貢品普洱, 銀亳香片... 西式茶係Ronnefeldt... 咖啡係Lavazza... 仲有熱朱古力...
我左揀右揀, 最終揀咗Ronnefeldt Tea - Flavoured black teas - Rose Tea with Petals, 揀佢係因為我以為會見到d玫瑰花, 原來係睇唔到嘅... 茶香夾雜住玫瑰香, 難怪古時d貴族日日下午都要o黎個High Tea, 因為... 呷一口玫瑰花茶, 香味直衝大腦, 果種感覺真係好High~
雖然我好憤怒, 但係坦白講, 佢d服務又唔係差得晒, 絕對配得起個High字~ 就從佢間唔中會自動幫我斟下茶, Refill下熱水, 種種細微之處, 可見一斑~
我地由2點幾吹水吹到5點幾, 全場爆滿, 都冇人趕我地走... 雖然吹咗咁耐, 係吹唔晒, 難分難捨之下, 落超市邊逛邊吹, 逛完仲要係太古廣場入面嘅廣場企係度繼續吹, 最後好似吹到8點幾, 都仲要依依不捨咁講Bye Bye, 女人, 真係好吹得, 嘩哈哈哈~
原本... 食物味道係5粒星... 原本... 環境係5粒星... 原本... 服務係5粒星... 但係... 一切一切... 都因為我地被迫坐係一張迫到冇可能容納到3人份下午茶嘅枱仔, Sorry喇, 我決定全部減1粒星!!!
是次每人消費約$245元
味道： 4 環境： 4 服務： 4 衛生： 4 抵食： 3
###
地址 : 金鐘金鐘道88號太古廣場二座港島香格里拉酒店6樓
電話 : 2877 3838
沒有留言:
張貼留言