君悅咖啡廳 Grand Cafe : 突如其來的驚喜Tea Buffet

21 July 2012, Saturday

尋晚連食2餐, 今日又再搵食, 好幸福呀, 哦呵呵呵~

今次嘅目標係想去好耐嘅Tiffin度嘆下High Tea...

High Tea前順路去書展兜個圈... 原本打算行1-2個鐘就出返o黎, 點知... 居然由朝早10:30行到下晝3:30, 喪攰!!! 行到中段開始腳步浮浮, 聽覺同視覺都漸漸變得模糊!!!

正午12:15打電話去Tiffin探路, 佢居然話Full Booking, 叫我地Walk-in試下會唔會有客No Show!!! 唔係呀嘛, 咁大整蠱?!!

下晝3:30離開會展, 行過去君悅酒店, 去到Tiffin, 話暫時冇客No Show!!! Oh No!!! 好肚餓呀!!! 仲好攰呀!!! 我地冇力行去第2度食o架啦!!!

職員見我成隻趴地熊咁, 伏係佢個Reception Counter度, 賴死唔走, 問完一次又一次再一次, 開始Feel到唔對路, 可能驚我會產生幻覺, 當咗佢係漢堡包雞脾熱狗之類, 會撲埋去咬佢... 所以佢靈機一觸, 叫我去Tea Buffet問下仲有冇位...

Tea Buffet?!! 乜同呢度唔同嘅咩?!! Tea Buffet係邊度呀?!! 樓下?!! 哦... 衝呀!!!

去到地下嘅Grand Cafe, 好彩仲有位, 真係好好好彩!!! 感動-ing...

職員帶我地去比較入嘅枱坐, 因為幾迫下, 所以我地轉去入口位張枱, 張枱一樣大, 但係唔使夾係其他枱中間, 空間感好得多, 又最近Buffet枱, 出出入入慳番唔少腳骨力...

食到中段先發現, 原來我地頭先覺得好迫夾果張枱, 隔離枱係黃百鳴同谷德昭呀!!! 仲有一大班人, 可能傾緊新戲... 呀!!! 點解我地頭先會留意唔到o架?!! 早知就唔好轉枱啦!!!

Buffet區唔係好多選擇, 但大部分都好高質數...

朱古力放係Tiffin嘅5層High Tea架上, 好High呀, 當自己去咗Tiffin嘅啦, 呀哈哈哈...

好多Macaron(馬卡龍)呀!!! 仲有3隻味咁多呀!!! 好興奮呀!!!


嘩!!! 原板蜂巢呀!!! 好名貴呀!!! 我咁耐以o黎, 剩係係泰國間The Sukhothai Bangkok酒店入面間Colonnade嘅早餐Buffet度見過一次咋!!!


仲有其他Buffet枱o架, 不過太肚餓啦, 唔影咁多啦~ 我要開餐啦!!!

餓到第一碟唔記得用相機影, 剩係用iPhone影咗...

迷你漢堡包外型可愛, 漢堡扒汁多味美, 唔錯唔錯!!!

煙三文魚好高質數, 大大片, 色澤均勻, 紋理清晰, 入口軟綿油潤, 唔太鹹又唔腥, 好掂!!!

 

再瘋狂Encore煙三文魚...

火箭菜新鮮到不得了!!! 狂夾, 成座山咁高, 未見過火箭菜嘅餓鬼咁呀, 好肉酸呀, 嘩咔咔咔!!! 香草白醋汁好好味!!!



第2碟都未食完, 我同貓兄已經勁讚好抵食, 回晒本, 大家都話好耐冇試過去食Buffet係覺得回本o架囉, 仲要只係食到第2碟就已經覺得回本...
 
剛幹掉碟沙律, 又即刻衝出去拎熱葷...

蛋沙律包唔錯, 蛋沙律好香...

鵝肝餐包外皮香軟, 餡料鵝肝味唔出, 有d失望...

雞批內有好大舊雞肉, 外皮鬆化, 唔錯唔錯...

酸甜蝦球蝦肉爽脆, 醬汁酸酸甜甜, 幾開胃~

車厘子鴨胸顏色有點嚇人, 味道OK~


熱葷無咩特別... 個心已經飛咗去甜品區...

Tiramisu 以小杯盛載, 谷古粉香氣馥郁, 芝士同鮮忌廉好幼滑, 帶咖啡嘅甘苦味, 滲出淡淡醇酒香, 好好味哦~

手造朱古力外型可愛, 內裡絕不簡單!!! 香滑嘅黑朱古力居然包裹咗4粒原粒榛子, 咬開堅硬嘅榛子, 滲出淡淡榛子香味, 呀!!!!!! 好好味呀!!! 點解會咁好味o架?!! 之後貓兄幫我拎咗1粒, 到我再出去時, 已經冇晒!!! 嗚嗚嗚嗚~ 好o野真係特別多人爭!!!

嘩!!!!!! Macaron呀!!! 仲有3款咁多, 好興奮呀!!! 紅色係Raspberry味, 重木莓味, 酸酸甜甜, 幾醒胃... 綠色係抺茶味, 好香抺茶味呀, 好好好味呀... 啡色係朱古力味, 都好好味... 每一粒個皮都又薄又脆, 內裡煙煙韌韌, 好掂呀!!!

朱古力慕斯以四方型透明玻璃杯盛載, 層次分明, 底層係朱古力慕斯, 幼滑無比, 面層係特濃朱古力醬, 以朱古力豆作點綴, 撈埋朱古力慕斯一齊食, 好好味呀!!!

芒果撻相對失色, 因為我係朱古力怪嘛, 最鐘意嘅一定係朱古力甜品, 哈哈... 熟透嘅芒果都好香甜o架...

 

綠茶紅豆蛋糕唔係太突出, 綠茶蛋糕比較乾身, 紅豆味唔太出...

瘋狂Encore Macaron!!! 好Crazy呀!!! 嘩咔咔咔!!!

另1款手造朱古力, 外表無甚特別, 內裡係軟心朱古力醬, 朱古力味特濃, 軟滑無比, 讚!!!

 

拉姑廚房隆重登場!!! 限量版雪糕窩夫!!!

嘻... 其實又唔算咩限量版嘅... 只係部窩夫機壞咗, 廚師要入廚房整比我地, 所以要等耐少少... 就係因為咁, 我出咗去搞咗好耐, 搞到貓兄差d拎唔到Last Round, Sorry呀!!!

新鮮焗制嘅窩夫熱辣辣, 外脆內軟, 唔會太乾又唔會太濕, 焗得啱啱好呀!!! 我加咗個芒果味Hand Made Ice Cream上去, 再加粒原粒杏仁同曲奇做裝飾, 連我自己都覺得整得好靚, 呀哈哈哈~ d煮過嘅Raspberry醬係廚師幫我加嘅, 酸酸甜甜, 充滿莓香, 都幾醒神~

芒果雪糕超超超好味呀!!! 好滑, 好香芒果味, 口感界乎雪糕同雪葩之間, 食滿都唔覺滯, 好想再Encore, 可惜... 已經夠鐘啦!!! 5:30PM啦, 食唔切啦!!!

貓兄食咗雲呢拿雪糕, 有好多雲呢拿籽o架, 佢話好好味呀!!! 未食過雲呢拿雪糕有籽o架!!!

自助餐包一杯餐飲, 我例牌飲熱檸檬茶, 可以消下滯嘛...


原本環境都唔錯, 特高樓底, 雲石大堂, 落地玻璃全海景... 可惜... 個海景... 盡是地盤!!! 唔知地盤完工時, 會唔會變咗全樓景?!!

服務都唔錯, 可惜有時收碟速度比較慢, 食完2轉拎埋o野返o黎都未收碟...

好抵呀今日, 剩係三文魚同火箭菜同埋Macaron都已經回晒本!!! 雪糕係Bonus!!! 唯有美中不足嘅係, HSBC嘅唔知邊張卡同埋AE嘅唔知邊張卡有85折, 我地冇, 嗚嗚嗚嗚~

是次每人消費約$285元
味道： 5 環境： 4 服務： 4 衛生： 5 抵食： 5
###
地址 : 灣仔港灣道1號君悅酒店大堂
電話 : 2584 7722